കേരളത്തിലെ വിനോദസഞ്ചാര കേന്ദ്രങ്ങളില് സഞ്ചാരികളെ ഏറ്റവും കൂടുതല് വിസ്മയിപ്പിക്കുന്ന സ്ഥലമാണ് മൂന്നാര്. മൂന്നാറിലെ ഓരോ വളവ് തിരിവുകളിലും മലമടക്കുകളിലും ഒളിഞ്ഞ് കിടക്കുന്നത് അത്ഭുതങ്ങള് മാത്രമാണ്.
മൂന്നാറില് എത്തിച്ചേരുന്ന സഞ്ചാരികളില് ബഹുഭൂരിപക്ഷവും സന്ദര്ശിക്കുന്ന സ്ഥലമാണ് ടോപ്സ്റ്റേഷന്. ടോപ്പ് സ്റ്റേഷന് സന്ദര്ശിച്ചില്ലെങ്കില് മൂന്നാര് സന്ദര്ശനം പൂര്ണമാകില്ല. മൂന്നാര് ടൗണില് നിന്ന് 35 കിലോമീറ്റര് അകലെയായി സമുദ്രനിരപ്പില് നിന്ന് 1700 മീറ്റര് ഉയരത്തിലായി തമിഴ്നാട്ടിലെ തേനി ജില്ലയുടെ ഭാഗമായാണ് ടോപ്പ് സ്റ്റേഷന് സ്ഥിതി ചെയ്യുന്നത്.
മൂന്നാറില് നിന്ന് ടോപ് സ്റ്റേഷനിലേക്കുള്ള യാത്രയില് മാട്ടുപെട്ടി ഡാം, എക്കോ പോയിന്റ്, കുണ്ടള ഡാം എന്നീ സ്ഥലങ്ങള് സന്ദര്ശിക്കാവുന്നതാണ്. മൂന്നാറില് നിന്ന് ടോപ്സ്റ്റേഷന് വരെ വാഹനങ്ങളില് യാത്ര ചെയ്യാന് പറ്റിയ നല്ല റോഡുമുണ്ട്.
മൂന്നാറിനേക്കുറിച്ച് നിങ്ങള് അറിയാന് ആഗ്രഹിക്കുന്ന കാര്യങ്ങള് വായിക്കാം
മലമുകളിലെ റെയില്വെ സ്റ്റേഷന്
ബ്രിട്ടീഷുകാരുടെ കാലത്ത് ഇവിടെയുണ്ടായിരുന്ന റെയില്വെ സ്റ്റേഷനില് നിന്നാണ് ടോപ് സ്റ്റേഷന് ആ പേര് ലഭിച്ചത്. കണ്ണന്ദേവന് മലമുകളിലെ തേയിലത്തോട്ടങ്ങളില് വളരുന്ന തേയിലകള് ശേഖരിച്ച് മൂന്നാറിലും മാട്ടുപ്പെട്ടിയിലും എത്തിച്ചിരുന്നത് ഈ റെയില്വേയിലൂടെയായിരുന്നു. മൂന്നാറില് നിന്ന് റോപ്പ് വേ വഴിയായിരുന്നു അടിവാരത്തേക്ക് തേയില എത്തിച്ചത്.
ട്രെക്കിംഗ്
ടോപ് സ്റ്റേഷനില് നിന്ന് സെന്ട്രല് സ്റ്റേഷന് വഴി കുരങ്ങാണിയിലേക്ക് ഒരു ട്രെക്കിംഗ് പാതയുണ്ട്. ടോപ് സ്റ്റേഷനില് എത്തിച്ചേരുന്ന സഞ്ചാരികള് ഇതുവഴി ട്രെക്കിംഗ് നടത്താറുണ്ട്. മൈന എന്ന തമിഴ് സിനിമയുടെ ഷൂട്ടിംഗ് ലൊക്കേഷനാണ് കുരങ്ങാണി.
അമലാപോള് അലഞ്ഞ് നടന്ന കുരങ്ങാണി
മൂന്നാറില് നിന്ന് ടോപ് സ്റ്റേഷനിലേക്കുള്ള യാത്രയിലെ കാഴ്ചകള് കാണാം
ചിത്രങ്ങള്ക്ക് കടപ്പാട്: ദിനേഷ് കുമാര്