മിസോറാമിലെ എട്ട് ജില്ലകളില് ഒന്നാണ് സൈഹ. മിസോറാമിന്റെ തെക്കേ അറ്റത്തുള്ള ജില്ല എന്ന പ്രത്യേകതയും സൈഹയ്ക്കുണ്ട്. ജില്ലാ ആസ്ഥാനത്തിന്റെ പേരും സൈഹ എന്നാണ്. മാരാ സ്വതന്ത്ര ജില്ലാ കൗണ്സിലിന്റെ ആസ്ഥാനമായും സൈഹ നിലകൊള്ളുന്നു. മിസോറാമിലെ മൂന്ന് സ്വതന്ത്ര ജില്ലാ കൗണ്സിലുകളില് ഒന്നാണ് മാരാ. സൈഹ ജില്ലയുടെ വടക്ക്, വടക്ക് പടിഞ്ഞാറ് ഭാഗങ്ങളില് ലുങ്ലെയ് ജില്ലയും പടിഞ്ഞാറ് ഭാഗത്ത് ല്വാങ്ട്ലൈ ജില്ലയും തെക്ക്, കിഴക്ക് അതിര്ത്തികളില് മ്യാന്മറും സ്ഥിതി ചെയ്യുന്നു.
സൈഹ- ജില്ലാ ആസ്ഥാനം
ഐസ്വാളും ലുങ്ലായും കഴിഞ്ഞാല് മിസോറാമിലെ ഏറ്റവും വലിയ പട്ടണമാണ് സൈഹ. പ്രദേശിക ഭാഷയായ മാരായിലെ സിയാഹാ എന്ന വാക്കില് നിന്നാണ് സൈഹ എന്ന വാക്ക് രൂപപ്പെട്ടിരിക്കുന്നത്. ആന എന്നര്ത്ഥമുള്ള സൈ, പല്ലുകള് എന്ന് അര്ത്ഥമുള്ള ഹാ എന്നീ വാക്കുകളില് നിന്നാണ് സൈഹയുടെ ജനനം. ആനയുടെ പല്ലുകള് എന്നാണ് ഈ വാക്കിന്റെ അര്ത്ഥം. ഇവിടെ നിന്ന് ആനകളുടെ പല്ലുകള് ധാരാളമായി കിട്ടിയിട്ടുണ്ടെന്നും അങ്ങനെ ഈ പേര് ലഭിച്ചെന്നുമാണ് വിശ്വാസം. മാറാ വിഭാഗവും മ്യാന്മര്കാരുമാണ് ഇവിടെ കൂടുതലായി അധിവസിക്കുന്നത്.
പലാ ടിപോ തടാകം, സൈകോ, മ്വാമാ മല എന്നിവയാണ് സൈഹയിലെ പ്രധാന ആകര്ഷണങ്ങള്.
എങ്ങനെ എത്തിച്ചേരാം
മിസോറാമിന്റെ തലസ്ഥാനമായ ഐസ്വാളില് നിന്ന് 305 കിലോമീറ്റര് അകലെയാണ് സൈഹ സ്ഥിതി ചെയ്യുന്നത്. ദേശീയപാത 54 സൈഹയുടെ ജീവനാഡിയാണ്. സഞ്ചാരികള്ക്ക് റോഡ് മാര്ഗം സൈഹയില് എത്താം. ഐസ്വാളില് നിന്ന് സംസ്ഥാന സര്ക്കാരിന് കീഴിലുള്ള ധാരാളം ബസുകള് ഇവിടേക്ക് സര്വ്വീസ് നടത്തുന്നുണ്ട്.
കാലാവസ്ഥ
വര്ഷം മുഴുവന് വളരെ സുഖകരമായ കാലാവസ്ഥയാണ് സൈഹയില് അനുഭവപ്പെടുന്നത്. വേനല്ക്കാലത്ത് കടുത്ത ചൂട് അനുഭവപ്പെടാറില്ല. ശക്തമായ മഴ ലഭിക്കുന്ന സൈഹയിലെ ശീതകാലവും സുഖകരമാണ്.