പാറക്കല്ലുകള്‍ കൊണ്ടുപണിതതിനാലാണ് ഇതിനെ കല്ലുബസതിയെന്ന് വിളിയ്ക്കുന്നത്. വലിയ മുറ്റത്തോടുകൂടിയാണ് ഇത് പണിതിരിക്കുന്നത്. അതിനാലാണ് വലിയ ബസതി എന്ന അര്‍ത്ഥത്തില്‍ ദൊഡ്ഡ ബസതിയെന്നും ഇതിനെ വിളിയ്ക്കുന്നത്.  ശാന്തിനാഥന്റെ അഞ്ചടി ഉയരത്തിലുള്ള പ്രതിമ ഇവിടെ കാണാം. ഈ പ്രതിമയുടെ രണ്ടുവശത്തുമായി യക്ഷി മഹാമാനസി, യക്ഷ ഗരുഡ എന്നീ കല്‍പ്രതിമകളും കാണാം.

ബസതിയ്ക്കുള്ളിലായി മറ്റ് രണ്ട് തീര്‍ത്ഥങ്കരന്മാരായ ചന്ദ്രനാഥന്റെയും മഹാവീരന്റെയും പ്രതിമകളും സ്ഥാപിച്ചിട്ടുണ്ട്. സൂക്ഷിച്ചുനോക്കിയാല്‍ പ്രതിമകളുടെ പാദഭാഗത്തായി ലിഖിതങ്ങള്‍ കാണാം. ഹരിപീഠമെന്നാണ് ഈ പാദഭാഗത്തെ പറയുന്നത്. കല്ലുബസതിയുടെ പ്രവേശനകവാടത്തിന്റെ പുറംഭാഗം പണിതിരിക്കുന്നത് സ്ലേറ്റു കല്ലിലാണ്. ക്ഷേത്രത്തിന്റെ ശ്രീകോവിലിനുള്ളില്‍ സരസ്വതീ ദേവിയുടെയും പത്മാവതി ദേവിയുടെയും പ്രതിഷ്ഠകളുമുണ്ട്. ഈ രണ്ട് ദേവതകളുടെയും പ്രതിഷ്ഠയുള്ളതിനാല്‍ ഇതിനെ അമ്മാനവരു ബസതി യെന്നും വിളിയ്ക്കുന്നുണ്ട്.