കാസര്കോട് മുതല് പാറശ്ശാല വരെ എന്നൊരു പ്രയോഗം തന്നെയുണ്ട് മലയാളത്തില്. സംഗതി മറ്റൊന്നുമല്ല, കേരളത്തിന്റെ ഒരറ്റം മുതല് മറ്റേയറ്റം വരെ എന്നര്ത്ഥമാക്കാനാണ് ആ പ്രയോഗം ഉപയോഗിക്കുന്നത്. അതേ, കേരളത്തിലെ ഏറ്റവും വടക്കേയറ്റത്തെ ജില്ലയാണ് കാസര്കോട്. ചരിത്രകുതുകികള്ക്ക് പ്രിയപ്പെട്ട, സംസ്കാരങ്ങളുടെ സംമഭൂമിയെന്ന് നിസംശയം വിളിക്കാവുന്ന കാസര്കോട്. ഒമ്പതും പതിനാലും നൂറ്റാണ്ടുകള്ക്കിടയില് കാസര്കോടെത്തിയ അറബികള് ഇവിടവുമായി കച്ചവട, സാംസ്കാരിക കൈമാറ്റങ്ങളിലേര്പ്പെട്ടിരുന്നു എന്നാണ് സൂചന. സംശയം വേണ്ട, വിനോദസഞ്ചാരഭൂപടത്തില് കാസര്കോടിന്റെ കീര്ത്തി മറുനാടുകളിലെത്തിക്കുന്നതില് പ്രധാനി ബേക്കല് കോട്ട തന്നെയാണ്.
നിരവധി മരങ്ങളുള്ള കാസര്കോടിന് ഏറ്റം പ്രിയപ്പെട്ട മരം കയ്പുനിറഞ്ഞ കാഞ്ഞിരമാണ്. മറ്റൊന്നും കൊണ്ടല്ല, കാഞ്ഞിരം എന്നര്ത്ഥം വരുന്ന കാസകര എന്ന വാക്കില്നിന്നാണ് കാസര്കോടിന് ഈ ലഭിച്ചതെന്നതുതന്നെ കാരണം. നെടുനീളന് കടല്ത്തീരങ്ങളും തിങ്ങിവളരുന്ന കേരവൃക്ഷങ്ങളും നിറഞ്ഞ കാസര്കോട് നിരവധി സാസ്കാരിക പ്രത്യേകതകളുള്ള മണ്ണുകൂടിയാണ്. ഗോവിന്ദ പൈ, പി കുഞ്ഞിരാമന് നായര്, കുട്ടമത്ത് തുടങ്ങിയ കവികളുടെയും എഴുത്തുകാരുടെയും പേരില് പ്രശസ്തമാണ് കാസര്കോട്.
തെയ്യമാണ് കാസര്കോടിന്റെ പെരുമയ്ക്ക് മറ്റൊരു കാരണം. കമ്പാള എന്നു വിളിക്കപ്പെടുന്ന കാളപ്പോരിനും കോഴിപ്പോരിനും ഇവിടെ വലിയ പ്രാധാന്യമുണ്ട്. ഹിന്ദു, മുസ്ലിം, കൃസ്ത്യന് മതവിഭാഗങ്ങള് സൗഹാര്ദ്ദത്തോടെ ഇവിടെ കഴിയുന്നു. മലയാളം, തുളു, കന്നഡ, കൊങ്കിണി, തമിഴ് എന്നിങ്ങനെ നിരവധി ഭാഷകള് കാസര്കോട്ടുകാര് സംസാരിക്കുന്നു. സംസ്കാരത്തിന്റെ കാര്യത്തിലെന്ന പോലെ തന്നെ കാസര്കോടിന്റെ കാലാവസ്ഥയും പ്രത്യേകതകള് നിറഞ്ഞതാണ്. കടുത്ത ചൂട്, കനത്ത മഴ, തണുപ്പ് ഇവയെല്ലാം കാസര്കോടന് കാലാവസ്ഥയിലുണ്ടാകും. നവംബര് മുതല് ജനുവരി അവസാനം വരെയാണ് ശീതകാലം.