കേരളത്തിന്റെ പച്ചപ്പും ഗ്രാമങ്ങളുടെ ഭംഗിയും കടലോരങ്ങളും തടാകങ്ങളും കണ്ട് കൊതിക്കാത്ത സഞ്ചാരികൾ കാണില്ല. നാട്ടുകാരായ നമുക്ക് നമ്മുടെ നാടിനോടുള്ള ഇഷ്ടം പറഞ്ഞറിയിക്കുവാനാകാത്തതാണ്. അപ്പോൾ പിന്നെ ചിത്രങ്ങളിലൂടെ പരിചയപ്പെടുന്ന സഞ്ചാരികൾ ഒരിക്കലെങ്കിലും ദൈവത്തിന്റെ സ്വന്തം നാടായ കേരളം കാണണമെന്ന് ആഗ്രഹിക്കുന്നത് സ്വാഭാവീകം!മഴയും വേനലുമെല്ലാം മാറി മറ്റൊരു ടൂറിസ്റ്റ് സീസൺ ഇപ്പോൾ ആരംഭിച്ചിരിക്കുകയാണ്. നോർത്ത് ഇന്ത്യയിൽ നിന്നുള്ള സഞ്ചാരികളാണ് ഇപ്പോൾ കേരളത്തിലെത്തുന്നവരിൽ അധികവും. ഉത്തരേന്ത്യൻ സഞ്ചാരികൾ കേരളത്തിൽ കൂടുതലായും സന്ദർശിക്കുന്ന സ്ഥലങ്ങൾ ഏതൊക്കെയാണ് എന്നു നോക്കാം
ജഡായുപ്പാറ
തിരുവനന്തപുരത്തേക്കുള്ള യാത്രയിലാണ് സഞ്ചാരികൾ കൂടുതലും ജഡായുപ്പാറയിലേക്ക് വരുന്നത്. കൊല്ലം ചടയമംഗലത്തു സ്ഥിതി ചെയ്യുന്ന ജഡായുപ്പാറയിൽ ലോകത്തിലെ ഏറ്റവും വലിയ പക്ഷി പ്രതിമയാണുള്ളത്. ജഡായു എർത്ത്സ് സെന്റർ അഥവാ ജഡായു നേച്ചർ പാർക്ക് ശില്പത്തിന്റെയും ക്ഷേത്രത്തിന്റെയും സാഹസകി വിനോദങ്ങളുടെയും എല്ലാം മികച്ച കൂടിച്ചേരലാണ്. പക്ഷി ശ്രേഷ്ഠനായ ജടായു ചിറകറ്റുവീണു കിടക്കുന്ന രീതിയിലുള്ള ഒരു ശില്പമാണ് ഇവിടെയുള്ളത്. 200 അടി നീളവും 150 അടി വീതിയും 75 അടി ഉയരവുമുള്ളതാണിത്.
അഡ്വഞ്ചർ സോൺ, ഡിജിറ്റൽ മ്യൂസിയം, ആയുർവ്വേദ റിസോർട്ട്, , 6ഡി തിയേറ്റർ, കേബിൾ കാർ തുടങ്ങിയവയും ഇവിടെയുണ്ട്.
വാഗമൺ
കോട്ടയം ഇടുക്കി ജില്ലകളുടെ അതിർത്തിയിലായി സ്ഥിതി ചെയ്യുന്ന വാഗമണ്ണും സഞ്ചാരികളുടെ പ്രിയപ്പെട്ട ലക്ഷ്യസ്ഥാനമാണ്. ചിലവു കുറഞ്ഞ് ഏറ്റവും മികച്ച കാഴ്ചകൾ ആസ്വദിക്കാം എന്നതാണ് ഇവിടുത്തെ പ്രത്യേകത. തണുപ്പുനിറഞ്ഞ കാലാവസ്ഥയും കോടമഞ്ഞും പാറകൾ വെട്ടിയൊരുക്കിയ വഴിയും കാലാവസ്ഥയുമെല്ലാം ഇവിടേക്ക് സഞ്ചാരികളെ ആകർഷിക്കുന്ന ഘടകങ്ങളാണ്.
പൈൻ ഫോറസ്റ്റ്, വ്യൂ പോയിന്റ്, മൊട്ടക്കുന്ന്, ചെക്ക് ഡാം, കുരിശുമല, തങ്ങള്പ്പാറ, മുരുഗൻ മല എന്നിങ്ങനെ നിരവധി സ്ഥലങ്ങൾ അടുത്തടുത്തായി ഇവിടെ കാണുവാനുണ്ട്.
തെക്കേ ഇന്ത്യയുടെ നയാഗ്ര എന്നറിയപ്പെടുന്ന അതിരപ്പള്ളി വെള്ളച്ചാട്ടം തൃശൂർ ജില്ലയിലാണ്. കേരളത്തിലെ ഏറ്റവും വലിയ വെള്ളച്ചാട്ടമായ ഇത് 80 അടി ഉയരത്തിൽ നിന്നുമാണ് താഴേക്ക് പതിക്കുന്നത്. പശ്ചിമഘട്ട മലനിരകളിൽ നിന്നുമാണ് ഈ വെള്ളച്ചാട്ടം ഉത്ഭവിക്കുന്നത്.
അതിരപ്പള്ളിയോട് ചേർന്നുള്ള വാഴച്ചാലും സഞ്ചാരികളുടെ പ്രിയ യാത്രാ സ്ഥാനമാണ്.
തൃശൂരിൽ നിന്നും 63 കിലോമീറ്റർ അകലെയാണ് അതിരപ്പള്ളി സ്ഥിതി ചെയ്യുന്നത്.
ഇന്ത്യയിലെ ആഭ്യന്തര സഞ്ചാരികൾ ഏറ്റവും കൂടുതൽ സന്ദർശിക്കുന്ന മറ്റൊരിടം വയനാടാണ്. പ്രകൃതി ഭംഗിയും കാലാവസ്ഥയും തന്നെയാണ് വയനാടിനെ പ്രിയപ്പെട്ടതാക്കുന്ന കാരണങ്ങൾ, ബാണാസുര സാഗർ ഡാം, സൂചിപ്പാറ വെള്ളച്ചാട്ടം, എടക്കൽ ഗുഹ, ചെമ്പ്രാ പീക്ക്, കുറുവാ ദ്വീപ് തുടങ്ങിയവയാണ് ഇവിടുത്തെ പ്രധാന ലക്ഷ്യസ്ഥാനങ്ങൾ.