ഒട്ടേറെ മനോഹരമായ വിനോദസഞ്ചാരകേന്ദ്രങ്ങളുള്ള സംസ്ഥാനമാണ് മഹാരാഷ്ട്ര. മഹാരാഷ്ട്രയുടെ ടൂറിസം മാപ്പ് വൈവിധ്യം നിറഞ്ഞതാണ്. ചില ഭാഗങ്ങള് ചരിത്രപരമായി പ്രത്യേകതയുള്ളതാണെങ്കില് മറ്റുചിലത് മനോഹരമായ തീരദേശങ്ങളും ഇനിയും ചിലത് മികച്ച ഹില് സ്റ്റേഷനുകളുമാണ്. ചിലതാവട്ടെ സംസ്കാരവൈവിധ്യങ്ങളെ ഉള്ക്കൊള്ളുന്ന നഗരങ്ങളും ചിലത് വളരെ വ്യത്യസ്തമായ ഗ്രാമജീവിതാനുഭവങ്ങളുടെ നേര്ക്കാഴ്ചകളുമാണ് നല്കുന്നത്. മഹാരാഷ്ട്രയിലെ താനെ ജില്ലയിലെ സജന് എന്ന സ്ഥലം നല്ലൊരു വിനോദസഞ്ചാരകേന്ദ്രമാണ്.
മുംബൈ നഗരത്തില് നിന്നും 113 കിലോമീറ്റര് അകലത്തില് കിടക്കുന്ന ഈ ചെറിയ നഗരത്തെ സാജന് എന്നു പറയാറുണ്ട്. വനങ്ങളും പഴത്തോട്ടങ്ങളുമെല്ലാം ചേര്ന്നൊരുക്കുന്ന മനോഹരമായ പ്രകൃതിയാണ് സജന്റെ ഒരു പ്രത്യേകത. മറ്റൊന്ന് ഇതിന്റെ ചരിത്രപരമായ പ്രാധാന്യമാണ്. ചിക്കു(സപ്പോട്ട)വും മാവുമാണ് ഇവിടുത്തെ പ്രധാന കൃഷി. പുരാതന ഗ്രീക്കിലെ ഗണിതശാസ്ത്രജ്ഞനും ചിന്തകനുമെല്ലാമായിരുന്നു ക്ലോഡിയസ് ടോണമിയുടെ രേഖകളില് സജനെക്കുറിച്ച് പരാമര്ശമുണ്ടത്രേ. ഭോജ് സാമ്രാജ്യകാലത്തുണ്ടാക്കിയ കൊഹോജ് കോട്ടയും മറ്റും സജനില് കാണാം. 1530ല് പോര്ച്ചുഗീസുകാര് വന്ന് അധികാരം പിടിച്ചെടുത്തതോടെ സജന്റെ ടാന മയാംബുവെന്ന് അറിയപ്പെടാന്തുടങ്ങി. 1300 മുതല് 1660വരെയുള്ള കാലഘട്ടത്തില് സജന് മുസ്ലീം സാമ്രാജ്യത്തിന്റെ ഭാഗമായിരുന്നു.
1660ല് മറാത്ത രാജാക്കന്മാര് സജന് പിടിച്ചെടുക്കുകയും 1800വരെ സ്വന്തം അധീനതയിലാക്കിഭരിയ്ക്കുകയും ചെയ്തു. പിന്നീട് ഈ സ്ഥലം ബ്രിട്ടീഷുകാരുടെ കയ്യിലായി. മുംബൈ നഗരവുമായി അടുത്തുകിടക്കുന്നതുകൊണ്ടുതന്നെയാണ് സജന് വിനോദസഞ്ചാരകേന്ദ്രമെന്ന രീതിയില് ശ്രദ്ധിക്കപ്പെട്ടത്. ഇപ്പോള് രാജ്യത്തിന്റെ പലഭാഗത്തുനിന്നും സഞ്ചാരികള് ഇവിടെ എത്തുന്നുണ്ട്.
പ്രകൃതിസൗന്ദര്യാരാധകര്ക്ക് കാണാനായി പലുസ വെള്ളച്ചാട്ടം, മൊഹോ ഖുര്ദ് അണക്കെട്ട് തുടങ്ങി ഒട്ടേറെ സ്ഥലങ്ങളുണ്ട്. പലുസ വെള്ളച്ചാട്ടത്തിന്റെ ഉയരം 60 അടിയാണ്. വേനലിലും വര്ഷത്തിലുമെല്ലാം ഒരുപോലെ കാണാന് കഴിയുന്ന വെള്ളച്ചാട്ടമാണിത്. ദി ടൈഗര് കേവ്സ്, കൊഹോജ് ഹില് ഫോര്ട്ട് എന്നിവയാണ് സജനിലെ ചരിത്രപ്രാധാന്യമുള്ള സ്ഥലങ്ങള്. പേഷ്വ ക്ഷേത്രം, മഹാലക്ഷ്മി ക്ഷേത്രം എന്നിവയാണ് ഇവിടുത്തെ പ്രധാന ഹൈന്ദവ ക്ഷേത്രങ്ങള്. വര്ഷത്തില് ഏത് സമയത്തും യാത്രചെയ്യാവുന്ന സ്ഥലമാണ് സജന്. വിമാനമാര്ഗ്ഗവും റെയില്, റോഡുമാര്ഗ്ഗവുമെല്ലാം എളുപ്പം എത്തിച്ചേരാന് കഴിയുന്ന സ്ഥലം കൂടിയാണിത്.