സിബ്സാഗര് പൊയ്കയുടെ തീരത്തുള്ള ശിവ്ടോല് ഇന്ത്യയിലെ ഏറ്റവും ഉയരംകൂടിയ ശിവക്ഷേത്രമാണ്. അഹോം രാജാവായിരുന്ന സ്വര്ഗ്ഗദേവ് സിബസിങയുടെ രാജ്ഞി ബര് രാജാ അംബിക 1734 ലാണ് ഇത് പണിതത്. ഭൂനിരപ്പില് നിന്ന് 195 അടി(59 മീറ്റര് ) ഉയരമുള്ള ഈ ക്ഷേത്രം ഇന്ത്യയിലെ തന്നെ ഏറ്റവും ഉയരമുള്ള ശിവക്ഷേത്രമായി ഗണിക്കപ്പെടുന്നു. എട്ടടി ഉയരമുള്ള ഒരു സുവര്ണ്ണ താഴികക്കുടം ക്ഷേത്രത്തിന്റെ ശീര്ഷത്തില് കിരീടസമാനമായ് പ്രതിഷ്ഠിച്ചിട്ടുണ്ട്. അഹോം രാജകീയതയുടെ ഉജ്ജ്വലമായ കരകൌശല വേലയ്ക്കുള്ള മകുടോദാഹരണമാണ് ഈ താഴികക്കുടം.
ശിവരാത്രി വേളയില് എണ്ണമറ്റ സഞ്ചാരികള് നാടിന്റെ വിവിധ ഭാഗങ്ങളില് നിന്ന് ഇവിടെ എത്തിച്ചേരാറുണ്ട്. ഈ അവസരങ്ങളില് ക്ഷേത്രാങ്കണത്തില് ഒരു മഹാമേള തന്നെ അരങ്ങേറാറുമുണ്ട്. ശിവടോലിന് സമാന്തരമായി നിലകൊള്ളുന്ന വിഷ്ണുടോലും ദേവിടോലും ഒരുപോലെ ഇവിടെയെത്തുന്ന സഞ്ചാരികളുടെ ഹൃദയം കവരും. അഹോം ഭരണകാലത്ത് ഉപയോഗിച്ചിരുന്ന ഇരുമ്പ് നിര്മ്മിതമായ പീരങ്കികളും ക്ഷേത്രസമുച്ചയത്തിനകത്ത് സന്ദര്ശകര്ക്ക് കാണാം.