പണ്ട് മഹാഭാരത കാലഘട്ടത്തില് ഭീമസേനന് ഹിഡുംബന് എന്ന രാക്ഷസനെ വധിച്ച് ഹിഡുംബിയെ സ്വന്തമാക്കിയ ഹിഡുംബ വനമാണ് ഇന്ന് ഖേഡ എന്ന പേരില് അറിയപ്പെടുന്നത്. ഒരുകാലത്ത് ബാബി രാജവംശത്തിന്റെ ഭരണത്തിന്കീഴിലായിരുന്ന ഖേഡ പിന്നീട് മാറാത്ത രാജാക്കന്മാര് പിടിച്ചടക്കി. സ്വാതന്ത്ര്യത്തിന് മുന്പുള്ള കാലഘട്ടത്തില് ബ്രിട്ടീഷുകാരായിരുന്നു ഖേഡ നിയന്ത്രിച്ചിരുന്നത്. ഇന്ത്യയുടെ സ്വാതന്ത്ര്യസമര ചരിത്രത്തില് വലിയൊരു സ്ഥാനം ഖേഡക്കുണ്ട്.
ഗാന്ധിജി സത്യാഗ്രഹം നടത്തി ബ്രിട്ടീഷുകാരെ മുട്ടുകുത്തിച്ചത് ഖേഡയുടെ ചരിത്രത്തിലെ പൊന്തൂവലാണ്. ഖേഡ കടുത്ത ക്ഷാമത്തെ നേരിട്ട കാലത്തുപോലും ജനങ്ങളുടെ മേലുള്ള നികുതിഭാരം കുറയ്ക്കാന് ബ്രിട്ടീഷുകാര് തയ്യാറായില്ല. ഇതിനെതിരെയായിരുന്നു ഗാന്ധിജിയുടെ സത്യാഗ്രഹം. ഒടുവില് ഗത്യന്തരമില്ലാതെ ബ്രിട്ടീഷ് ഭരണകൂടം ഗാന്ധിജിക്ക് മുന്നില് അടിയറവുപറഞ്ഞു. ഹനുമാന് ടെക്രോയിലെ ഖേഡിയ ഹനുമാന് ക്ഷേത്രം, ശ്രീ മഹാലക്ഷ്മി ക്ഷേത്രം, ശ്രീ മങ്കാമേശ്വര് ക്ഷേത്രം, ശ്രീ ഹനുമാന്ജി ക്ഷേത്രം, ബഹുചരാജി മന്ദിര്, ശ്രീ സോമത് ക്ഷേത്രം, റാംജി മന്ദിര്, ഭദ്രകാളി ക്ഷേത്രം, ശ്രീ മേല്ഡി മാതാജി ക്ഷേത്രം, ശ്രീ നീല്കാന്ത് മഹാദേവ ക്ഷേത്രം, ഡാകോറിലെ രണ്ചോദ്രായി ക്ഷേത്രം, ഖേഡക്കടുത്തുള്ള ശ്രീ ഖോഡിയാര് മന്ദിര്, നദിയാദിലെ ശാന്താറാം മന്ദിര് എന്നിങ്ങനെ പുണ്യസ്ഥലങ്ങളുടെ ഒരു നിരതന്നെയുണ്ട് ഖേഡയിലെത്തുന്ന സഞ്ചാരികള്ക്ക് മുന്പില്.
പരമ്പരാഗത രീതിയിലുള്ള ചുവര്ചിത്രങ്ങള് ഖേഡയിലെ പല ക്ഷേത്രങ്ങളിലും കെട്ടിടങ്ങളിലുമൊക്കെ നമുക്ക് കാണാനാവും. 150 വര്ഷത്തോളം പഴക്കം ഈ ചിത്രങ്ങള്ക്കുണ്ടെന്നാണ് കണക്കാക്കപ്പെടുന്നത്. മതപരമായ ഇത്തരം ചുവര്ചിത്രങ്ങളില് മനുഷ്യരും മൃഗങ്ങളുമെല്ലാം നിറഞ്ഞ് നില്ക്കുന്നു.