ഗോവയുടെ തലസ്ഥാനമായ പനാജിക്കടുത്താണ് മിറാമര് ബീച്ച്. അറബിക്കടലിന്റെ ഭംഗി ആസ്വദിക്കുന്നതിന് ഗോവയിലെ എണ്ണം പറഞ്ഞ സ്ഥലങ്ങളിലൊന്നാണിത്. സ്വര്ണമണല്ത്തരികള് ഈ കടല്ത്തീരത്തുകൂടിയുള്ള നടത്ത ശാന്തവും സമാധാനപരവും എന്നതുതന്നെയാണ് ഇവിടെ നിരവധി സഞ്ചാരികള് വന്നുപോകുന്നതിന്റെ പ്രധാന കാരണവും. ഗാസ്പര് ഡയസ് ബീച്ച് എന്നും ഈ ബീച്ച് പൊതുവെ അറിയപ്പെടുന്നു. തീരത്തെ പാം മരത്തണലില് കടല്ക്കാറ്റ് കൊള്ളുന്നതിനും ജോഗിങ്ങിനുമായി നിരവധി പേര് ഇവിടെയെത്തുന്നു.
പനജിയില് നിന്നും മൂന്നുകിലോമീറ്റര് സഞ്ചരിച്ചാല് മറാമറിലെത്താം. മണ്ഡോവിനദി അറബിക്കടലില് ചേരുന്നത് ഇവിടെയാണ്. ഗോവ വെക്കേഷന് ചെലവഴിക്കുന്നതിനായി സൗകര്യപ്രദമായ നിരവധി ഹോട്ടലുകളും ഇവിടെയുണ്ട്. ഏകദേശം രണ്ട് കിലോമീറ്റര് നീളമുണ്ട് ഈ ബീച്ചിന്. നവംബര് മുതല് മാര്ച്ച് വരെയുള്ള മാസങ്ങളാണ് മിറാമര് ബീച്ച് സന്ദര്ശനത്തിന് ഏറ്റവും അനുയോജ്യമായ സമയം.
എല്ലാത്തരത്തിലും പെട്ട ആളുകളും ദേശാടനപക്ഷികളും ചേര്ന്ന് കണ്ണിന് ഉത്സവക്കാഴ്ചകള് പകരുന്നതാവും ആ സമയത്ത് മിറാമര് ബീച്ചിലെ കാഴ്ചകള്. പ്രശസ്ത ടൂറിസ്റ്റ് സങ്കേതങ്ങളായ ഡോണ പൗലയും അഗോഡ കോട്ടയും മിറാമര് ബീച്ചിന് സമീപത്താണ്. പനജിയില് നിന്നും ബസ്സിലോ വിമാനത്താവളത്തില്നിന്നാണെങ്കില് ടാക്സിയിലോ ആണ് മിറാമറിലെത്താന് എളുപ്പം.