ലോകത്തിലെ ഏറ്റവും മനോഹരമായ കാഴ്ചകളിലേക്ക് ഇനി യാത്രക്കാര്ക്കു ചെന്നിറങ്ങാം!!കൊവിഡിനെ തുടര്ന്ന് രണ്ടു വര്ഷത്തിലേറെയായി അടച്ചിട്ടിരുന്ന അതിര്ത്തികള് അന്താരാഷ്ട്ര യാത്രകള്ക്കായി ഭൂട്ടാന് തുറന്നു. ഇതോടെ യാത്രക്കാര്ക്ക് ഏറ്റവും മനോഹര രാജ്യങ്ങളിലൊന്നും സന്തോഷത്തിന്റെ നാടുമായ ഭൂട്ടാനെ വീണ്ടും യാത്രാ പട്ടികയില് ഉള്പ്പെടുത്താം. ഏതൊക്കെ രാജ്യങ്ങളില് പോയെന്നു പറഞ്ഞാലും ലഭിക്കാത്ത പ്രത്യേകതരം സംതൃപ്തിയും സന്തോഷവുമാണ് ഭൂട്ടാന് യാത്ര സഞ്ചാരികള്ക്ക് നല്കുന്നത്. ഹിമാലയന് താഴ്വരയില്, നമ്മുടെ രാജ്യത്തോട് തൊട്ടു ചേര്ന്ന് സ്ഥിതി ചെയ്യുന്ന ബുദ്ധിസ്റ്റ് രാജ്യമായ ഭൂട്ടാന് കാര്ബണ് നെഗറ്റീനും ഗ്രോസ് നാഷണല് ഹാപ്പിനസും ഉള്പ്പെടെ പല കാര്യങ്ങള്ക്കും ലോകമാതൃക കൂടിയാണ്.
ഇതിനു മുന്പുണ്ടായിരുന്ന പല കാര്യങ്ങളിലും വലിയ മാറ്റങ്ങള് വരുത്തിയാണ് ഭൂട്ടാന് ഇപ്പോള് അതിര്ത്തികള് തുറന്നിരിക്കുന്നത്. സുസ്ഥിര വികസന ഫീസ് എന്ന പേരില് അവതരിപ്പിച്ചിരുന്ന പ്രത്യേക ഫീസ് ഭൂട്ടാന് യാത്രകളുടെ ചിലവ് വലിയ രീതിയില് വര്ധിപ്പിക്കുവാന് പോന്നതാണ്. ഇതാ, ഇനിയുള്ള ഭൂട്ടാന് യാത്രകളില് ശ്രദ്ധിക്കേണ്ട കാര്യങ്ങളും മാറ്റങ്ങളും എന്തൊക്കെയാണെന്ന് വിശദമായി വായിക്കാം...
ഭൂട്ടാനിലേക്ക് കടക്കുമ്പോള്
ഇന്ത്യയിലെ ബാഗ്ഡോഗ്ര, ഗുവാഹത്തി, കൊൽക്കത്ത, ന്യൂഡൽഹി എന്നിവിടങ്ങളില് നിന്നും ഭൂട്ടാനിലെ ഏക അന്താരാഷ്ട്ര വിമാനത്താവളമായ പാരോയിലേക്ക് സര്വീസുകളുണ്ട്. സാംത്സെ, ഫ്യൂൻഷോലിംഗ്, ഗെലെഫു, സംദ്രുപ് ജോങ്ഖർ എന്നീ നാല് ചെക്ക് പോസ്റ്റുകള് കടന്നുവേണം ഇന്ത്യയില് നിന്നുള്ള സഞ്ചാരികള്ക്ക് റോഡ് മാര്ഗം ഭൂട്ടാനില് പ്രവേശിക്കുവാന്. ഭൂട്ടാനില് നിങ്ങള്ക്ക് കാറുകള് മാത്രമായി വാടകയ്ക്ക് എടുക്കുവാന് സാധിക്കില്ല എന്നതും കൂടി ഓര്മ്മിക്കാം.
ഭൂട്ടാന് കറന്സിയായ Ngulrtum നമ്മുടെ ഇന്ത്യന് രൂപയ്ക്ക് തുല്യമായ മൂല്യമുള്ള കറന്സിയാണ്. നമ്മുടെ രൂപ ഇവിടെ വ്യാപകമായി ഉപയോഗിക്കുവാന് സാധിക്കും, വലിയ നോട്ടുകള് കരുതുന്നതിനേക്കാള് കുറഞ്ഞ മൂല്യത്തിലുള്ള നോട്ടുകള് കരുതുന്നത് പണമിടപാടുകള് കൂടുതല് എളുപ്പമുള്ളതാക്കും. യുഎസ് ഡോളറും ഇടപാടിനായി ഉപയോഗിക്കാം. ഇവിടുത്തെ എടിഎമ്മുകളും ബാങ്കുകളും വിസയും മാസ്റ്റർകാർഡും സ്വീകരിക്കുന്നു.
ഭീം യുപിഐ ആപ്പ് വഴിയുള്ള പണമിടപാടുകളും ഭൂട്ടാനില് ചെയ്യാം. . ഭീം വഴിയുള്ള പണമിടപാട് ആരംഭിച്ച ആദ്യ അയല്രാജ്യമാണിത്