പീരുമേട്ടിലെ പ്രധാന ആകര്ഷണ കേന്ദ്രമാണ് കുട്ടിക്കാനം. സമുദ്രനിരപ്പില് നിന്നും 3500 അടി ഉയരത്തിലാണ് ഈ സ്ഥലം സ്ഥിതിചെയ്യുന്നത്. തിരുവിതാംകൂര് രാജാക്കന്മാരുടെ ഇഷ്ടവേനല്ക്കാല വിനോദകേന്ദ്രമായിരുന്നു ഇത്. ഇവിടുത്തെ മനോഹരമായ കാലാവസ്ഥയും പ്രകൃതിയും ചേര്ന്ന് ഇപ്പോള് ഇതിനെ കേരളത്തിലെ പ്രധാനപ്പെട്ട ഹണിമൂണ് ലൊക്കേഷനുകളില് ഒന്നാക്കി മാറ്റിയിട്ടുണ്ട്.
കാല്പനികരായ കവികള്ക്കും ചിത്രകാരന്മാര്ക്കുമെല്ലാം ഇഷ്ടപ്പെടുന്ന സ്ഥലമാണിത്. കുട്ടിക്കാനം പരിസരത്തെ ഒരു പ്രധാന കേന്ദ്രമാണ് പാഞ്ചാലിമേട്. ട്രക്കിങ് പ്രിയരുടെ സ്വര്ഗമെന്നാണ് ഈ സ്ഥലം അറിയപ്പെടുന്നത്. തേയിലത്തോട്ടങ്ങളും വളഞ്ഞങ്ങാനം വെള്ളച്ചാട്ടവുമാണ് ഇവിടുത്തെ മറ്റ് ആകര്ഷണങ്ങള്. ഇവിടുത്തെ പൈന്കാടുകള് സിനിമാക്കാരുടെ ഇഷ്ടലൊക്കേഷനാണ്.
ഒട്ടേറെ ഗാനരംഗങ്ങളും മറ്റും ഇവിടെ ചിത്രീകരിക്കാറുണ്ട്. തൊട്ടടുത്തായുള്ള വന്യജീവി സങ്കേതവും സന്ദര്ശനയോഗ്യമാണ്. മനോഹരമായ ഒട്ടേറെ അപൂര്വ്വയിനം പൂച്ചെടികളുള്ള ഈ സ്ഥലം മഴക്കാലം കഴിയുന്നതോടെ മൂടല്മഞ്ഞു പുതയ്ക്കും.