അറക്കുളം എന്നു കേള്ക്കുമ്പോള് മലയാളികള്ക്ക് മനസ്സിലായില്ലെങ്കിലും രസതന്ത്രം ഉള്പ്പെടെയുള്ള സിനിമകളുടെ ലൊക്കേഷന് എന്നു പറഞ്ഞാല് മനസ്സിലെത്തുന്ന ചില കാഴ്ചകളില്ലേ, അതാണ് അറക്കുളം. ആ പുഴയും പച്ചപ്പും ആറ്റുതീരവും കടവിലെ വര്ത്തമാനവുമെല്ലാം അതേപടി തന്നെയുള്ള ഇടുക്കിയിലെ മറ്റൊരു സ്വര്ഗ്ഗം. ഹൈറേഞ്ചിന്റെ കവാടം എന്നറിയപ്പെടുന്ന തൊടുപുഴയില് നിന്നും 16 കിലോമീറ്റര് അകലെയുള്ള അറക്കുളം മലയാളികള്ക്ക് എന്നും എന്തൊക്കെയോ ഗൃഹാതുരത്വ ഓര്മ്മകള് സമ്മാനിക്കുന്ന സ്ഥലം കൂടിയാണ്.
കാഞ്ഞാര് നദിയും അതിന്റെ ചുറ്റുവട്ടത്തുള്ള കാഴ്ചകളും തേക്കിന് തോട്ടവും വെള്ളച്ചാട്ടവും ത്രിവേണി സംഗമവും ഒക്കെയാണ് ഇവിടുത്തെ പ്രധാനപ്പെട്ട കാഴ്ചകള്. അറക്കുളത്തെക്കുറിച്ചും ഇവിടുത്തെ പ്രത്യേകതകളെക്കുറിച്ചും വിശേഷങ്ങളെക്കുറിച്ചും വായിക്കാം...
വാഗമണ് പുള്ളിക്കാനം കാഴ്ചകള്
ഇടുക്കിയിലെ അധികമാരും കാണാത്ത കാഴ്ചകളിലൊന്നാണ് പുള്ളിക്കാനത്തേത്. കാഞ്ഞാറിന്റെ കാഴ്ചകളില് ഉള്പ്പെടില്ലെങ്കിലും വാഗമണ് കാഴ്ചകളില് ഒരിക്കലും ഒഴിവാക്കരുതാത്ത സ്ഥലമാണിത്.എറണാകുളം-തേക്കടി സ്റ്റേറ്റ് ഹൈവേയുടെ ഭാഗമായ പുള്ളിക്കാനം അതിമനോരഹമായ കാഴ്ചകള് കൊണ്ടു സമ്പന്നമാണ്. നിരവധി സിനിമകളുടെ ഷൂട്ടിങ് നടന്ന ഇവിടം സിനിമാ റോഡ് എന്നും അറിയപ്പെടുന്നു.
സമുദ്ര നിരപ്പില് നിന്നും 3000 അടി ഉയരത്തില് സ്ഥിതി ചെയ്യുന്ന നാടുകാണി അറക്കുളത്തിനു സമീപത്തെ മറ്റൊരു പ്രധാന കാഴ്ചയാണ്. നിര്മ്മാണ പ്രവര്ത്തനങ്ങള്ക്കായി കാനഡയില് നിന്നുമെത്തിയ എന്ജിനീയര്മാര് കണ്ടെത്തിയ വ്യൂ പോയിന്റ് ആണ്. ഇവിടെ നിന്നാണ് അവര് മൂലമറ്റം പവര് ഹൗസിന്റെ സ്ഥാനം കണ്ടെത്തിയതും സ്ഥലത്തിന്റെ പ്രത്യേകതകളെക്കുറിച്ച് മനസ്സിലാക്കിയതുമെല്ലാമത്രെ. അക്കാലത്ത് ഇവിടെ നിന്നാല് കൊച്ചിയിലെ കായലുകളുടെ കാഴ്ചകള് വരെ കാണുവാന് സാധിക്കുമായിരുന്നുവെന്നും പഴമക്കാര് പറയുന്നു. നാടായ നാടുകളെല്ലാം കാണുന്ന ഇടമായതിനാലാണ് ഇവിടം നാടുകാണി എന്നറിയപ്പെടുന്നത്.
തുമ്പച്ചിമല
അറക്കുളം കവലയില് നിന്നും ഇടുക്കി ചുരത്തിലേക്കുള്ല പാതയില് സ്ഥിതി ചെയ്യുന്ന അതിമനോഹരമായ ഇടമാണ് തുമ്പച്ചിമല. സമീപ പ്രദേശങ്ങളെ അപേക്ഷിച്ച് ഉയരത്തില് സ്ഥിതി ചെയ്യുന്നതിനാല് ചുറ്റുമുള്ള പ്രദേശങ്ങളുടെ അതിമനോഹരമായ കാഴ്ചകള് ഇവിടെ നിന്നും കാണാം. സെന്റ്.തോമസ് മൗണ്ട് എന്നും, കാൽവരി മൗണ്ട് എന്നും അറിയപ്പെടുന്ന ക്രൈസ്തവ തീര്ത്ഥാടന കേന്ദ്രം ഇവിടെയാണ് സ്ഥിതി ചെയ്യുന്നത്.
PC:Jaseem Hamza