സഞ്ചാരികള് ഏറ്റവും കുറച്ച് കണ്ടിട്ടുള്ളതും എന്നാല് ഒരു ജീവിതം കൊണ്ടു കണ്ടുതീരുവാന് സാധിക്കാത്തതുമായ കാഴ്ചകളാണ് വടക്കു കിഴക്കന് ഇന്ത്യയുടെ പ്രത്യേകത. ഓരോ തരത്തിലുള്ള അത്ഭുതങ്ങളുമായാണ് ഓരോ വടക്കു കിഴക്കന് ഗ്രാമങ്ങളും സഞ്ചാരികളെ സ്വാഗതം ചെയ്യുന്നത്. പര്വ്വതങ്ങളും മഞ്ഞപുതച്ച ഗ്രാമങ്ങളും ഗുഹകളും കാടും എല്ലാമായി മനസ്സില് നിറഞ്ഞു നില്ക്കുന്ന കാഴ്ചകള് ഇവിടെ നിരവധിയുണ്ട്. ഓരോ യാത്രയിലും ഒരായിരം കാഴ്ചകള് ഇവിടെയുണ്ട്.
സപ്ത സഹോദരിമാര് എന്നറിയപ്പെടുന്ന വടക്കു കിഴക്കന് ഇന്ത്യയിലെ പ്രധാനപ്പെട്ട കാഴ്ചകള് പരിചയപ്പെടാം...
തവാങ് അരുണാചല് പ്രദേശ്
അരുണാചല് പ്രദേശില് ചൈനയോട് അതിര്ത്തി ചേര്ന്നു കിടക്കുന്ന തവാങ് കൊടുമുടികളുടെ സാന്നിധ്യം കൊണ്ടും അതിമനോഹരമായ കാഴ്ചകളാലും സമ്പന്നമായ പ്രദേശമാണ്. ഇന്ത്യയിലെ ഏറ്റവും വലുതും ലോകത്തിലെ രണ്ടാമത്തേതുമായ ബുദ്ധാശ്രമമായ തവാങ് സ്ഥിതി ചെയ്യുന്നത് ഇവിടെയാണ്. തവാങ് എന്നാല് കുതിര തിരഞ്ഞെടുത്തത് എന്ന അര്ഥമാണ്. അതിമനോഹരമായ പ്രകൃതി ദൃശ്യങ്ങള് കൂടാതെ ഗ്രാമീണ ജീവിതങ്ങള് ഇവിടെ കാണേണ്ട കാഴ്ചയാണ്. തവാങില് നിന്നും 42 കിലോമീറ്റര് അകലെ സ്ഥിതി ചെയ്യുന്ന ഷോങ-റ്റിസെര് തടാകം, ഗോര്സാം ചോര്ടെന് സ്പൂപം, സെല ചുരം, തുടങ്ങിയ സ്ഥലങ്ങളും കാഴ്ചകളും കൂടാതെ പ്രാദേശികമായ ആഘോഷങ്ങളും ഈ പ്രദേശത്തിന്റെ ഭംഗി വര്ധിപ്പിക്കുന്നു.
മണിപ്പൂരിന്റെ വിസ്മയങ്ങളിലൊന്നാണ് ലോക്താക് തടാകം. ഒഴുകി നടക്കുന്ന തീരങ്ങളാണ് ലോക്താക് തടാകത്തിന്റെ പ്രത്യേകത. മാന്ത്രികക്കരകള് എന്നാണ് പ്രദേശവാസികള് ഇതിനെ വിളിക്കുന്നത്. യഥാര്ത്ഥത്തില് വ്യത്യസ്ത തരത്തിലുള്ള ജൈവാവശിഷ്ടങ്ങളും മണ്ണും അവശിഷ്ടങ്ങളും ഒക്കെ ചേർന്ന് രൂപപ്പെടുന്ന ചെറു കരകളാണ് ഇതുവഴി ഒഴുകി നടക്കുന്നത്. ഈ ജൈവാവശിഷ്ടങ്ങൾ ഒവുരിനടന്ന് തടാകത്തിനകത്തെ ചെടികളുടെ വേരുകളാൽ ചുറ്റപ്പെട്ടാണ് ഇത്തരം കരകളായി തീരുന്നത്. ലോകത്തിലെ തന്നെ ഒഴുകി നടക്കുന്ന ഏക ദേശീയോദ്യാനം കൂടിയാണിത്. തടാകത്തിനകത്ത് സ്ഥിതി ചെയ്യുന്ന കെയ്ബുൾ ലംജാവോ സാൻഗായിപാർക്കാണ് ദേശീയോദ്യാനമായി അറിയപ്പെടുന്നത്. 1977 ൽ നിലവിൽ വന്ന ഇതിന് 40 ചതുരശ്ര കിലോമീറ്റർ വിസ്തൃതിയാണുള്ളത്
സ്ഫടികം പോലെ തെളിഞ്ഞ വെള്ളമാണ് മേഘാലയയിലെ ഉമങ്കോട്ട് നദിയാണ് ദ്വാകിയുടെ പ്രത്യേകത. പച്ചയും നീലയും കലര്ന്ന് തെളിഞ്ഞു കിടക്കുന്ന ഈ കാഴ്ച മേഘാലയയിലെ ഏറ്റവും മനോഹരമായ കാഴ്ചകളിലൊന്നാണ്. ഷില്ലോങ്ങില് നിന്നും 70 കിലോമീറ്റര് അകലെ സ്ഥിതി ചെയ്യുന്ന ധ്വാകി ബംഗ്സാദേശിനോട് അതിര്ത്തി ചേര്ന്നു കിടക്കുന്ന പ്രദേശവും കൂടിയാണ്.
ദൈവത്തിന്റെ സ്വന്തം പൂന്തോട്ടം എന്നു വിശേഷിപ്പിക്കപ്പെടുന്ന സ്ഥലമാണ് മാവ്ലിനോങ്. മേഘാലയയില് സ്ഥിതി ചെയ്യുന്ന ഇവിടം ഏഷ്യയിലെ ഏറ്റവും വൃത്തിയുള്ള സ്ഥലമായും തിരഞ്ഞെടുക്കപ്പെട്ടിട്ടുണ്ട്. ഷില്ലോങ്ങില് നിന്നും 80 കിലോമീറ്ററ് അകലെയായി സ്ഥിതി ചെയ്യുന്ന ഈ ഗ്രാമം പച്ചപ്പും വെള്ളച്ചാട്ടങ്ങള് കൊണ്ടും അനുഗ്രഹീതമാണ്. വെള്ളച്ചാട്ടങ്ങളും പച്ചപ്പുമാണ് ഇവിടുത്തെ മറ്റൊരു കാഴ്ച. മേഘാലയയുടെ പ്രധാന കാഴ്ചയായ ജീവനുള്ള വേരുകള്ക്കൊണ്ടുണ്ടാക്കിയിരിക്കുന്ന പാലങ്ങളെയും ഇവിടെ കാണുവാന് സാധിക്കും.
ഇന്ത്യയും ടിബറ്റും തമ്മിലുള്ള ചരിത്രപ്രധാനമായ സില്ക്ക് റൂട്ട് കടന്നു പോകു്ന സുലുക്ക് വില്ലേജ് സിക്കിമിലെ പ്രധാന കാഴ്ചകളിലൊന്നാണ്. ഗാംങ്ടോക്കും സിലിഗുരിയുമാണ് സുലുക്ക് ഗ്രാമത്തിനു സമീപമുള്ള പ്രധാന നഗരങ്ങള്. കാഞ്ചന്ജുഗ പര്വ്വതത്തിന്റെ അതിമനോഹരമായ കാഴ്ചകള് സമ്മാനിക്കുന്ന ഈ ഗ്രാമം അധികം ആളുകളൊന്നും എത്തിച്ചേരാത്ത ഇടം കൂടിയാണ്. ഇവിടെ സൂര്യനുദിക്കുന്ന കാഴ്ചയുടെ ഭംഗി എത്ര വിശദീകരിച്ചാലും തീരില്ല.
നാഗാലാന്ഡിന്റെ തലസ്ഥാനമായ കൊഹിമയോട് ചേര്ന്നു കിടക്കുന്ന ഇടങ്ങളിലൊന്നാണ് കിസാമ. നാഗാ ഗോത്രവിഭാഗക്കാരുടെ കേന്ദ്രമായി അറിയപ്പെടുന്ന ഇവിടം അവരുടെ ജീവിത കാഴ്ചകള് കാണുവാനും അടുത്തറിയുവാനും പറ്റിയ പ്രദേശമാണ്. ലോകപ്രസിദ്ദമായ ഹോണ്ബില് ഫെസ്റ്റിവല് നടക്കുന്ന പ്രദേശവും ഇത് തന്നെയാണ്.