കടലും മലയും കായലും തടാകവും ഒക്കെയയായി കേരളത്തിന്റെ കാഴ്ചകൾ ആരെയും കൊതിപ്പിക്കുന്നതാണ്. കേരളത്തിന്റെ സൗന്ദര്യം ഒന്നുമാത്രം കാണുവാൻ ആഗ്രഹിച്ചാണ് ആയിരക്കണക്കിന് സഞ്ചാരികൾ ഓരോ സമയത്തും ഈ നാടു തേടി എത്തുന്നത്.
പശ്ചിമഘട്ടത്തിന്റെ സൗന്ദര്യവും അവിടുത്തെ കാഴ്ചകളും മലബാറും വള്ളുവനാടും തിരുവിതാംകൂറും ഒക്കെ ചേരുന്ന ഇവിടെ കണ്ടു തീർക്കുവാൻ പറ്റാത്ത കാഴ്ചകളും ഇടങ്ങളുമാണുള്ളത്. അങ്ങനെയുളള ഈ കേരളത്തിൽ മഞ്ഞുകാലത്ത് കാണുവാനുള്ള സ്ഥലങ്ങളെക്കുറിച്ച് അറിയുമോ? വിന്ററിൽ കേരളത്തിൽ തീർച്ചയായും കണ്ടിരിക്കേണ്ട കുറച്ച് സ്ഥലങ്ങൾ നോക്കാം...
വാഗമൺ
ആഗോള സഞ്ചാരികളുടെ ഇടയിൽ കേരളത്തിൽ നിന്നും ഉയർന്നു കേൾക്കുന്ന പേരുകളിലൊന്നാണ് വാഗമൺ. ഇടുക്കി, കോട്ടയം ജില്ലകളുടെ അതിർത്തിയോട് ചേർന്നു നിൽക്കുന്ന ഇവിടം പല തവണയാണ് ഇന്ത്യയിൽ ഉറപ്പായും സഞ്ചരിക്കേണ്ട സ്ഥലങ്ങളുടെ ലിസ്റ്റിൽ ഉൾപ്പെട്ടിരിക്കുന്നത്. ആകാശത്തോളം ഉയരത്തിൽ നിൽക്കുന്ന മലനിരകളും കുതിച്ചുകുത്തിയൊഴുകുന്ന വെള്ളച്ചാട്ടങ്ങളും കണ്ണെത്താത്ത താഴ്വരകളും ഒക്കെയായി വീണ്ടും വീണ്ടും വരുവാൻ തോന്നിപ്പിക്കുന്ന ഇടമാണിത്.
കുരിശു മലയും പൈൻ കാടുകളും വാഗമൺ ലേക്കു തേയിലത്തോട്ടങ്ങളും തങ്ങളുപാറയും മുരുകൻപാറയും ഒക്കെയാണ് ഇവിടുത്തെ പ്രധാന ആകർഷണങ്ങള്.
തിരുവനന്തപുരത്തെ ഏറ്റവും മനോഹരമായ ഇടം എന്നറിയപ്പെടുന്ന സ്ഥലമാണ് പൂവാർ. ശാന്തമായ ഒരിടം തേടി എത്തുന്നവർക്ക് ചിലവഴിക്കുവാൻ പറ്റിയ പ്രദേശമാണിത്. തിരുവനന്തപുരം നഗരത്തില് നിന്നും 38 കിലോമീറ്റര് അകലെയാണ് പൂവാര്. വിഴിഞ്ഞത്തുനിന്നും പതിനഞ്ച് മിനിറ്റ് ബോട്ടില് സഞ്ചരിച്ചാലും പൂവാറിലെത്താം. കോവളം ബീച്ചും പൂവാര് ബീച്ചുമായി ഒരു അഴിയാല് വേര്തിരിക്കപ്പെട്ടു കിടക്കുകയാണ്. വേലിയേറ്റ സമയത്ത് കടലിനെ കായലുമായി ബന്ധിപ്പിക്കുന്ന ഒരു പൊഴിയും ഇവിടെ രൂപപ്പെടാറുണ്ട്
തനിനാടൻ കേരളത്തിന്റെ കാഴ്ചകളും രുചിയും ഒക്കെ അറിയണമെങ്കിൽ കുമരകത്തിനു തിരിക്കാം. കായലും അതിനെ ചുറ്റിപ്പറ്റിയുള്ള കാഴ്ചകളും ജീവിതങ്ങളും ഒക്കെയാണ് ഇവിടുത്തെ പ്രത്യേകത. കേരളത്തിലെ ഏറ്റവും വലിയ ശുദ്ധജല തടാകമായ വേമ്പനാട് കായലാണ് കുമരകത്തിനു ഇത്രയും ഭംഗി നല്കുന്നത്.