ഓഗസ്റ്റ് മാസത്തിലെ നീണ്ട വാരാന്ത്യത്തിനായുള്ള കാത്തിരിപ്പിലാണ് എല്ലാവരും.. യാത്രകള് പ്ലാന് ചെയ്യുവാനും ഹോസ്റ്റലില് നിന്നും വീട്ടിലേക്കു വരുവാനുമൊക്കെയുള്ള കാത്തിരിപ്പില് സമയം കളയാതെ കൂട്ടുകാര്ക്കൊപ്പം ഒരു ട്രിപ്പ് പ്ലാന് ചെയ്താലോ... മൂന്നു ദിവസങ്ങള് മുഴുവനും കയ്യിലുണ്ട് എന്നതിനാല് കുറേ നാളുകളായി ആഗ്രഹിച്ച യാത്രകള് യാഥാര്ത്ഥ്യമാക്കുവാന് ഇതിലും നല്ല അവസരം വരുവാനില്ല... പ്രത്യേകിച്ച് കൂട്ടുകാരെല്ലാവര്ക്കും കൂടി ഒരുമിച്ച് അവധി ലഭിക്കുമെന്നതിനാല് യാത്രകള് കൂടുതല് രസരരമാവുകയും ചെയ്യും..നിങ്ങളുടെ സുഹൃത്തുക്കള്ക്കൊപ്പം ഓഗസ്റ്റിലെ നീണ്ട വാരാന്ത്യത്തില് യാത്ര പ്ലാന് ചെയ്യുവാന് പറ്റിയ സ്ഥലങ്ങള് ഏതൊക്കെയാണെന്നു നോക്കാം...
മയൂര്ബഞ്ച്, ഒഡീഷ
ഒഡീഷയിലെ ഗോത്രസംസ്കാരത്തിന്റെ ഇന്നലകളിലേക്ക് സഞ്ചാരികളെ എത്തിക്കുന്ന ഇടമാണ് ഒഡീഷയിലെ മയൂര്ബഞ്ച്. ഗോത്ര സമൂഹങ്ങൾക്കും അവരുടെ തനതായ സംസ്കാരങ്ങൾക്കും പേരുകേട്ട ഇവിടം സഞ്ചാരികള്ക്ക് വളരെ വ്യത്യസ്തമായ യാത്രാനുഭവങ്ങള് നല്കുന്ന ഇടമാണ്. ഖിച്ചിംഗ് ഗ്രാമം, കിച്ചകേശ്വരി ക്ഷേത്രം, സിമിലിപാൽ ദേശീയ ഉദ്യാനം, ബെൽഗാഡിയ കൊട്ടാരം, പ്രാദേശിക ഗോത്രവർഗക്കാർക്ക് തൊഴിൽ നൽകുകയും വൈദഗ്ധ്യം നൽകുകയും ചെയ്യുന്ന ഒരു സുസ്ഥിര ബോട്ടിക് ഹോംസ്റ്റേ എന്നിങ്ങനെ നിരവധി കാഴ്ചകള് ഇവിടെ കാണുകയും ആസ്വദിക്കുകയും ചെയ്യാം,
ഉത്തരാഖണ്ഡിലെ പ്രസിദ്ധ ഹില് സ്റ്റേഷനുകളിലൊന്നായ റാണിഖേത് ഹിമാലയ കാഴ്ചകള് തേടുന്ന സഞ്ചാരികള്ക്ക് പറ്റിയ ഇടമാണ്. സുഹൃത്തുക്കളൊന്നിച്ച് പോകുമ്പോള് യാത്രകള് വളരെയധികം ആസ്വദിക്കുവാന് ഇവിടെ പറ്റും. സമുദ്രനിരപ്പില് നിന്നും 1869 മീറ്റര് ഉയരത്തില് സ്ഥിതി ചെയ്യുന്ന റാഖിഖേത് അതിരില്ലാത്ത പ്രകൃതിഭംഗിക്കും ക്ഷേത്രങ്ങള്ക്കുമാണ് പ്രസിദ്ധമായിരിക്കുന്നത്. വര്ഷം മുഴുവനും സന്ദര്ശിക്കുവാന് യോജിച്ച കാലാവസ്ഥയാണ് ഇവിടുത്തേത്. എന്നിരുന്നാലും ഫെബ്രുവരി മുതല് നവംബര് വരെയാണ് ഇവിടുത്തെ സന്ദര്ശനത്തിന് ഏറ്റവും യോജിച്ചത്.
കടല്ക്കാഴ്ചകളില് സാഹസികത തിരയുന്നവര്ക്ക് പോകുവാന് പറ്റിയ സ്ഥലമാണ് തര്കാര്ലി. നിങ്ങളടെ ഫ്രണ്ട്സ് ഗ്യാങ് സാഹസികത തേടുന്നവരാണെങ്കില് ധൈര്യപൂര്വ്വം അവരെയും കൂട്ടി മഹാരാഷ്ട്രയിലെ തര്കാര്ലിക്ക് പോകാം. കൊങ്കണ് തീരത്ത് സ്ഥിതി ചെയ്യുന്ന ഇവിടം കടല്വിനോദങ്ങള്ക്കാണ് പേരുകേട്ടിരിക്കുന്നത്. ഗോവയിലെ തിരക്കും ബഹളങ്ങളും ഇഷ്ടമല്ലാത്തവര്ക്കും ഇവിടം തിരഞ്ഞെടുക്കാം. അധികമാരും എക്സ്പ്ലോര് ചെയ്യാത്ത കാഴ്ചകളാണ് ഇവിടെയുള്ളത്.
രാജസ്ഥാനിലെ സ്വര്ണ്ണനഗരമായ ജയ്സാല്മീറും ഈ ലോങ് വീക്കെന്ഡിലെ യാത്രയില് ഉള്പ്പെടുത്താം. പാക്കിസ്ഥാന് അതിര്ത്തിയോട് ചേര്ന്നു സ്ഥിതി ചെയ്യുന്ന ഈ നഗരം വളരെ രസകരമായ കാഴ്ചകളിലേക്ക് സഞ്ചാരികളെ എത്തിക്കുന്നു. മണലാരണ്യവും കോട്ടകളും ഒക്കെയുള്ള കാഴ്ചകളാണ് ജയ്സാല്മീറിന്റെ പ്രത്യേകത. ജയ്സാല്മീര് കോട്ട കാണാതെ ഒരിക്കലും ഈ യാത്ര പൂര്ത്തിയാവില്ല. മരുഭൂമി എന്തെന്നും എങ്ങനെയെന്നും പരിചയപ്പെടുവാന് പറ്റിയ അവസരം കൂടിയായിരിക്കും ഈ യാത്ര നല്കുക.
ഹിമാചല് പ്രദേശാണ് യാത്രയ്ക്ക് തിരഞ്ഞെടുക്കുന്നതെങ്കില് സംശയമൊന്നുമില്ലാതെ കസോളിന് പോകാം. ട്രക്കിങ് ആണെങ്കിലും ഹൈക്കിങ് ആണെങ്കിലും വെറുതേയൊരു യാത്രയാണ് ലക്ഷ്യമിടുന്നതെങ്കിലും കസോള് മതി. കുളു വാലിയില് പാര്വ്വതി വാലിയോട് ചേര്ന്നു കിടക്കുന്ന കസോള് ഏറ്റവും മനോഹരമായ കുറേയധികം കാഴ്ചകള് നിങ്ങള്ക്ക് സമ്മാനിക്കുന്നു. വലിയ തിരക്കില്ലാത്ത ഇവിടെ നിങ്ങള്ക്ക് സൗകര്യം പോലെ സമയം ചിലവഴിക്കുകയും ചെയ്യാം.