90 ഏക്കറോളം സ്ഥലത്ത് പരന്നുകിടക്കുന്ന പൂന്തോട്ടമാണിത്. ലോധി, മുഹമ്മദ് ഷാ എന്നിവരുടെ ശവകുടീരങ്ങളുള്ള ഈ പൂന്തോട്ടം ആര്ക്കിയോളജിക്കല് സര്വേ ഓഫ് ഇന്ത്യയാണ് പരിപാലിക്കുന്നത്. ശവകുടീരങ്ങള് കൂടാതെ പൂന്തോട്ടത്തില് ബര ഗുംബാദ്, ശീഷ് ഗുംബാദ് തുടങ്ങിയ നിര്മ്മിതികളുമുണ്ട്. പതിനഞ്ചാം നൂറ്റാണ്ടില് ലോധി, സയ്യിദ് സാമ്രാജ്യങ്ങളുടെ കാലത്ത് നിര്മ്മിച്ചവയാണ് ഈ കെട്ടിടങ്ങളെല്ലാം. സഫ്ദര്ജങ് ടോംബ്, ഖാന് മാര്ക്കറ്റ് എന്നിവയ്ക്കിടയിലാണ് ലോധി ഗാര്ഡന്. പ്രഭാത സവാരിയ്ക്കും മറ്റും പറ്റിയ സ്ഥലമാണിത്.
ലോധി ഗാര്ഡനിലെ കാഴ്ചകള് - സിക്കന്ദര് ലോധിയുടെ ശവകുടീരം. 1517ലാണ് ലോധിയുടെ മകന് ഇബ്രാഹിം ലോധി പിതാവിനായി ഈ ശവകുടീരം പണിതത്. ലളിതമായി നിര്മ്മിച്ച ശവകുടീരം 1866ല് ബ്രിട്ടീഷുകാര് പുതുക്കിപ്പണിയും ബാബര് ലോധിയെ പരാജയപ്പെടുത്തിയകാര്യവും മറ്റും അതിന് മുകളില് രേഖപ്പെടുത്തുകയും ചെയ്തു.
മൊഹമ്മദ് ഷായുടെ ശവകുടീരം- ലോധി പൂന്തോട്ടത്തില് ഏറ്റവും ആദ്യം പണിത ശവകുടീരമാണിത്. 1444ല് അല് എ ഉദ്ദിന് അലം ഷായാണ് സയ്യിദ് സാമ്രാജ്യത്തിലെ മഹാനായ ഭരണാധികാരിയായിരുന്ന മൊഹമ്മദ് ഷായ്ക്കുവേണ്ടി ഈ കുടീരം നിര്മ്മിച്ചത്.
ബര ഗുംബാദ് - വലിയ താഴികക്കുടമെന്നാണ് ഈ വാക്കിനര്ത്ഥം. അടുത്തായി സ്ഥിതിചെയ്യുന്ന മൂന്ന് താഴികക്കുടങ്ങലുള്ള പള്ളിയിലേയ്ക്കുള്ള പ്രവേശനകവാടമാണിത്. പള്ളിയും ഈ കവാടവും 1494ല് സിക്കന്ദര് ലോധിയുടെ ഭരണകാലത്താണ് പണിതത്.
ശീഷ് ഗുംബാദ് ചില്ലു താഴികക്കുടമെന്നാണ് ഈ വാക്കിനര്ത്ഥം. നിര്മ്മാണത്തിന് ചില്ലുകള് ഉപയോഗിച്ചതുകൊണ്ടാണ് കെട്ടിടത്തിന് ഈ പേര് വന്നത്. സിക്കന്ദര് ലോധിയുടെ കാലത്താണ് ഇതും നിര്മ്മിക്കപ്പെട്ടത്. ഒരു കുടുംബത്തിന്റെ അവശിഷ്ടങ്ങളാണ് ഇതിലുള്ളതെന്നാണ് പറയപ്പെടുന്നത്, എന്തെന്നോ ആരെന്നോ സംബന്ധിച്ച കൂടുതല് വിവരങ്ങള് എവിടെയും ലഭ്യമല്ല.