ഗുജറാത്തിലെ നാടന് കലകള്ക്കുള്ള സമര്പ്പണമാണ് ഈ മ്യൂസിയം. ഗുജറാത്തിലെ ജനവിഭാഗങ്ങളുടെ എല്ലാ കലാരൂപങ്ങളും ഇവിടെ പ്രദര്ശിപ്പിക്കുന്നുണ്ട്. കണ്ണാടി ഉപയോഗിച്ചുള്ള എംബ്രോയ്ഡറി, ലോഹ പണികള്, കൊത്തുപണി, തുകല്, നെയ്ത്ത്, അലങ്കാരം, പാത്രങ്ങള്, തുടങ്ങിയവയെല്ലാം ഇവിടെ പ്രദര്ശിപ്പിക്കുന്നു. പ്രധാനമായും ഈ കരകൗശലവേലകള് ചെയ്യുന്നത് ഗുജറാത്തിലെ സ്ത്രീകളാണ്. പ്രദര്ശനവസ്തുക്കളോടൊപ്പം ഫോട്ടോകളും, കുറിപ്പുകളും പ്രദര്ശിപ്പിക്കുന്നത് വഴി അവയെക്കുറിച്ച് കൂടുതല് മനസിലാക്കാനും അവസരമുണ്ട്.
ഈ മ്യൂസിയത്തിനടുത്ത് തന്നെ കല്പന മംഗള്ദാസ് ചില്ഡ്രന്സ് മ്യൂസിയം എന്നൊരു പെര്ഫോമിങ്ങ് ആര്ട്ട് മ്യൂസിയവുമുണ്ട്. ഇവിടെ പാവകളിക്കുപയോഗിക്കുന്ന പാവകള്, നാടക, നൃത്ത ആടയാഭരണങ്ങള്, നാണയങ്ങള്, പരമ്പരാഗത സംഗീതത്തിന്റെ റെക്കോഡുകള് എന്നിവ പ്രദര്ശിപ്പിക്കുന്നുണ്ട്. ഇവിടുത്തെ പ്രധാന ആകര്ഷണം 3.19 മീറ്റര് ഉയരമുള്ള ഒരാനയുടെ അസ്ഥികൂടമാണ്.