മാതാപിതാക്കള് ആകുന്നതോടെ അത്രയും നാള് ചെയ്ചിരുന്ന യാത്രകളില് നിന്നും വിനോദങ്ങളില് നിന്നുമെല്ലാം 'വോളണ്ടറി റിട്ടയര്മെന്റ് ചെയ്യുന്ന നിരവധി പേരെ നമ്മുടെ ചുറ്റിലും കാണാം. ചെറിയ കുട്ടികളുമായി പോകുന്ന യാത്രകളുടെ ബുദ്ധിമുട്ട് കരുതിയോ അല്ലെങ്കില് നാട്ടുകാരെന്തു വിചാരിക്കുമെന്നോര്ത്തോ ഒക്കെയാവും പലരും യാത്രകള് താത്കാലികമായി കുറച്ചുകാലത്തേക്ക് നിര്ത്തിവെയ്ക്കുന്നത്. കുട്ടികള് വലുതായിട്ട് യാത്ര പോകാമെന്നു കരുതുന്നവരും കുറവില്ല.
ഈ രീതികള്ക്കിടയിലും മറ്റൊരു കൂട്ടരെയും നമുക്ക് കാണാന് കഴിയും. തങ്ങളുടെ കുട്ടികളെയും കൂട്ടി ലോകമെമ്പാടും യാത്ര ചെയ്യുന്ന മാതാപിതാക്കള്. തങ്ങള് കാണുന്ന ലോകം തങ്ങളുടെ കുഞ്ഞുങ്ങളെയും കാണിക്കണമെന്നോര്ത്തു പോകുന്നവര്, തങ്ങളേറെ പോകണമെന്നാഗ്രഹിക്കുന്ന ഇടങ്ങളിലേക്ക് കുഞ്ഞുങ്ങളെ കൂട്ടുമ്പോള് അവര് തുറക്കുന്നത് നിരവധി വാതിലുകളാണ്. കുടുംബബന്ധങ്ങള്ക്ക് ശക്തി പകരുവാനും കുട്ടികളെ ലോകം കാണിച്ചു വളര്ത്തുവാനുമൊക്കെ അവരേയും കൂട്ടിയുള്ള സഞ്ചാരങ്ങള് സഹായിക്കും. കുഞ്ഞുങ്ങളെ കൂട്ടിയുള്ള യാത്രയിലെ ഗുണങ്ങള് എന്തൊക്കെയാണ് എന്നു നോക്കാം...
ഉത്തരവാദിത്വങ്ങള് പഠിപ്പിക്കുന്നു
യാത്രകള് കുട്ടികളെ ഉത്തരവാദിത്വങ്ങള് എന്തെന്നും അത് ഏറ്റെടുക്കുന്നതും പ്രവര്ത്തിക്കുന്നതും എങ്ങനെയെന്ന് പഠിപ്പിക്കുന്നു. യാത്ര പ്ലാന് ചെയ്യുന്നതു മുതല് കുട്ടികളെയും ഒപ്പം കൂട്ടാം. പോകുന്ന ഓരോ ഇടവും അവരോടുകൂടി ചര്ച്ച ചെയ്യാം. അത് ആ യാത്ര തങ്ങളുടെ കൂടി ഉത്തരവാദിത്വമാണെന്ന് മനസ്സിലാക്കുവാന് അവരെ സഹായിക്കും, പാക്ക് ചെയ്യുമ്പോള് അവരുടെ പ്രായത്തിനനുസരിച്ചുള്ള ചില ടാസ്കുകള് ഏല്പ്പിക്കുന്നത് അവരെ കൂടുതല് സന്തോഷമുള്ളവരാക്കും. യാത്രയില് കുട്ടികൾക്ക് സ്ഥലത്തുനിന്ന് മറ്റൊരിടത്തേക്ക് മാറുമ്പോൾ വൃത്തിയാക്കാനും സ്വന്തം ബാഗുകൾ വീണ്ടും പാക്ക് ചെയ്യാനും അഴര്ക്ക് സാധിക്കുകയും ചെയ്യും. അവരെക്കൊണ്ട് കഴിയുന്ന കാര്യങ്ങള് തീര്ച്ചയായും അവരെ തന്നെ ഏല്പ്പിക്കാം,.
കുട്ടികളെ ചേര്ത്തുള്ള യാത്രകള് അവരെ മാത്രമല്ല, മാതാപിതാക്കള് എന്ന രീതിയില് നമ്മളെക്കൂടി വളര്ത്തുവാന് ഉപകരിക്കുന്നവയാണ്. കുഞ്ഞുങ്ങള് ഉള്ള യാത്രകള് ഒരിക്കലും പ്രതീക്ഷച്ചതുപോലെ നടക്കില്ലെന്നും ടൈം ടേബിള് മുഴുവന് തെറ്റിക്കുവാന് പോന്നതാണെന്നും യാത്ര തുടങ്ങി കുറച്ചു സമയത്തിനുള്ളില് തന്നെ മനസ്സിലാകും. അതിനാല് അവരുടെ സൗകര്യങ്ങള്ക്കനുസരിച്ച്, അവരുടെ ഭക്ഷണസമയം നോക്കി മെല്ലെ നമ്മളും അവരിലൊരാളായി മാറും.