പര്വ്വതങ്ങളുടെ വിളികേട്ട് ഒരിക്കലെങ്കിലും യാത്ര പോയാല് പിന്നീട് പൂര്ണ്ണമായും ഒരു മടങ്ങിവരവ് സാധ്യമാകില്ല. നമ്മുടെ ജീവിതത്തിന്റെ ഒരംശം പിന്നീട് എല്ലായ്പ്പോഴും ആ കുന്നുകളില് തന്നെയായിരിക്കും. അത്തരത്തില് ഒറ്റ യാത്രയില് തന്നെ നമ്മുടെ പിന്നീടുള്ള ജീവിതത്തിന്റെ ഭാഗമായി മാറുന്ന ചിലയിടങ്ങളുണ്ട്. അത്തരത്തിലൊന്നാണ് മണാലി. കാഴ്ചയില് അല്ലെങ്കില് ആ പേരു മാത്രം മതി വീണ്ടും വീണ്ടും യാത്ര ചെയയ്ണമെന്നു തോന്നിപ്പിക്കുവാന്. ഒരു പക്ഷേ, മണാലിയോളം മലയാളികളെ കൊതിപ്പിച്ച മറ്റൊരു നാട് ഇല്ല എന്നുതന്നെ പറയേണ്ടി വരും. മഞ്ഞുപെയ്യുന്ന പര്വ്വതങ്ങളും പുരാതനങ്ങളായ ആശ്രമങ്ങളും ട്രക്കിങ്ങും ഹൈക്കിങ്ങും മാത്രമല്ല മണാലി. പലപ്പോഴും മണാലി യാത്രയില് വിട്ടുപോകുന്നതും ഇതുതന്നെയാണ്.
മണാലിയിലെ മഞ്ഞില് മറന്നു പോകുന്ന ചിലയിടങ്ങള്. മണാലി യാത്ര പൂര്ത്തിയാകണമെങ്കില് തീര്ച്ചായും സന്ദര്ശിച്ചിരിക്കേണ്ട സമീപത്തെ പ്രധാന സ്ഥലങ്ങള് പരിചയപ്പെടാം.
തീര്ത്ഥന്വാലി
മണാലിയില് നിന്നും മൂന്നരമണിക്കൂര് അകലെയാണെങ്കിലും തീര്ച്ചായും പോയിരിക്കേണ്ട സ്ഥലമാണ് തീര്ത്ഥന് വാലി. സമുദ്ര നിരപ്പില് നിന്നും 1600 അടി ഉയരത്തില് സ്ഥിതി ചെയ്യുന്ന ഈ താഴ്വര തീര്ത്ഥന് നദിയുടെ തീരത്തായാണ് സ്ഥിതി ചെയ്യുന്നത്. വെറുതേയൊരു യാത്ര വന്ന് വെറുതേയിരിക്കുവാനാണെങ്കില് പോലും ഇവിടം യോജിക്കും. ട്രക്കിങ്ങും ഫിഷിങ്ങുമെല്ലാം ഇവിടെ നടത്തുവാന് പറ്റിയ കാര്യങ്ങളാണ്.ഹിമാചലിലെ ഏറ്റവും മികച്ച പക്ഷി നീരീക്ഷണ കേന്ദ്രങ്ങളിലൊന്നും തീര്ത്ഥന് വാലിയിലാണ് സ്ഥിതി ചെയ്യുന്നത്. സെരോല്സര് തടാകമാണ് ഇവിടുത്തെ മറ്റൊരു ആകര്ഷണം. ചെഹ്നി കോത്തി, പരാശര് തടാകം തുടങ്ങിയ ഇടങ്ങളിലേക്കും ഇവിടെ നിന്നും യാത്ര പോകാം.
മണാലിയില് നിന്നും 123 കിലോമീറ്റര് അകലെയാണ് മാണ്ഡി സ്ഥിതി ചെയ്യുന്നത്. പച്ചപ്പും തേയിലത്തോട്ടങ്ങളുമെല്ലാം ചേര്ന്ന അതിമനോഹരമായ ഒരു നാടാണ് മാണ്ഡി. ഈ പച്ചപ്പു കാണുവാനും ആസ്വദിക്കുവാനുമായി ലോകത്തിന്റെ വിവിധ ഭാഗങ്ങളില് നിന്നും സഞ്ചാരികള് ഇവിടെ എത്തുന്നു. കുന്നിന്മുകളിലെ വാരണാസി എന്നാണ് ഈ പ്രദേശത്തെ സഞ്ചാരികള് സ്നേഹപൂര്വ്വം വിളിക്കുന്നത്.
ബിര്
മണാലിയില് നിന്നും 177 കിലോമീറ്ററ് അകലെയാണെങ്കിലും യാത്ര ചെയ്താല് അതിനനുസരിച്ചുള്ല കാഴ്ചകള് നല്കുന്ന നാടാണ് ബിര്. പാരാഗ്ലൈഡിങ്ങിനു പേരുകേട്ട പ്രദേശമാണിത്. സാഹസികത ഇഷ്ടപ്പെടുന്നവരുണ്ടെങ്കില് തീര്ച്ചയായും ഇവിടെ ആസ്വദിക്കുവാന് കാഴ്ചകളുമുണ്ട്. ഇന്ത്യയുടെ പാരാഗ്ലൈഡിങ് തലസ്ഥാനം എന്നാണിവിടം അറിയപ്പെടുന്നത്.