എത്ര കണ്ടാലും മതിയായില്ലെന്ന തോന്നല് ഉള്ളിലുണ്ടാക്കുന്നതാണ് ഹിമാചല് പ്രദേശിന്റെ ഭൂപ്രകൃതിയുടെ പ്രത്യേകത. എവിടെ നോക്കിയാലും കാണുന്ന ഗിരിശൃംഗങ്ങള് തികച്ചും വേറിട്ടൊരു അനുഭവം തന്നെയാണ് സമ്മാനിയ്ക്കുക. മഞ്ഞുകാലത്താണെങ്കില് മഞ്ഞുപുതച്ചുനില്ക്കുന്ന മലനിരകളും സൂചിമരക്കാടുകളുമെല്ലാം ചേര്ന്ന് ഒരുക്കുന്ന കാഴ്ചയുടെ വസന്തമാണ് ഹിമാചല് പ്രദേശ്.
ഹിമാചലിലെ സോളന് ജില്ലയിലെ ഒരു പ്രധാന ടൂറിസ്റ്റ് കേന്ദ്രമാണ് ബരോഗ്. സമുദ്രനിരപ്പില് നിന്നും 6000 അടി ഉയരത്തില് സ്ഥിതിചെയ്യുന്ന ബരോഗ് ഒരു ചെറു ഗ്രാമമാണ്. ഇരുപതാം നൂറ്റാണ്ടിന്റെ ആദ്യകാലത്ത് നാരോ ഗേജ് റെയില്പാതയായ കല്ക്ക-ഷിംല പാത നിര്മ്മിച്ചതോടെയാണ് ഇവിടെ ആള്ത്താമസം ആരംഭിച്ചത്. മലതുരന്നുണ്ടാക്കിയ വമ്പന് ടണലിന്റെ ശില്പിയായ ബരോഗ് എന്ന എന്ജിനീയറുടെ പേരാണ് ഈ ഗ്രാമത്തിന്. തുരങ്കത്തിന്റെ പണി വേഗത്തിലാക്കാനായി ബരോഗ് ജോലിക്കാരോട് മലയുടെ രണ്ട് ഭാഗത്തുനിന്നും തുരങ്കം കുഴിയ്ക്കാന് ആവശ്യപ്പെട്ടു. അവസാനം ബരോഗിന്റെ കണക്കുകൂട്ടലുകള് തെറ്റുകയും രണ്ടുഭാഗത്തുനിന്നും തുരന്നുവന്ന തുരങ്കം കൂട്ടിമുട്ടിയ്ക്കാനാവാതെ വരുകയും ചെയ്തു. ഇതിനെത്തുടര്ന്ന് ബ്രിട്ടീഷ് സര്ക്കാര് ബരോഗിന് പിഴയിട്ടു.
ഇതേത്തുടര്ന്നുണ്ടായ മാനസികാഘാതത്തില് ബരോഗ് ആത്മഹത്യചെയ്യുകയായിരുന്നു. ടണലിന് സമീപത്താണ് എന്ജിനീയറുടെ മൃതദേഹം സംസ്കരിച്ചത്. തുടര്ന്നിങ്ങോട്ടാണ് ഈ ഗ്രാമം ബരോഗ് എന്ന് അറിയപ്പെടാന് തുടങ്ങിയത്. ഈ സംഭവത്തിന് ശേഷം തുരങ്കത്തിന്റെ പണി തീര്ത്തത് എസ്സ് എസ് ഹാരിങ്ടണ് എന്ന റെയില്വേ ചീഫ് എന്ജിനീയറായിരുന്നു. കല്ക്ക-ഷിംല റെയില്വേ ലൈനിലെ ഏറ്റവും ദൈര്ഘ്യമേറിയ തുരങ്കങ്ങളില് ഒന്നാണിത്, 1143.61 മീറ്ററാണ് തുരങ്കത്തിന്റെ നീളം. ലോകത്തിലെ ഏറ്റവും ഋജുവായ തുരങ്കമെന്ന ഖ്യാതിയും ഇതിനുതന്നെയാണ്.
ചണ്ഡിഗഡില് നിന്നും ഷിംലയ്ക്ക് പോകുന്നവഴിയില് കല്ക്ക-ഷിംല ഹൈവേയില് 60 കിലോമീറ്റര് പിന്നിട്ട് കഴിഞ്ഞാല് ബരോഗ് ആയി. ചൂര് ചാന്ദ്നി പീക്ക് ബോരഗിലെ ഏറ്റവും പ്രധാനപ്പെട്ട സ്ഥലങ്ങളില് ഒന്നാണ്. ദഗ്ഷായ്, വിശാല് ശിവക്ഷേത്രം, ഡൊലോന്ജി ബോന് മൊണാസ്ട്രി, രേണുക തടാകം എന്നിവയാണ് ഇവിടുത്തെ മറ്റ് പ്രധാന ആകര്ഷണകേന്ദ്രങ്ങള്. ഷൊലോനി ദേവി ക്ഷേത്രം, കുട്ടികളുടെ പാര്ക്ക്, ജവഹര് പാര്ക്ക് എന്നിവയും ഏറെ സഞ്ചാരികള് സന്ദര്ശിയ്ക്കുന്ന സ്ഥലങ്ങളാണ്.
ബരോഗിന് അടുത്തുള്ള വിമാനത്താവളങ്ങള് ചണ്ഡിഗഡിലും ഷിംലയിലുമാണ്. ഷിംലയിലെ വിമാനത്താവളത്തിലേയ്ക്ക് ദില്ലി, കുളു എന്നിവിടങ്ങളില് നിന്നും വിമാനസര്വ്വീസുകളുണ്ട്. ചണ്ഡിഗഡ് വിമാനത്താവളത്തിലേയ്ക്ക് ഇന്ത്യയിലെ പ്രമുഖ നഗരങ്ങളില് നിന്നെല്ലാം വിമാനങ്ങള് എത്തുന്നുണ്ട്. ബരോഗില് റെയില്വേ സ്റ്റേഷനുണ്ട് അതിനാല് തീവണ്ടിമാര്ഗ്ഗമുള്ള യാത്രയും ബുദ്ധിമുട്ടില്ലാത്തതാണ്. ദില്ലി, ചണ്ഡിഗഡ്, കസൗലി, സോലന്, ഷിംല എന്നിവിടങ്ങളില് നിന്നും ഇങ്ങോട്ട് ബസ് സര്വ്വീസുമുണ്ട്.