തീർത്തും വ്യത്യസ്തങ്ങളും വിചിത്രവുമായ ക്ഷേത്രങ്ങളാൽ സമ്പന്നമായ നാടാണ് കർണ്ണാടക. ഭൂമിക്കടിയിൽ നിന്നും ഉയർന്നു വന്ന ക്ഷേത്രവും നന്ദിയുടെ കൊമ്പിനുള്ളിലൂടെ സൂര്യപ്രകാശം ശിവലിംഗത്തിലെത്തുന്ന ക്ഷേത്രവും ഒക്കെ ഇവിടുത്തെ വളരെ ചെറിയ ഉദാഹരണങ്ങള് മാത്രമാണ്. ഇത്തരം ക്ഷേത്രങ്ങളോടൊപ്പം തന്നെ പ്രാധാന്യമർഹിക്കുന്നവയാണ് ഇവിടുത്തെ ഗുഹാ ക്ഷേത്രങ്ങളും. പുറമേ കാണുന്ന ക്ഷേത്രങ്ങള് കൂടാത കാടിനുള്ളിലും ദ്വീപുകളിലും ഒക്കെയായി ഇവിടെ ധാരാളം ക്ഷേത്രങ്ങള് കണ്ടെത്തിയിട്ടുണ്ട്. എന്തൊക്കെയായാലും അക്കൂട്ടത്തിൽ ഏറ്റവും പ്രാധാന്യം അർഹിക്കുന്നത് ഇവിടുത്തെ ഗുഹാ ക്ഷേത്രങ്ങൾ തന്നെയാണ്. ഇവിടെ ഇന്നു കണ്ടെത്തിയിട്ടുള്ള മിക്ക ഗുഹകളും ക്ഷേത്രത്തിന്റെ ശേഷിപ്പുകൾ ഉള്ളവയാണ്. കർണ്ണാടകയിലെ ഏറ്റവും പ്രസിദ്ധമായ ഗുഹാ ക്ഷേത്രങ്ങളെക്കുറിച്ചറിയാം
ഇന്ത്യയുടെ ഏറ്റവും പുരാതനമായ ഗുഹാ ക്ഷേത്രങ്ങളിലൊന്നാണ് ഐഹോളെ ക്ഷേത്രം. ചാലൂക്യ രാജവംശത്തിന്റെ മറ്റൊരു അടയാളമായാണ് കണക്കാക്കുന്നത്. ചാലൂക്യരുടെ ആദ്യകാല തലസ്ഥാനമായിരുന്ന ഇവിടം ബഗൽക്കോട്ട് ജില്ലയിലാണ് സ്ഥിതി ചെയ്യുന്നത്.
കല്ലിൽ കൊത്തിയിരിക്കുന്ന ഇവിടുത്തെ ക്ഷേത്രങ്ങൾ എഡി 550 ലാണ് നിർമ്മിക്കപ്പെട്ടത് എന്നാണ് ചരിത്രം പറയുന്നത്.
ഇവിടുത്തെ പ്രധാന ഗുഹാ ക്ഷേത്രത്തില് ശിവലിംഗത്തിന്റെ രൂപമാണ് കൊത്തിയിരിക്കുന്നത്. മറ്റു ഗുഹകളിൽ പാർവ്വതി, ദുർഗ്ഗ ഉൾപ്പെടെയുള്ള ദൈവങ്ങളുടെ രൂപങ്ങളും കൊത്തിയിരിക്കുന്നത് കാണാം. അര്ധനാരീശ്വര, നടരാജ തുടങ്ങിയ രൂപങ്ങളും ഇവിടെ കൊത്തിയിട്ടുണ്ട്.
ഉഡുപ്പിയിൽ അധികമാരും അറിയപ്പെടാതെ കിടക്കുന്ന കാടുകൾക്കുള്ളിലാണ് സുപർഷാ ഗുഹകൾ സ്ഥിതി ചെയ്യുന്നത്. രാജാ സുപർഷ തപസ്സ് നടന്നയിടമാണ് ഇതെന്നാണ് കരുതപ്പെടുന്നത്.
ദുർഗ്ഗാ, ലക്ഷ്മി, സരസ്വതി എന്നിവരെയാണ് ഇവിടെ ആരാധിക്കുന്നത്.
രാവിലെ 6.00 മുതൽ വൈകിട്ട് 9.00 മണി വരെയാണ് ഇവിടെ പ്രവേശവം അനുവദിച്ചിരിക്കുന്നത്.
ഒക്ടോബർ മുതൽ ജൂൺ വരെയുള്ള സമയമാണ് ഇവിടം സന്ദര്ശിക്കുവാൻ അനുയോജ്യം.
കർണ്ണാടകയിലെ ഏറ്റവും അത്ഭുതപ്പെടുത്തുന്ന ക്ഷേത്രങ്ങളിലൊന്നാണ് ബെംഗളുരു ഹുളിമാവിനു സമീപം സ്ഥിതി ചെയ്യുന്ന ഗവി ഗംഗാധരേശ്വര ക്ഷേത്രം. 11-ാം നൂറ്റാണ്ടിൽ നിർമ്മിക്കപ്പെട്ട ഈ ഗുഹാ ക്ഷേത്രം പിന്നീട് ബെംഗളുരുവിന്റെ സ്ഥാപകനായ കെപൈഗൗഡ ഒന്നാമന്റെ കാലത്ത് 16-ാം നൂറ്റാണ്ടിലാണ് ഇന്നു കാണുന്ന രീതിയിൽ പുനർനിർമ്മിക്കപ്പെട്ടത്.
പ്രകൃതി ദത്തമായ ഗുഹയ്ക്കുള്ളലിൽ ശിവലിംഗത്തോട് കൂടി കാണപ്പെടുന്ന ഇത് അത്ഭുതകരമായ സവിശേഷതകൾ ഉള്ളയിടമാണെന്ന് പറയാതെ വയ്യ. ഗുഹയ്ക്കുള്ളിലെ ശിവലിംഗത്തിന്റെയടുത്ത് സൂര്യ പ്രകാശമെത്തുന്ന രീതിയാണ് പ്രത്യേകതയുള്ളത്.
നന്ദിയുടെ കൊമ്പുകൾക്കിടയിലൂടെ ശിവലംഗത്തിലെത്തുന്ന സൂര്യൻ
ഈ ക്ഷേത്രത്തിന്റെ ഏറ്റവും വലിയ പ്രത്യേകത എന്നത് ഇവിടെ എത്തുന്ന സൂര്യപ്രകാശമാണ്. വർഷത്തിലെ ചില പ്രത്യേക ദിവസങ്ങളിൽ ഒരു മണിക്കൂറോളം നേരം സൂര്യപ്രകാശം ആരെയും അതിശയിപ്പിക്കുന്ന രീതീയിൽ ഉള്ളിലെ ശിവലിംഗത്തിൽ പതിക്കും. ക്ഷേത്ര പരിസരത്തെ നന്ദി പ്രതിമയുടെ കൊമ്പുകൾക്കിടയിലൂടെ എത്തുന്ന സൂര്യവെളിച്ചം ഗുഹയ്ക്കുള്ളലിലെ ശിവലിംഗത്തിൽ പതിച്ച് അതിനെ പ്രകാശിപ്പിക്കുകയാണ് ചെയ്യുന്നത്.
വർഷത്തിൽ വളരെ കുറച്ച് അവസരങ്ങളിൽ മാത്രമാണ് സൂര്യന്റെ ഈ മാന്ത്രിക പ്രകടനം ക്ഷേത്രത്തിൽ കാണുവാൻ സാധിക്കുകയുള്ളൂ. ജനുവരി മാസത്തിൽ മകരസംക്രാന്തി നാളിലാണ് ഇത് നടക്കുക. ഏകദേശം ഒരു മണിക്കൂറോളം നേരം സൂര്യപ്രകാശം നന്ദി പ്രതിമയുടെ കൊമ്പുകൾക്കിടയിലൂടെ കടന്ന് ഗുഹയിലെ ശിവലിംഗത്തിൽ പതിക്കുന്നത് മനോഹരമായ ഒരു കാഴ്ചയാണ്. കൂടാതെ നവംബർ 26 നും ഡിസബർ 2നും ഇതേ കാര്യം ആവർത്തിക്കാറുണ്ട്.
രണ്ടായിരം വർഷം പഴക്കമുള്ള ഗുഹയ്ക്കുള്ളിൽ 500 വർഷം പഴക്കമുള്ള ക്ഷേത്രം സ്ഥിതി ചെയ്യുന്നു എന്ന പ്രത്യേകതയാണ് ഹുളിമാവ് രാമലിംഗേശ്വര ഗുഹാ ക്ഷേത്രത്തിനുള്ളത്. ബെംഗളുരു ബെന്നാർഗട്ട റോഡിൽ ഹുളിമാവിലാണ് ഈ അത്ഭുത ക്ഷേത്രം സ്ഥിതി ചെയ്യുന്നത്. ശ്രീ ശ്രീ ബാലഗംഗാധര സ്വാമി മഠത്തിന്റെ കീഴിലാണ് ക്ഷേത്രമുള്ളത്. ശിവലിംഗം, ദേവി, ഗണേശൻ എന്നീ മൂന്നു രൂപങ്ങളെയാണ് ഈ ഗുഹയ്ക്കുള്ളിൽ ആരാധിക്കുന്നത്.