Click it and Unblock the Notifications
മഹാരാഷ്ട്രയിലെ മിനി കാശ്്മീര്‍ എന്ന് വിളിക്കപ്പെടുന്ന തപോളയിലേക്ക് മഹാബലേശ്വറില്‍ നിന്നും 25 കിലോമീറ്റര്‍ ദൂരമേയുള്ളൂ. അവധിക്കാലം ചെലവഴിക്കാനെത്തുന്ന പ്രകൃതിസ്‌നേഹികളുടെ തിരക്കാണ് തപോളയുടെ പ്രത്യേകത. ഇരവശങ്ങളിലേക്കും മനോഹരമായ കാഴ്ചകള്‍ ആസ്വദിച്ചുകൊണ്ടാണ് തപോളയിലേക്കുള്ള പാതകള്‍. സാഹസികരായ സഞ്ചാരികളെയും ട്രക്കിംഗ് പ്രിയരെയുമാണ് തപോള ഏറെ സന്തോഷിപ്പിക്കുക.
തപോള - അഗ്രോ ടൂറിസത്തിന് പറ്റിയ നാട്
ഉല്ലാസകരമായ പ്രകൃതിയും മലിനീകരണമേതുമില്ലാത്ത അന്തരീക്ഷവുമാണ് തപോളയിലെ പ്രധാന ആകര്ഷണങ്ങള്. കൂടുതല്‍ സമയം ഇവിടെ ചെലവഴിക്കാനാഗ്രഹിക്കുന്ന സഞ്ചാരികള്‍ക്കായി നിരവധി ക്യാംപ് സൈറ്റുകളും ഇവിടെയുണ്ട്. വാട്ടര്‍ സ്‌പോര്‍ട്‌സ് ഇഷ്ടപ്പെടുന്ന ആളുകളുടെയും പ്രിയപ്പെട്ട കേന്ദ്രമാണിവിടം. ശിവസാഗര്‍ ലേക്കിലൂടെ 90 കിലോമീറ്ററോളം നീണ്ട വാട്ടര്‍ബോഡിയാണ് ഇവിടെ സഞ്ചാരികളെ കാത്തിരിക്കുന്നത്. കയാക്കിംഗ്, വാട്ടര്‍ സ്‌കൂട്ടര്‍, മോട്ടോര്‍ ബോട്ട്‌സ് എന്നിങ്ങനെ പോകുന്നു ഇവിടത്തെ വെള്ളത്തിലെ കളികള്‍.
വസോട്ട കോട്ടയിലേക്കുള്ള സാഹസികമായ ട്രക്കിംഗാണ് ഇവിടത്തെ ഏറ്റവും വലിയ ആകര്‍ഷണീയത എന്ന് പറയേണ്ടിവരും. ട്രക്കിംഗ് പ്രിയര്‍ക്ക് ഒഴിച്ചുകൂടാനാവാത്ത ട്രക്കിംഗ് അവസരമാണ് സാഹസികവും ദുര്‍ഘടവുമായ വസോട്ട കോട്ട നല്‍കുന്നത്. സാധാരണ ഗതിയില്‍ ബോട്ടിലാണ് സഞ്ചാരികള്‍ കോട്ടയുടെ പരിസരത്തെത്തുന്നത്.
ഫോറസ്റ്റ് അധികൃതരില്‍ നിന്നും മുന്‍കൂര്‍ അനുമതി വാങ്ങി മാത്രമേ ഇവിടെ ട്രക്കിംഗ് സാധ്യമാകൂ. സാഹസികത വേണ്ട ഇനി വെറുതെ നടന്നാല്‍ മതി എന്നാണെങ്കില്‍ സ്‌ട്രോബറിത്തോട്ടങ്ങളുടെയും നഴ്‌സറിയുടെയും പ്രകൃതിയെ തൊട്ടുകൊണ്ട് ഇടയിലൂടെ ഒരു നടത്തയും സാധ്യമാണ്. ഏതാണ്ട് 150 ഓളം വ്യത്യസ്ത ഇനങ്ങളില്‍പ്പെട്ട പൂക്കള്‍ നിറഞ്ഞ കാസ് പ്ലേറ്റോയാണ് ഇവിടെ കണ്ടിരിക്കേണ്ട മറ്റൊരു കാഴ്ച.
