ലോകപ്രശസ്തമായ ഒരു ദര്‍ഗ്ഗയാണ് നാഗൂരിലേത്. ലോകത്തിലെയും, ഇന്ത്യയിലേയും ഏറെ പ്രശസ്തമായ ഒന്നാണിത്. ഹസ്രത്ത് സയ്യിദ് ഷാഹുല്‍ ഹമീദ് ക്വാദ്രിയാണ് ഈ ദര്‍ഗ്ഗയുടെ നിര്‍മ്മാണത്തിന് പിന്നില്‍ പ്രവര്‍ത്തിച്ചത്. തഞ്ചാവൂരില്‍ നിന്ന് 78 കിലോമീറ്റര്‍ അകലെയാണ് ഇത്. ചെന്നൈയില്‍ നിന്ന് ഇവിടേക്ക് അഞ്ച് മണിക്കൂര്‍ യാത്രയുണ്ട്. ദക്ഷിണേന്ത്യന്‍ ശൈലിയില്‍ നിര്‍മ്മിച്ച ഈ ദര്‍ഗ്ഗക്ക് അഞ്ഞൂറോളം വര്‍ഷത്തെ പഴക്കമുണ്ട്. ക്ഷേത്രങ്ങളുടെ രൂപത്തോട് സാമ്യതയുള്ള ദര്‍ഗ്ഗ അഞ്ച് ഏക്കര്‍ സ്ഥലത്തായാണ് സ്ഥിതി ചെയ്യുന്നത്. പതിനാറാം നൂറ്റാണ്ടില്‍ ജീവിച്ചിരുന്ന സന്യാസവര്യനായ നാഗൂര്‍ ആണ്ടവര്‍ക്കാണ് ഈ ദര്‍ഗ്ഗ സമര്‍പ്പിച്ചിരിക്കുന്നത്. നാഗൂര്‍ ആണ്ടവര്‍, ഖാദര്‍ അലി എന്ന പേരിലും അറിയപ്പെടുന്നു.