മീനച്ചൂട് വരുന്നതിനു മുൻപയുള്ള തണുപ്പിന്റെ അവസാന കുറേ നാളുകളാണ് ഫെബ്രുവരി. യാത്ര ചെയ്യുവാനും രാജ്യത്തിന്റെ വിവിധ ഭാഗങ്ങളിൽ നടക്കുന്ന വ്യത്യസ്തങ്ങളായ ആഘോഷങ്ങളിലും ഉത്സവങ്ങളിലും പങ്കെടുക്കുവാനും പറ്റിയ സമയം. പ്രണയിക്കുന്നവരുടെ പ്രിയപ്പെട്ട മാസം കൂടിയായ ഫെബ്രുവരിയിൽ നമ്മുടെ രാജ്യത്ത് നടക്കുന്ന പ്രധാനപ്പെട്ട ആഘോഷങ്ങളും പരിപാടികളും ഏതൊക്കെയാണ് എന്നു നോക്കാം.
രാജസ്ഥാനെക്കുറിച്ച് സഞ്ചാരികൾക്കിടയിൽ കൂടുതൽ അറിയിക്കുക എന്ന ലക്ഷ്യത്തിൽ നടത്തുന്ന മേളയാണ് ജയ്സാൽമീർ ഡെസേർട്ട് ഫെസ്റ്റിവല്. കാഴ്ചകളുടെയും രുചികളുടെയും എന്തിനധികം വ്യത്യസ്ത ഗന്ധങ്ങളുടെ വരെ സംഗമമായിരിക്കും ഇവിടെയുണ്ടാവുക. മാഘമാസത്തിൽ പൂർണ്ണ ചന്ദ്രനുദിക്കുന്ന മൂന്നു ദിനങ്ങളാണ് ആഘോഷത്തിനായി തിരഞ്ഞെടുത്തിരിക്കുന്നത്.
ഗൂമർ ഡാൻസ്, മിസ്റ്റര് ആന്റ് മിസ് ഡെസേര്ട്ട് സൗന്ദര്യമത്സരം, ടർബൻ കെട്ടൽ മത്സരം, ഒട്ടകങ്ങളുടെ ഓട്ടമത്സരം, ഒട്ടക ടാറ്റൂ ഷോ, ഒട്ടകപ്പുറത്തിരുന്നുള്ള പോളോ മത്സരം, പാവകളി തുടങ്ങിയവ ഇവിടെ കാണാം.
തിയ്യതി-2020 ഫെബ്രുവരി 7 മുതല് 9 വരെ
വർഷത്തിലെ ആദ്യത്തെ ഗജമേളയാണ് പത്തനംതിട്ട അടൂരിൽ നടക്കുന്ന അടൂർ ഗജമേള. പത്തനംതിട്ട അടൂർ പാര്ത്ഥസാരഥി ക്ഷേത്രത്തിലെ പത്തു ദിവസം നാണ്ടു നിൽക്കുന്ന ഉത്സവത്തിന്റെ സമാപന ദിവസമാണ് പ്രശസ്തമായ ഗജമേള നടക്കുന്നത്. നെറ്റിപ്പട്ടവും വെഞ്ചാമരവും ഒക്കെയായി അലങ്കരിച്ച ഗജവീരന്മാർ പഞ്ചവാദ്യത്തിന്റെ അകമ്പടിയോടു കൂടിയ നടന്നു നീങ്ങുന്ന കാഴ്ച കണ്ടിരിക്കേണ്ടതു തന്നെയാണ്.
തിയ്യതി- 2020 ഫെബ്രുവരി 04
അഞ്ചാം എഡിഷൻ ഉദയ്പൂർ വേൾഡ് മ്യൂസിക് ഫെസ്റ്റിവൽ ലോകത്തിന്റെ വിവിധ ഭാഗങ്ങളിൽ നിന്നുള്ള സംഗീതജ്ഞര് പങ്കെടുക്കുന്ന പരിപാടിയാണ്. റോക്ക്, റാപ്പ്, വെസ്റ്റേണ് മ്യൂസിക് പോലുള്ള സംഗതികൾക്ക് പ്രാമുഖ്യം നല്കുന്ന ഈ ഫെസ്റ്റിവൽ ഇവിടുത്തെ ഒരു സാംസ്കാരിക പരിപാടി കൂടിയാണ്.