ലോകത്തെ ഉയരം കൂടിയ ശിവപ്രതിമകളില്‍ രണ്ടാമത്തേതാണ് കര്‍ണ്ണാടക സംസ്ഥാനത്തെ ഉത്തര കന്നടയിലെ മുരുഡേശ്വരത്തേത്.  കടലിലേക്ക് തള്ളിനില്‍ക്കുന്ന 123 അടി ഉയരമുള്ള ചതുര്‍ബാഹുവായ ശിവശില്‍പമാണിത്. 123 അടി (37 മീറ്റര്‍) ഉയരമുള്ള ഈ ശിവപ്രതിമ ലോകത്ത് രണ്ടാമത്തെ ഉയരമേറിയതാണ്. നേപ്പാളിലാണ് ലോകത്തെ ഏറ്റവും ഉയരം കൂടിയ ശിവപ്രതിമയുള്ളത്. മുരുഡേശ്വരത്ത് എത്തുന്ന സഞ്ചാരികള്‍ ഈ ശിവപ്രതിമ കാണാതെ മടങ്ങാറില്ല. മുരുഡേശ്വരം സ്വദേശിയും വ്യവസായ പ്രമുഖനുമായിരുന്ന ആര്‍ എന്‍ ഷെട്ടിയാണ് ഈ കുറ്റന്‍ ശിവപ്രതിമ നിര്‍മിച്ചത്.

രണ്ട് വര്‍ഷമാണ് ഇതിന്റെ പണിപൂര്‍ത്തിയാക്കാനെടുത്തത്. ഷിമോഗ സ്വദേശിയായ കാശിനാഥിന്റെ നേതൃത്വത്തിലുള്ള ഒരു സംഘം ശില്പികളുടെയും പുത്രനായ ശ്രീധറിന്റെയും സഹായത്തോടെയാണ് രാമനാഗപ്പ ഷെട്ടി എന്ന ആര്‍ എന്‍ ഷെട്ടി എന്ന മനുഷ്യസ്‌നേഹി നാശോന്മാഖുമായ ഈ ക്ഷേത്രം പുനരുദ്ധാരണം നടത്തുകയും ശിവപ്രതിമ നിര്‍മിക്കുകയും ചെയ്തത്. അഞ്ചുകോടി രൂപയായിരുന്നു ഇതിന്റെ നിര്‍മാണപ്രവര്‍ത്തനങ്ങള്‍ക്കായി ചെലവഴിച്ചത്. സൂര്യരശ്മികള്‍ പ്രതിമയ്ക്കുമേല്‍ പതിച്ച് പ്രതിമ തിളങ്ങുന്ന തരത്തിലാണ് മുരുഡേശ്വര പ്രതിമ സ്ഥാപിച്ചിരിക്കുന്നത്. ചതുര്‍ബാഹുവായ പരമശിവനെ കാണാനായി വര്‍ഷാവര്‍ഷം നിരവധി ആളുകളാണ് ഇവിടെയത്തിച്ചേരുന്നത്.