ശിവകാശി എന്ന സ്ഥലം കരിമരുന്ന് ഉത്പന്നങ്ങളുടെയും, തീപ്പെട്ടി വ്യവസായത്തിന്റെയും പേരില് ഏറെ പ്രശസ്തമാണ്. തമിഴ്നാട്ടിലെ വിരുദനഗര് ജില്ലയിലാണ് ശിവകാശി സ്ഥിതി ചെയ്യുന്നത്. ക്ഷേത്രങ്ങളുടെ സാന്നിധ്യത്താലും, വര്ണാഭമായ ഉത്സവങ്ങളാലും ഈ സ്ഥലം ടൂറിസ്റ്റുകള്ക്ക് പ്രിയപ്പെട്ടതാണ്.
ശിവകാശിയിലെയും അടുത്ത സ്ഥലങ്ങളിലെയും കാഴ്ചകള്
ശ്രീ ഭദ്രകാളിയമ്മന് ക്ഷേത്രം, പരാശക്തി മാരിയമ്മന് ക്ഷേത്രം, തിരുത്തങ്കല്, ശ്രീ വെങ്കടാചലപതി, മാരിയമ്മന് കോവില്, അയ്യനാര് വെള്ളച്ചാട്ടം, മുതലിയാര് ഊത്ത്, പിലവാക്കല് ഡാം, നെന്മേനി, കുള്ളൂര് ശാന്തൈ റിസര്വോയര്, വെമ്പക്കോട്ടൈ എന്നിവ ഇവിടുത്തെ പ്രധാന കാഴ്ചകളാണ്. 600 ഓളം വര്ഷത്തെ ചരിത്രം ശിവകാശിക്കുണ്ട്. സൗത്ത് മധുരൈ ഭരണാധികാരിയായിരുന്ന ഹരികേസരി പരക്കിരാമ പാണ്ഡ്യനാണ് ശിവകാശിയിലേക്ക് കാശി(ഇപ്പോഴത്തെ വാരാണസി)യില് നിന്ന് ശിവലിംഗം കൊണ്ടുവന്നത്.
ശിവകാശി എന്ന പേര് വന്നത് 'കാശിയില് നിന്ന് വന്ന ശിവലിംഗം' എന്ന വാക്യത്തില് നിന്നാണ്. പില്ക്കാലത്ത് പാണ്ഡ്യ രാജാവും, തിരുമലൈ നായ്ക്കര് രാജാവും ഈ ശിവ ക്ഷേത്രം വിപുലീകരിച്ചു. പിന്നീട് ഇവിടം കാശി വിശ്വനാഥ സ്വാമി ക്ഷേത്രം എന്നറിയപ്പെട്ടു. ഇന്ന് ഭക്തരെയും, ടൂറിസ്റ്റുകളെയും ഒരേ പോലെ ആകര്ഷിക്കുന്ന സ്ഥലമാണ് ഇത്.
ശിവകാശിയിലെ കാലാവസ്ഥ
വര്ഷം മുഴുവനും ചൂടുള്ള വരണ്ട കാലാവസ്ഥയാണ് ശിവകാശിയിലേത്. ഏപ്രില് മുതല് ജൂണ് വരെയാണ് ചൂട് ഏറ്റവും കൂടുതല് അനുഭവപ്പെടുക. വേനല്ക്കാലത്ത് ശിവകാശി സന്ദര്ശിക്കുന്നത് അത്ര അനുയോജ്യമല്ല. ഒക്ടോബര് മുതല് മാര്ച്ച് വരെയാണ് ഇവിടം സന്ദര്ശിക്കാന് യോജിച്ച കാലം.
എങ്ങനെ ശിവകാശിയിലെത്താം?
ബസിലും, ട്രെയിനിലും സുഗമമായി തമിഴ്നാടിന്റെ മറ്റ് ഭാഗങ്ങളില് നിന്ന് ശിവകാശിയിലെത്തിച്ചേരാം. ശിവകാശിക്ക് 74 കിലോമീറ്റര് അകലെയാണ് മധുരൈ എയര്പോര്ട്ട്. ഇതാണ് ഏറ്റവും സമീപസ്ഥമായ വിമാനത്താവളം.