കനറ്റാലിലെ പ്രധാന പിക്നിക്‌ സ്പോട്ടാണ് കോടിയ ജംഗിള്‍. കാട്ടരുവികള്‍ കളകളാരവം മുഴക്കുന്ന വശ്യ സുന്ദരമായ വന പ്രദേശമാണിത്. കേഴ മാന്‍,ഗോറല്‍,കസ്തൂരി മാന്‍,കാട്ടു പന്നികള്‍ തുടങ്ങിയ ഒട്ടേറെ ജന്തുക്കളെ ഈ പ്രദേശത്തായി കാണാം. കാഴ്ചകള്‍ കാണുന്നതോടൊപ്പം തന്നെ മനോഹരമായ ഭൂപ്രകൃതി ക്യാമറക്കുള്ളിലാക്കാന്‍ സാധിക്കുകയും ചെയ്യും. ഒട്ടനേകം വ്യത്യസ്തങ്ങളായ പക്ഷി വര്‍ഗങ്ങളുടെ വാസകേന്ദ്രമാണ് ഈ പ്രദേശം. അതിനാല്‍ തന്നെ പക്ഷി നിരീക്ഷണത്തിനു കൂടി പറ്റിയ ഇടമാണിത്.

മലകളുടെയും താഴ്വരയുടെയും ഭംഗി ആസ്വദിച്ച് കൊണ്ടുള്ള ട്രെക്കിംഗ് സഞ്ചാരികള്‍ക്ക് പുത്തനുണര്‍വ് പകര്‍ന്നു നല്‍കുന്നു. ട്രെക്കിംഗിനായി ഏതാണ്ട് 6 കിലോമീറ്ററോളം ദൂരമുള്ള കാനന പാതകളുണ്ടിവിടെ. വനത്തിലൂടെയുള്ള ജീപ്പ് സഫാരി മറ്റൊരു കൗതുകകരമായ അനുഭവമാണ്. കാട്ടിനുള്ളില്‍ ഒത്തിരി സമയം ചെലവഴിക്കാനുള്ളതു കൊണ്ട് തന്നെ യാത്രികരില്‍ അധികം പേരും ഉച്ച ഭക്ഷണം കൂടി കയ്യില്‍ കരുതാറുണ്ട്.