കര്‍ണാടകയിലെ മാണ്ഡ്യ ജില്ലയിലാണ് ശിവാനസമുദ്രമെന്നും ശിവസമുദ്രമെന്നും അറിയപ്പെടുന്ന പ്രശസ്ത പിക്‌നിക് സ്‌പോട്ട്. പുണ്യനദിയായ കാവേരിയിലാണ് ശിവന്റെ കടല്‍ എന്നര്‍ത്ഥം വരുന്ന ശിവാനസമുദ്രമെന്ന സുന്ദരദ്വീപ് നിലകൊള്ളുന്നത്.

ദ്വീപുകള്‍, വെള്ളച്ചാട്ടങ്ങള്‍

ലോകത്തെ പ്രമുഖ നൂറ് വെള്ളച്ചാട്ടങ്ങളിലൊന്നായി കണക്കാക്കപ്പെടുന്ന ശിവാനസമുദ്രത്തിലെ പ്രധാന ആകര്‍ഷണവും മനോഹരമായ ഈ വെള്ളച്ചാട്ടം തന്നെയാണ്. ശിവസമുദ്രദ്വീപിന് അഞ്ചുകിലോമീറ്റര്‍ നീളവും ഒരു കിലോമീറ്റര്‍ വീതിയുമുണ്ട്. ദ്വീപിന്റെ അവസാനതീരത്ത് കാവേരിയുടെ രണ്ടു കൈവഴികളും ഇരുനൂറടി താഴേക്കു വീണു ഒന്നിച്ചുചേരുന്നു. മലയിടുക്കുകളിലൂടെ പോകുന്ന കാവേരി നദിയുടെ ശക്തി വളരെയധികം വര്‍ദ്ധിക്കുകയും പിന്നീട് ഊക്കോടെ പാറയില്‍ വന്നിടിക്കുന്ന നദി വളരെ ഉയരത്തിലേയ്ക്ക് പൊങ്ങുകയും ചെയ്യുന്നു. ഈ ജലപാതങ്ങളിലൊന്നിന് ഗഗന ചുക്കി എന്നും മറ്റേതിന് ഭരചുക്കി എന്നുമാണ് പേര്. മനോഹരമായ വെള്ളച്ചാട്ടമാണ് ഇത്. ഇവിടെ പടിഞ്ഞാറുള്ള നദിയെ ഗഗനചുക്കി എന്നും കിഴക്ക് പല പിരിവുകളുള്ള ഭാഗത്തെ ഭരചുക്കി എന്നും എന്നും വിളിക്കുന്നു.

ശിവാനസമുദ്രം വാച്ച് ടവറിനുമുകളില്‍ നിന്നോ അല്ലെങ്കില്‍ ദര്‍ഗ ഹസ്രത്ത് മര്‍ദെയ്ന്‍ ഗെയ്ബിലെ വ്യൂപോയിന്റില്‍ നിന്നോ ഗഗനചുക്കി വെള്ളച്ചാട്ടത്തിന്റെ വിശാലമായ ഒരു ദൃശ്യം കാണാവുന്നതാണ്. ഗഗനചുക്കി വെള്ളച്ചാട്ടത്തില്‍നിന്നും ഒരുകിലോമീറ്റര്‍ ദൂരത്തായാണ് ഭരചുക്കി വെള്ളച്ചാട്ടം. ഏഷ്യയിലെ ആദ്യത്തെ ഹൈഡ്രോ ഇലക്ട്രിക് പവര്‍ സ്റ്റേഷന്‍ എന്ന ഖ്യാതി കൂടിയുണ്ട് പുണ്യ നഗരമായ ശിവാനസമുദ്രത്തിന്. പുരാതന ക്ഷേത്രങ്ങള്‍ക്ക് പേരുകേട്ട ശിവാനസമുദ്രത്തിലെ വൈദ്യുതനിലയം കോലാറിലെ സ്വര്‍ണഘനികളിലെ വൈദ്യുതാവശ്യങ്ങള്‍ നിറവേറ്റുന്നതിനുവേണ്ടിയാണ് നിര്‍മിക്കപ്പെട്ടത്.  ജൂലൈ മുതല്‍ ഒക്‌ടോബര്‍ വരെയുളള മാസങ്ങളാണ് ശിവാനസമുദ്രം സന്ദര്‍ശിക്കാന്‍ മികച്ച സമയം. ബാംഗ്ലൂരടക്കമുള്ള നഗരങ്ങളില്‍ നിന്നും യാത്രാസൗകര്യങ്ങളും വേണ്ടുവോളമുണ്ട് ശിവാനസമുദ്രത്തിലേക്ക്.