ഇംഫാലിലെ നിരവധിയായ ക്ഷേത്രങ്ങളില്‍ ഏറെ പ്രധാന്യമുള്ള ഒന്നാണ് ഹനുമാന്‍ ക്ഷേത്രം. ഇംഫാല്‍ നദിയുടെ തീരത്ത് മഹാബലി വനത്തിലാണ് ഈ ക്ഷേത്രം. ഒറ്റക്കല്ലില്‍ നിര്‍മ്മിച്ച കുരങ്ങിന്‍റെ രൂപത്തിലുള്ള ഹനുമാനാണ് ഇവിടുത്തെ പ്രതിഷ്ഠ.

1725 ല്‍ ഗാരിബ് നിവാജ് രാജാവാണ് ഈ ക്ഷേത്രം നിര്‍മ്മിച്ചതെന്ന് കരുതപ്പെടുന്നു. ഈ പ്രദേശത്തുള്ള ഏക ക്ഷേത്രവുമാണിത്. ബംഗാളി ശൈലിയോട് സാദൃശ്യമുള്ള മകുടമാണ് ഈ ക്ഷേത്രത്തിന്‍റേത്. മണിപ്പൂരില്‍ നിലനിന്ന ഹിന്ദുമതത്തിലെ രാമാനന്ദി ആരാധനാരീതിയുടെ ചരിത്രപരവും, പുരാവസ്തു ശാസ്ത്രപരവുമായ ഒരു തെളിവാണ് ഈ ക്ഷേത്രം.

ക്ഷേത്രത്തിന് സമീപത്തുള്ള കാട്ടില്‍ ഏറെ കുരങ്ങന്മാരുണ്ട്. കൗതുകകരമായ വസ്തുത, ഈ കുരങ്ങന്മാര്‍ മഹാബലി വനത്തിന്‍റെ പരിധിയില്‍ നിന്ന് പുറത്തേക്ക് പോകാതെ ക്ഷേത്രപരിസരത്ത് തന്നെ കഴിഞ്ഞുകൂടുന്നു എന്നതാണ്.