Click it and Unblock the Notifications
നാഗാലാന്‍ഡില്‍ പുതുതായി രൂപീകരിച്ച ലോംങ് ലെംങ് ജില്ലയുടെ ആസ്ഥാനമാണ് ലോംങ് ലെംങ് നഗരം. ഇതേ പോലെ അടുത്ത കാലത്ത് രൂപീകരിക്കപ്പെട്ട മറ്റൊരു ജില്ലയാണ് കിഫൈര്‍... ജനുവരി 24,2004 നാണ് ടുവെന്‍സാങ്ങ് ജില്ലയില്‍ നിന്ന് വേര്‍പെടുത്തി ലോംങ് ലെംങ് രൂപീകരിച്ചത്. സമുദ്രനിരപ്പില്‍ നിന്ന് 1066 മീറ്റര്‍ ഉയരത്തില്‍ സ്ഥിതി ചെയ്യുന്ന ഇവിടേക്ക് പ്രവേശിക്കാന്‍ ഇന്നര്‍ ലൈന്‍ പെര്‍മിറ്റ് ആവശ്യമാണ്.
ലോംങ് ലെംങ് ജനതയും, സംസ്കാരവും - യാത്രികര്‍ അറിഞ്ഞിരിക്കേണ്ടവ
ലോംങ് ലെങ്ങിലെ ജനങ്ങള്‍ ഫോം ഗോത്രത്തില്‍ പെടുന്ന നാഗന്മാരാണ്. കളിമണ്‍പാത്ര നിര്‍മ്മാണം, നെയ്ത്ത്, മുള ഉത്പന്നങ്ങളുടെ നിര്‍മ്മാണം എന്നിവയില്‍ പ്രാഗത്ഭ്യമുള്ളവരാണ് ഈ ജനം പരമ്പരാഗതമായി കൃഷിയാണ് ഇവരുടെ പ്രധാന തൊഴില്‍. ഈ വര്‍ഗ്ഗത്തിന്‍റെ ഉത്ഭവം സംബന്ധിച്ച് വ്യക്തമായ വിവരങ്ങള്‍ ലഭ്യമല്ല. എന്നാല്‍ ഐതിഹ്യമനുസരിച്ച് ഇവര്‍ ആവോ നാഗന്മാരെപ്പോലെ ശിലയില്‍ നിന്ന് രൂപപ്പെട്ടു എന്നാണ് വിശ്വാസം. ഇവരില്‍ ബഹുഭൂരിപക്ഷവും ക്രിസ്തുമതത്തില്‍ ചേരുകയും അതു വഴി ഒരു പരിധി വരെ ആധുനികവത്കരിക്കപ്പെടുകയും ചെയ്തു. എന്നിരുന്നാലും ഉത്സവാഘോഷങ്ങളില്‍ ഇവര്‍ വിഹെ-ആഷക്, നെംപോങ്ങ്-ആഷക് എന്നീ ശരീരത്തെ ചുറ്റിയുള്ള ഷാളുകള്‍ അണിയാറുണ്ട്.
മോയു മേളയാണ് ഇവരുടെ ഏറ്റവും പ്രധാന ആഘോഷം. വേനല്‍ക്കാലത്ത് ഏറെ വര്‍ണ്ണപ്പകിട്ടോടെ ഈ ഉത്സവം ആഘോഷിക്കുന്നു. ഇത് വേനലിനുള്ള വിട നല്കല്‍ കൂടിയാണ്. ഏപ്രില്‍ മാസത്തിലെ വിത്ത് വിതയ്ക്കലിന് ശേഷമുള്ള ആറ് ദിവസങ്ങളിലാണ് ഈ ഉത്സവം നടക്കുന്നത്.
സാഹസികതയും സഞ്ചാരികളും
ലോംങ് ലെംങ് ഏറെ പ്രശസ്തമായിരിക്കുന്നത് ഇതിലെയുള്ള റോഡുകളിലൂടെയുള്ള സാഹസിക യാത്രകള്‍ക്കാണ്. എസ്.യു.വി കളിലോ, ഇരുചക്രവാഹനങ്ങളിലോ ഇതിലേ യാത്ര ചെയ്യാം. ലോംങ് ലെംങ്-ചാങ്ങ്തോങ്ക്യ റോഡ് ഇത്തരം യാത്രകള്‍ക്ക് ഉപയോഗിക്കപ്പെടുന്നതാണ്. ചെളി നിറഞ്ഞ റോഡുകളും, സ്നേഹസമ്പന്നരായ ജനങ്ങളെയും ഈ യാത്രയിലുടനീളം കാണാം. 32 കിലോമീറ്ററാണ് ഈ റോഡിന്‍റെ ദൈര്‍ഘ്യം.
