ഫോര്‍ട്ട് ഓഫ് വിക്ടറിയെന്നുകൂടി അറിയപ്പെടുന്ന ഈ കോട്ട നഗരത്തില്‍ നിന്നും 15 കിലോമീറ്റര്‍ അകലെയാണ്. അംബര്‍ ഫോര്‍ട്ടില്‍ നിന്നും 400 അടി ഉയരെ കഴുകന്മാരുള്ള കുന്നിന്‍മുകളിലാണ് ഈ കോട്ടസ്ഥിതിചെയ്യുന്നത്. ദുന്‍ഗര്‍ ദര്‍വാസ, അവാനി ദര്‍വാസ എന്നിങ്ങനെ രണ്ട് കവാടങ്ങളാണ് കോട്ടയ്ക്കുള്ളത്. കോട്ടയ്ക്കടുത്തുള്ള സാഗര്‍ താലവായിരുന്നു ഇവിടുത്തെ പ്രധാന ജലസംഭരണി.

സൈനികാവശ്യത്തിനായി പണിത ഈ കോട്ട ഏതാണ്ട് 3 കിലോമീറ്ററോളം സ്ഥലത്ത് പരന്നുകിടക്കുകയാണ്. കോട്ടയുടെ ഏറ്റവും മുകളില്‍ ജയ് വന്‍ എന്നുവിളിക്കുന്ന ഒരു പീരങ്കിയുണ്ട്. ഇതിന് അമ്പത് ടണ്ണോളം ഭാരമുണ്ടത്രേ. ചക്രങ്ങളില്‍ നില്‍ക്കുന്ന ഈ പീരങ്കിയ്ക്ക് ഏട്ട് മീറ്റര്‍ നീളമുള്ള കുഴലാണുള്ളത്. ലോകത്തെമ്പാടുമുള്ള ചക്രമുള്ള പീരങ്കികളില്‍ ഏറ്റവും വലുതാണ് ഇത്. ദിവ്യ ബുര്‍ജ് ആണ് കോട്ടയുടെ ഏറ്റവും ഉയരമേറിയ ഭാഗം. ഇതിന് മുകളില്‍ കയറിയാല്‍ നഗരത്തിന്റെ മനോഹരദൃശ്യം കാണാം.

ഈ കോട്ടയ്ക്കുള്ളില്‍ നിധി കുഴിച്ചിട്ടിരിക്കുന്നു എന്നു തുടങ്ങിയുള്ള കഥകള്‍ പ്രാദേശിക ജനങ്ങള്‍ക്കിടയിലുണ്ട്. ഇപ്പോള്‍ ഈ കോട്ടയ്ക്കുള്ളില്‍ ഒരു മ്യൂസിയം പ്രര്‍ത്തിക്കുന്നുണ്ട്.