Click it and Unblock the Notifications
ഗോവ - കര്‍ണാടക അതിര്‍ത്തിയിലെ മനോഹരമായ ഒരു കൊച്ചുഗ്രാമമാണ് നേര്‍സ. നഗരത്തിന്റെ തിരക്കുകളില്‍ നിന്നൊഴിഞ്ഞ് അവധിക്കാലം ചെലവഴിക്കാനെത്തുന്ന വിനോദസഞ്ചാരികള്‍ക്ക് പറ്റിയ ഇടമാണിത്. ലോകത്തെ ഏറ്റവും സമ്പന്നമായ ജൈവവൈവിദ്ധ്യ പ്രദേശങ്ങളിലൊന്നായ മഹദി താഴ്‌വരയ്ക്ക് സമീപമാണ് നേര്‍സ. വന്യമൃഗങ്ങളോട് ആഭമുഖ്യമുള്ളവര്‍ക്കും പക്ഷി നിരീക്ഷണത്തില്‍ താല്‍പര്യമുള്ളവര്‍ക്കും പ്രിയപ്പെട്ട ലക്ഷ്യസ്ഥാനമാണിത്.
വന്യമൃഗങ്ങളെ കാണാനും പക്ഷികളെ നിരീക്ഷിക്കാനും ട്രക്കിംഗിനും പറ്റിയതാണ് നേര്‍സയിലെ കുറ്റിക്കാടുകള്‍ നിറഞ്ഞ ഭൂപ്രകൃതി. ഭീംഘട്, കോംഗ്ല, അബ്‌നാലി, ജാംഗോണ്‍ തുടങ്ങിയ മനോഹരങ്ങളായ സ്ഥലങ്ങളും നേര്‍സയിലേക്കുള്ള യാത്രയില്‍ കാണേണ്ടുന്ന കാഴ്ചകളില്‍പ്പെടും. ഇവിടെ പലയിടങ്ങളിലും വാഹനസൗകര്യമില്ലാത്തതിനാല്‍ കാഴ്ചകള്‍ കാണണമെങ്കില്‍ നടന്നുതന്നെ കയറണം. എന്നാല്‍ വിവധിയിനം പക്ഷികളും ചിത്രശലഭങ്ങളും മറ്റ് ജീവിവര്‍ഗ്ഗങ്ങളും സസ്യജാലങ്ങളും ചേര്‍ന്ന് എത്ര കഠിനമായ നടത്തവും അര്‍ത്ഥപൂര്‍ണമാക്കുന്ന കാഴ്ചകള്‍ സഞ്ചാരികള്‍ക്കായി ഇവിടെ ഒരുക്കുന്നു.
തലേവാടി വവ്വാലുകളാണ് നേര്‍സയിലേക്കുള്ള യാത്രയിലെ പ്രധാനമായ കാഴ്ച. ഏതാണ്ട് നാല്‍പ്പതിലധികം വിഭാഗത്തിലുള്ള വവ്വാലുകളുടെ ആവാസകേന്ദ്രമാണിവിടം. ബരാപേടിയിലെ ഒരു ഗുഹയില്‍ മാത്രം ഇരുന്നൂറിലധികം വവ്വാലുകളുണ്ട് എന്നാണ് കരുതുന്നത്. ഘാനാപൂരാണ് നേര്‍സയ്ക്ക് തൊട്ടടുത്ത റെയില്‍വേ സ്റ്റേഷന്‍. നേര്‍സയിലേക്ക് ബാംഗ്ലൂര്‍ ഇന്റര്‍നാഷണല്‍ എയര്‍പോര്‍ട്ടില്‍ നിന്നും അഞ്ഞൂറ് കിലോമീറ്റര്‍ ദൂരമുണ്ട്. ബാംഗ്ലൂരില്‍ നിന്നും നിരവധി ബസ് സര്‍വ്വീസുകളും ഇവിടേക്കുണ്ട്.
