ഇന്ഡോറിലെ വാസ്തുവിദ്യ അത്ഭുതങ്ങളിലെ മറ്റൊരു ആകര്ഷണമാണ് സുഖ് നിവാസ് പാലസ്. ഹോള്ക്കാര് ഭരണാധികാരികള് വേനല്ക്കാല വസതിയായി ഉപയോഗിച്ചിരുന്ന സ്ഥലമാണിവിടം. ഇന്ത്യന്-പാശ്ചാത്യ ശൈലികള് കൊട്ടാരത്തിന്റെ നിര്മാണത്തില് ഉപയോഗിച്ചിട്ടുണ്ട്. ഹോള്ക്കാര് രാജംകുടംബത്തിന്റെ ജീവിത രീതികളും ആഢംബരവും ഈ കൊട്ടാരം പ്രതിഫലിപ്പിക്കുന്നു.
കൊട്ടാരത്തിന്റെ അടിയിലായി ഒരു തുരങ്കം ഉണ്ട്. സുഖ നിവാസ് കൊട്ടാരവും ഹോള്ക്കാര് രാജാക്കന്മാരുടെ പഴയ കൊട്ടാരവും തമ്മില് ബന്ധിപ്പിക്കാനുള്ളതാണ് ഇത്. കൊട്ടാരത്തിന് ചുറ്റുമായുള്ള ഉദ്യാനം സുഖ് നിവാസിന്റെ ഭംഗി ഇരട്ടിപ്പിക്കുന്നു. സമൃദ്ധമായ പാരമ്പര്യമുള്ള ഈ കൊട്ടാരം ഇന്ന് പ്രശസ്തമായ ഒരു പിക്നിക് റിസോര്ട്ട് ആണ്.
കൊട്ടാരത്തിന്റെ ഭംഗി ആസ്വദിക്കുന്നതിന് നിരവധി പേര് ഇവിടെ എത്താറുണ്ട്. ഇന്ഡോര് ഭരണാധികാരികളുടെ പ്രൗഢിയുടെ പ്രതീകമായി കൊട്ടാരം ഇപ്പോഴും നിലനില്ക്കുന്നു.