ഉത്തരാഖണ്ഡിലെ ഒരു ചെറിയ ഗ്രാമമാണ് ഹര്സില്. സമുദ്രനിരപ്പില് നിന്ന് 2620 മീറ്റര് ഉയരത്തിലാണ് ഹര്സില് സ്ഥിതി ചെയ്യുന്നത്. ഉത്തരകാശിയില് നിന്ന് 72 കിലോമീറ്റര് അകലെയുള്ള ഈ ഗ്രാമത്തിനെ തൊട്ടുരുമി ഭഗീരഥി നദി ഒഴുകുന്നു.
സത്യയുഗത്തില് നദീദേവതമാരായ ഭഗീരഥിയും ജലന്ധരിയും തമ്മില് വാഗ്വാദം ഉണ്ടായി. രണ്ടുപേരില് ആര്ക്കാണ് കൂടുതല് പ്രാധാന്യം എന്നതായിരുന്നു തര്ക്കവിഷയം. ഇതുകണ്ട വിഷ്ണു ഭഗവാന് (ഹരി) ശിലാരൂപം പ്രാപിച്ച് ഇവരുടെ കോപം സ്വീകരിച്ചു എന്നുമാണ് വിശ്വാസം. ഈ വിശ്വാസത്തില് നിന്നാണ് ഈ ഗ്രാമത്തിന് ഹര്സില് അഥവാ ഹരിശില എന്ന പേര് ലഭിച്ചത്. ഈ സംഭവത്തിന് ശേഷം രണ്ട് നദികളും മുന്പത്തേതിനേക്കാള് ശാന്തമായാണ് ഒഴുകുന്നതെന്നും ഇവിടുത്തുകാര് വിശ്വസിക്കുന്നു.
നാല് പ്രമുഖ ഹിന്ദു തീര്ത്ഥാടന കേന്ദ്രങ്ങളില് ഒന്നായ ഗംഗോത്രിക്ക് സമീപമാണ് ഹര്സില് സ്ഥിതി ചെയ്യുന്നത്. ഇവിടെ പ്രശസ്തമായ നിരവധി വിനോദസഞ്ചാര കേന്ദ്രങ്ങളുണ്ട്. ഹര്സിലില് നിന്ന് 30 കിലോമീറ്റര് അകലെയുള്ള ഗംഗോത്രി ദേശീയ ഉദ്യാനം, മുഖ്ബാ ഗ്രാമം എന്നിവ അവയില് ചിലതാണ്. 1973ല് സ്ഥാപിതമായ ഡിഫന്സ് അഗ്രികള്ച്ചറല് റിസര്ച്ച് ലബോറട്ടറി സന്ദര്ശിക്കുന്നതിനും ധാരാളം സഞ്ചാരികള് ഹര്സിലില് എത്തുന്നുണ്ട്.
ഹര്സില് ഒരു ചെറിയ ഗ്രാമം ആയതിനാല് ഇവിടെ വിമാനത്താവളമോ റെയില്വെ സ്റ്റേഷനോ ഇല്ല. ഏറ്റവും അടുത്തുള്ള വിമാനത്താവളം ഡെറാഡമിലെ ജോളി ഗ്രാന്റ് എയര്പോര്ട്ടാണ്. ഋഷികേശാണ് ഏറ്റവും അടുത്ത് സ്ഥിതി ചെയ്യുന്ന റെയില്വെ സ്റ്റേഷന്. ഏപ്രില് മുതല് ജൂണ് വരെയും സെപ്റ്റംബര്, നവംബര് മാസങ്ങളിലുമാണ് ഇവിടെ സഞ്ചാരികള് കൂടുതലായി എത്തുന്നത്.