വെറും രണ്ടുദിവസത്തെ യാത്രയ്ക്കു വേണ്ടി ബാഗ് പാക്ക് ചെയ്യുക എന്നത് അത്ര ബുദ്ധിമുട്ടുള്ള പണിയായിരിക്കില്ല. എന്നാല് യഥാര്ത്ഥത്തില് അങ്ങനെയാണോ?? രണ്ടു ദിവസത്തെ യാത്രയ്ക്കായി അനാവശ്യമായി വലിച്ചുവാരി സാധനങ്ങള് പാക്ക് ചെയ്യേണ്ട ആവശ്യമില്ല, എന്നാലോ അത്യാവശ്യമായി ഉപയോഗിക്കണ്ട സാധനങ്ങള് വിട്ടുപോകുവാനും പാടില്ല!! അതുകൊണ്ടുതന്നെ യാത്രയിലെ ഏറ്റവും എളുപ്പമെന്നു കരുതപ്പെടുന്ന പാക്കിങ് ഒരു പണി തന്നെയാണ്. കൃത്യമായി നോക്കി, യാത്രയ്ക്കും കാലാവസ്ഥയ്ക്കും ആവശ്യങ്ങള്ക്കുമനുസരിച്ച് പാക്ക് ചെയ്താല് മാത്രമേ യാത്ര പൂര്ണ്ണമാവുകയുള്ളൂ. കൃത്യമായി പാക്ക് ചെയ്ത ബാഗുണ്ടെങ്കില് യാത്രകളിലെ ചില തലവേദകള് ഒരു പരിധി വരെ ഒഴിവാക്കുകയും ചെയ്യാം...
ബ്രഷ് മുതല് ഷാംപൂ വരെ
യാത്രയില് പാക്ക് ചെയ്യിമ്പോള് എന്തൊക്കെ ഒഴിവാക്കുവാന് പറ്റുമോ യാത്ര അത്രയും എളുപ്പമായിരിക്കും. തീര്ത്തും വ്യക്തപരമായ ബ്രഷ്, സോപ്പ്, ടവ്വല് തുടങ്ങിയവ മാത്രം എടുക്കുക, ഷാംപൂം, ഫേസ് വാഷ് തുടങ്ങിയവയെല്ലാം ഹോട്ടലുകളില് ലഭ്യമായിരിക്കും. അല്ലെങ്കില് ഇവയുടെ സാഷേ അല്ലെങ്കില് സാംപിള് പാക്കറ്റ് എടുക്കുക. ട്രാവല് സൈസില് എല്ലാം ലഭിക്കുന്നതിനാല് അത് തിരഞ്ഞെടുക്കുന്നതായിരിക്കും കുറച്ചുകൂടി നല്ലത്.
ആവശ്യമുള്ള വസ്ത്രങ്ങള് മാത്രം
രണ്ടു ദിവസത്തെ യാത്രയില് എങ്ങനെ സമയംചിലവഴിക്കുവാനാണ് ആഗ്രഹിക്കുന്നതെന്നും എവിടെയൊക്കെ പോകുന്നുണ്ട്, എന്തൊക്കെ കാര്യങ്ങളില് ഏര്പ്പെടുന്നുണ്ട് എന്നുകൂടി നേരത്തെ പ്ലാന് ചെയ്താല് അതിനനുസരിച്ചു മാത്രം പാക്ക് ചെയ്താല് മതിയാവും. ഒരു ദിവസം സ്ഥലം കാണലും അടുത്ത ദിവസം ബീച്ച് യാത്ര അല്ലെങ്കില് ട്രക്കിങ്ങും ആണെങ്കില് അതിനാവശ്യമായവ മാത്രം പാക്ക് ചെയ്യാം.
ഏത് അവസരത്തിനും യോജിക്കുന്ന ഇളംനിറങ്ങള് മാത്രം തിരഞ്ഞെടുക്കുക. വേറെ പ്ലാനുകളൊന്നുമില്ല എങ്കില് ധരിച്ചിരിക്കുന്ന ഷൂ മാത്രം മതിയാവും യാത്രകള്ക്ക്. സോക്സുകള് മൂന്നോ നാലോ ജോഡി കരുതാം. രണ്ട് ഷൂ എടുക്കേണ്ട ആവശ്യമുണ്ടെങ്കില് ഭാരം കൂടിയത് യാത്രയില് ധരിക്കാം. ചെറുത് ബാഗില് പാക്ക് ചെയ്യാം.