നവരാത്രി ആഘോഷങ്ങളുടെ സമയത്തു തന്നെ സഞ്ചാരികളുടെ അടുത്ത ചിന്ത വരാൻ പോകുന്ന ദീപാവലിയുടെ നീണ്ട വാരാന്ത്യം എവിടെ പോയി ആഘോഷിക്കും എന്നതാണ്. നവരാത്രി പരിപാടികളുടെ ക്ഷീണം മാറുന്നതിനു മുൻപേ തന്നെ ആലോചിച്ചുതുടങ്ങിയാൽ മാത്രമ ദീപാവലി ഏറ്റവും മികച്ച ഡീലിൽ പോക്കറ്റ് കാലിയാക്കാതെ അടിച്ചുപൊളിക്കുവാൻ കഴിയൂ എന്നതു തന്നെയാണ് കാരണം, നീണ്ട വാരാന്ത്യങ്ങളോട് ചേർന്ന് മുൻകൂട്ടി തയ്യാറാക്കിയ ലീവ് ഒക്കെയെടുത്തു മിക്കവരും യാത്രകൾക്ക് മാനസീകമായി ഒരുങ്ങിക്കഴിഞ്ഞൂ. ഇതാ ഈ അവധിക്കാലം ചിലവഴിക്കുവാൻ ആളുകൾ ഇതിനോടകം തിരഞ്ഞെടുത്തിരിക്കുന്ന ചില സ്ഥലങ്ങൾ ഏതൊക്കെയാണെന്നു നോക്കാം!
രക്ഷകനായി അസർബെയ്ജാൻ
യൂറോപ്പും അമേരിക്കയും പോകുവാൻ പോക്കറ്റ് അനുവദിക്കാത്തവർക്കുള്ള രക്ഷകൻ ഇപ്പോൾ അസർബെയ്ജാൻ ആണ്. കേരളത്തിൽ നിന്നും ഏറ്റവുമധികം സഞ്ചാരികൾ കഴിഞ്ഞ കുറച്ചുകാലമായി തിരഞ്ഞെടുക്കുന്ന വിദേശ രാജ്യമാണിത്. വളരെ കുറഞ്ഞ ചിലവ് തന്നെയാണ് ആളുകളെ ഇവിടേക്ക് ആകർഷിക്കുന്നത്. പ്രത്യേകിച്ച് ഒരു യൂറോപ്പ് രാജ്യം സന്ദര്ശിക്കുന്ന ചിലവുമായി താരതമ്യം ചെയ്യുമ്പോൾ വളരെ ചുരുങ്ങിയ ചിലവ് മാത്രമേ ഇവിടേക്ക് ആകുന്നുള്ളൂ.