അമൃത്സറില് നിന്ന് ഏഴുകിലോമീറ്റര് അകലെ ഗുരു കി വദാലി എന്ന ഗ്രാമത്തിന് സമീപമാണ് ഗുരുദ്വാര ചേഹര്ത്താ സാഹിബ് സ്ഥിതി ചെയ്യുന്നത്. ആറാമത്തെ സിക്ക് ഗുരുവായ ഗുരു ഹര്ഗോബിന്ദ് സിംഗ് ജി ഈ ഗ്രാമത്തിലാണ് ജനിച്ചത്. മകന്െറ ജനനം ആഘോഷിക്കാന് പിതാവായ ഗുരു അര്ജന് ദേവ് ജി ഇവിടെ ചേഹര്ത്താ എന്ന പേരുള്ള വലിയ കിണറും നിര്മിച്ചു. നേരത്തേ ആറ് പേര്ഷ്യന് വീലുകള് ഉപയോഗിച്ച് വെള്ളം കോരിയെടുത്തിരുന്ന ഈ കിണര് ഇപ്പോള് മൂടിയിട്ടിരിക്കുകയാണ്. എന്നിരുന്നാലും സ്ഥലത്തെ പ്രധാന ടാങ്കിലേക്ക് കിണറിലെ വെള്ളം പമ്പ് ചെയ്ത് എത്തിക്കുന്നുണ്ട്.
ഈ കിണറിന്െറ പേരില് നിന്നാണ് ഈ ഗുരുദ്വാരക്ക് ഈ പേര് ലഭിച്ചത്. ചതുരാകൃതിയിലുള്ള ശ്രീകോവിലിന് ചുറ്റുന്ന വിധത്തില് നിര്മിച്ച ഹാളുമാണ് ഇവിടെയുള്ളത്. ശ്രീകോവിലിന് മുകളിലായാണ് താമരയുടെ മാതൃകയിലുള്ള താഴികക്കുടം സ്ഥിതി ചെയ്യുന്നത്. ഈ താഴികകുടത്തിന്െറ മുകള്ഭാഗം സ്വര്ണം പൂശിയിട്ടുണ്ട്. ഹാളിന് മുന്വശത്താകട്ടെ 25 മീറ്റര് ഉയരമുള്ള രണ്ട് ഫ്ളാഗ് പോസ്റ്റുകളുണ്ട്. നിഷാന് സാഹിബ് എന്നറിയപ്പെടുന്ന സിക്ക് പതാക ഇവിടെയാണ് ഉയര്ത്താറ്. ശിരോമണി ഗുരുദ്വാര പ്രബന്ധക്ക് കമ്മിറ്റിക്ക് കീഴിലുള്ള ഈ ഗുരുദ്വാര സന്ദര്ശന ലിസ്റ്റില് ഉള്പ്പെടുത്താവുന്നതാണ്.