Click it and Unblock the Notifications
ഒറ്റദിവസത്തെ ട്രക്കിംഗാഗ്രഹിക്കുന്നവര്‍ക്ക് പറ്റിയ ഇടമാണ് ശിവഗംഗെ. ബാംഗ്ലൂരില്‍ നിന്നും ഏകദേശം 60 കിലോമീറ്ററാണ് ഇവിടേക്കുള്ള ദൂരം. അതുകൊണ്ടുതന്നെ ഒരു ദിവസത്തെ യാത്ര പ്ലാന്‍ ചെയ്യുന്നവര്‍ക്ക് സംശയമേതുമില്ലാതെ തിരഞ്ഞെടുക്കാം ശിവഗംഗെ. പാറക്കൂട്ടങ്ങള്‍ നിറഞ്ഞ ഒരു ചെറിയ കുന്നാണ് ശിവഗംഗെ. മലമുകളിലെ ശിവക്ഷേത്രത്തില്‍നിന്നാണ് ഈ സ്ഥലത്തിന് ശിവഗംഗെ എന്ന പേര് വീണത്. ഗണപതിയുടെ കൊമ്പിന്റെ ഭാഗമെന്ന് പ്രദേശവാസികള്‍ വിശ്വസിക്കുന്ന പര്‍വ്വതശിഖരം ശിവഗംഗെയുടെ പ്രകൃതിഭംഗിക്ക് ചാരുതയേറ്റുന്നു. മലമുകളിലെ ശിവക്ഷേത്രം കാരണമാവാം ചിലരെങ്കിലും ശിവഗംഗെയെ ദക്ഷിണകാശി എന്ന് വിളിക്കുന്നത്.
തീര്‍ത്ഥാടകര്‍ക്കായി ഒരിടം
പുരാതനമായ ഗംഗാധരേശ്വര ക്ഷേത്രമാണ് ശിവഗംഗെയിലെ ഏറ്റവും ആകര്‍ഷകമായ കാഴ്ച. ബാംഗ്ലൂരിലെ ഗവി ഗംഗാധരേശ്വര ക്ഷേത്രത്തിലേക്ക് ഇവിടെ നിന്നും രഹസ്യ ഭൂഗര്‍ഭപാതയുണ്ടെന്ന് കരുതപ്പെടുന്നു. എന്നിരുന്നാലും ഇത് ഇതുവരെയും കണ്ടെത്തിയിട്ടില്ല. ഭൂമിക്കടിയില്‍ നിന്നും വെള്ളം കുതിച്ചുവരുന്ന പാതാളഗംഗയാണ് ഇവിടത്തെ മറ്റൊരു പ്രധാന ആകര്‍ഷണം. സാഹസികത ഇഷ്ടപ്പെടുന്ന യാത്രികര്‍ ഒരിക്കലും നഷ്ടപ്പെടുത്തരുതാത്തതാണ് ശിവഗംഗെയിലെ കൂറ്റന്‍ പാറക്കെട്ടുകളും റോക്ക് ക്ലൈംബിഗും.
എട്ടുകിലോമീറ്റര്‍ ദൂരത്തുള്ള ദാബാസ് പേട്ടാണ് ശിവഗംഗെയ്ക്ക് സമീപ ടൗണ്‍. ബാംഗ്ലൂര്‍ നിന്നും ശിവഗംഗെയിലേക്ക് വരുന്നവര്‍ തുംകൂറിലിറങ്ങി ദാബാസ് പേട്ടിലേക്ക് ബസ് പിടിക്കണം. ദാബാസ് പേട്ടില്‍ നിന്നും ശിവഗംഗെയിലേക്ക് നിരവധി സ്വകാര്യവാഹനങ്ങള്‍ ലഭ്യമാണ്.
