Click it and Unblock the Notifications
ഓം പര്‍വ്വതം, ഹിമാലയന്‍ മലനിരകളില്‍ പെടുന്ന, സമുദ്രനിരപ്പില്‍ നിന്ന് 6191 മീറ്റര്‍ ഉയരത്തില്‍ സ്ഥിതി ചെയ്യുന്ന പര്‍വ്വതമാണ്. ലിറ്റില്‍ കൈലാഷ്, ആദി കൈലാഷ്, ബാബ കൈലാഷ്, ജോംഗ്ലിങ്ങ്കോങ്ങ് പര്‍വ്വതം എന്നീ പേരുകളിലും ഈ പര്‍വ്വതം അറിയപ്പെടുന്നു. ഓം എന്ന രൂപത്തിലുള്ള മഞ്ഞിന്‍റെ സാന്നിധ്യം ഈ പര്‍വ്വതത്തെ ഹിന്ദു, ജൈന, ബുദ്ധമതങ്ങള്‍ക്ക് പ്രാധാന്യമുള്ളതാക്കി തീര്‍ക്കുന്നു.
ഇന്തോ-ടിബറ്റന്‍ അതിര്‍ത്തിയില്‍ സ്ഥിതി ചെയ്യുന്ന ഈ പര്‍വ്വതത്തില്‍ നിന്ന് മഞ്ഞണിഞ്ഞ അന്നപൂര്‍ണ്ണ പര്‍വ്വതത്തിന്‍റെ മുകള്‍ഭാഗങ്ങള്‍ കാണാം. ആദികൈലാസ യാത്രയില്‍ കാളിനദി, വെള്ളച്ചാട്ടങ്ങള്‍, ഇടതൂര്‍ന്ന വനങ്ങള്‍, നാരായണ്‍ ആശ്രമം എന്നിവയും സഞ്ചാരികള്‍ക്ക് കാണാനാവും. ഈ പര്‍വ്വത്തതിന് താഴെയായി സ്ഥിതി ചെയ്യുന്ന, പര്‍വ്വതത്തെ പ്രതിഫലിപ്പിക്കുന്ന ഗൗരികുണ്ഡ് തടാകം ഏറെ പ്രശസ്തമാണ്.
സാഹസികത ഇഷ്ടപ്പെടുന്നവര്‍ക്ക് ട്രെക്കിങ്ങിനും ഇവിടെ അവസരമുണ്ട്. താവഗാട്ടാണ് ഈ യാത്രയുടെ തുടക്കവും ഒടുക്കവും. കാളി, ധൗളി നദികളുടെ സംഗമസ്ഥാനമാണിത്. സമയം അനുവദിച്ചാല്‍ സന്ദര്‍ശകര്‍ക്ക് ജോംഗ്ലിങ്ങ്കോങ്ങ് തടാകവും സന്ദര്‍ശിക്കാം. മാനസസരോവര്‍ പോലെ വിശുദ്ധമായി കാണുന്ന ഒരു തടാകമാണിത്. സുര്യപ്രകാശമേല്‍ക്കുമ്പോള്‍ മനോഹരമായ കാഴ്ച നല്കുന്ന മഞ്ഞണിഞ്ഞ പാര്‍വതി മുഹര്‍ പര്‍വ്വതം ഇവിടെ നിന്നാല്‍ കാണാം.
