അസാമിലെ പ്രധാന നഗരങ്ങളില് ഒന്നാണ് ജോര്ഹട്ട് . സംസ്ഥാനത്തിന്റെ വടക്ക് ഭാഗത്ത് സ്ഥിതി ചെയ്യുന്ന ജോര്ഹട്ട് അപ്പര് ആസാമില് നിന്നും നാഗാലാന്ഡ് സംസ്ഥാനത്തേക്കുള്ള പ്രവേശന കവാടമാണ്. രണ്ട് എന്ന് അര്ത്ഥം വരുന്ന ജോര്, ചന്ത എന്നര്ത്ഥം വരുന്ന ഹട്ട് എന്നീ വാക്കുകളില് നിന്നുമാണ് ജോര്ഹട്ട് എന്ന പേര് നഗരത്തിനുണ്ടായത്. ഭഗ്ദോയി നദിയുടെ ഇരുകരകളിലായി ആഴ്ചയില് രണ്ട് ദിവസം ഉണ്ടായിരുന്ന ചൗകിഹട്ട്, മച്ചാര്ഹട്ട് എന്നീ ചന്തകള് പതിനെട്ടാം നൂറ്റാണ്ടില് ഈ സ്ഥലത്തിന്റെ പ്രത്യേകതയായിരുന്നു. അഹോം രാജാക്കന്മാരുടെ അവസാന തലസ്ഥാനമായിരുന്ന എന്നതും ജോര്ഹട്ടിന്റെ സവിശേഷതയാണ്. സമ്പന്നമായ അഹോം ഭരണകാലവുമായി ബന്ധിപ്പിക്കുന്ന വിവിധ ചരിത്രാശേഷിപ്പുകള് നഗരത്തിലിപ്പോഴുമുണ്ട്.
ജോര്ഹട്ട് വിനോദ സഞ്ചാരം- തേയില തോട്ടങ്ങള്
തേയില തോട്ടങ്ങളാല് പ്രശസ്തമാണ് ജോര്ഹട്ട്. ജോര്ഹട്ടിലും ചുറ്റുമായി 135 തേയില തോട്ടങ്ങളാണുള്ളത്. തേയില ഉത്പാദനത്തില് നഗരത്തെ മുന് നിരയിലെത്തിക്കാന് ഇത് കാരണമാകുന്നുണ്ട്. ജോര്ഹട്ടിന്റെ ചരിത്രത്തിന്ഡന്റെ ഭാഗം കൂടിയാണ്ഈ തേയില തോട്ടങ്ങള്. സിന്നമോറ ടീ എസ്റ്റേറ്റ് പോലുള്ള ചില തേയില തോട്ടങ്ങള് സന്ദര്ശിക്കാതെ ജോര്ഹട്ടിലേക്കുള്ള വിനോദ സഞ്ചാരം പൂര്ത്തിയാകില്ല. ലോകത്തിലെ ഏറ്റവും പഴയ തേയില ഗവേഷണ കേന്ദ്രമായ ടോക്ലൈ തേയില ഗവേഷണ കേന്ദ്രവും ജോര്ഹട്ടിന്റെ സൗന്ദര്യത്തിന്റെ ഭാഗമാണ്.
ജോര്ഹട്ടിലെ വിനോദ സഞ്ചാര കേന്ദ്രങ്ങള്
വിനോദ സഞ്ചാര കേന്ദ്രങ്ങളായി മാറിയിരിക്കുന്ന ജോര്ഹട്ടിലെ വിവിധ മൈദാമുകളെ (ശ്്മശാനഭൂമികള്) കുറിച്ച് പരാമര്ശിക്കാതെ ഇവിടുത്തെ വിനോദ സഞ്ചാരം പൂര്ണമാകില്ല. രാജ മൈദാം, ലചിത് മൈദാം എന്നിവിടങ്ങള് സന്ദര്ശിക്കുന്നത് ജോഹട്ടിന്റെ സാംസ്കാരിക പ്രതാപം എന്തായിരുന്നു എന്ന് മനസ്സിലാക്കാന് സഹായിക്കും. ഇവിടുത്തെ പുഖുറികള് അഥവ ജലസംഭരണികള് നഗരത്തിന്റെ ഭംഗി കൂട്ടുന്നുവയാണ്. കന്വാരി പുഖുറി, ഹദുലി പുഖുറി എന്നിവങ്ങനെ നിരവധി പുഖുറികള് നഗരത്തിന് ചുറ്റുമായുണ്ട്.
ജോര്ഹട്ട്- അസാമിന്റെ സാംസ്കാരിക തലസ്ഥാനം
സമ്പന്നമായ സംസ്കാരം കൊണ്ടും ജോര്ഹട്ട് വളരെ പ്രശസ്തമാണ്. സംഗീതത്തിന്റെയും സാഹിത്യത്തിന്റെയും രൂപത്തില് അഹോം സംസ്കാരത്തെ ഈ ചെറു നഗരം ഇപ്പോഴും സംരക്ഷിക്കുന്നു. അഹോം ഭരണത്തിന്റെ സമ്പന്നത സംരക്ഷിക്കുക മാത്രമല്ല അതില് ആധുനീകത കൂട്ടി ചേര്ക്കുകയും ചെയ്തിട്ടുണ്ട് ഈ നഗരം. അഹോമുകളുടെ അവസാന തലസ്ഥാനമായിരുന്ന ജോര്ഹട്ട് ആസ്സാമിലെ ബ്രിട്ടീഷുകാര്ക്കെതിരായുള്ള സമരകേന്ദ്രം കൂടിയായിരുന്നു. പ്രമുഖരായ സംഗീതജ്ഞര്, എഴുത്തുകാര്, ചരിത്രകാരന്മാര് എന്നിവരെ ലോകത്തിന് സംഭാവന ചെയ്തു കൊണ്ട് ജോര്ഹട്ട് അതിന്റെ സാംസ്കാരിക പ്രൗഢി തെളിയിച്ചിട്ടുണ്ട്. രാജ്യത്തെ സാഹിത്യത്തിനുള്ള പരമോന്നത ബഹുമതിയായ ജ്ഞാനപീഠം ആദ്യം ലഭിക്കുന്ന അസം എഴുത്തു കാരനായ ബീരേന്ദ്ര കുമാര് ഭട്ടാചാര്യ ജോര്ഹട്ട്കാരനാണ്. വിദ്യാഭ്യാസ രംഗത്തെ പ്രമുഖനായ കൃഷ്ണ കാന്ത ഹന്ദിക് ഇവിടെ നിന്നുള്ള ആളാണ്.
എങ്ങനെ എത്തിച്ചേരാം
അസ്സാമിന്റെയും രാജ്യത്തിന്റെയും മറ്റ് ഭാഗങ്ങളുമായി ദേശീയ പാതകള്, വിമാനത്താവളങ്ങള്, റെയില് വെസ്റ്റേഷനുകള് എന്നിവ വഴി മികച്ച രീതിയില് ജോര്ഹട്ട് ബന്ധപ്പെട്ടു കിടക്കുന്നു.