വെറുതേയിരിക്കുമ്പോൾ പെട്ടന്നൊരു യാത്ര പോകണമെന്നാഗ്രഹിക്കുമ്പോൾ നിങ്ങൾ ഏതു സ്ഥലമായിരിക്കും തിരഞ്ഞെടുക്കുക? നാട്ടിലാണെങ്കിൽ പാലക്കയം തട്ടു മുതൽ ഫോർട്ട് കൊച്ചിയും മൂന്നാറും വാഗമണ്ണും വർക്കലയുമെല്ലാമായി നിരവധി സ്ഥലങ്ങളുണ്ട്. എങ്ങോട്ട് പോകണമെന്ന കൺഫ്യൂഷൻ മാത്രമായിരിക്കും ബാക്കിയുള്ളത്. നമ്മുടെ രാജ്യത്തെ മറ്റേതൊക്കെ ഇടങ്ങളായിരിക്കും ഇത്തരത്തിൽ ഒരു യാത്രയെപ്പറ്റി ചിന്തിക്കുമ്പോൾ ആളുകൾ തിരഞ്ഞെടുക്കുന്നത്? കുറച്ചുനാൾ മുൻപ് പുറത്തുവന്ന ഒരു റിപ്പോർട്ട് അനുസരിച്ച് ഒഴിവുസമയ ലക്ഷ്യസ്ഥാനങ്ങളായി അറിയപ്പെടുന്ന അഞ്ചിടങ്ങൾ ആളുകൾക്കിടയിൽ പ്രസിദ്ധമാണ്.. വിശദമായി വായിക്കാം
ശ്രീനഗര്
സഞ്ചാരികൾ ഒരിക്കലെങ്കിലും പോയിരിക്കണം എന്നാഗ്രഹിക്കുന്ന ശ്രീനഗർ ഈ പട്ടികയില് ഉൾപ്പെട്ടില്ലെങ്കിൽ മാത്രമേ അത്ഭുതമുള്ളൂ. ബ്രിട്ടീഷുകാരുടെ കാലത്തിനും മുൻപ് തന്നെ ലോകശ്രദ്ധയാകർഷിച്ച ഇടങ്ങളിലൊന്നാണ് ശ്രീനഗർ. മലനിരകളുടെ പശ്ചാത്തലത്തില് സ്ഥിതി ചെയ്യുന്ന ദാൽ തടാകവും അവിടുത്തെ ശിക്കാര വള്ളങ്ങളും ഹൗസ് ബോട്ടും തനിനാടൻ കാശ്മീർ രുചികളും പൂന്തോട്ടങ്ങളും ശ്രീനഗറിനെ ഒരു ആശംസാകാർഡിലെ ചിത്രം പോലെ മനോഹരമാക്കുന്നു
PC:Suhail lone
ഉദയ്പൂർ
രാജസ്ഥാനിലെ സമ്പത്തിന്റെയും ആഢംബരത്തിന്റെയും പര്യായമായ നഗരമാണ് ഉദയ്പൂർ. പൗരാണിക കാലം മുതൽ തന്നെ ചരിത്രത്തിൽ ഇടം നേടിയ ഇവിടെ കാണുവാനും പരിചയപ്പെടുവാനും നിരവധി കാര്യങ്ങളുണ്ട്. കൊട്ടാരങ്ങളാണ് ഇവിടുത്തെ കാഴ്ചകളിൽ അധികവും. പിച്ചോള തടാകവും അതിലെ നിർമ്മിതിയിലുമാണ് ഉദയ്പൂരിന്റെ ഭംഗി മുഴുവൻ അടങ്ങിയിരിക്കുന്നതെന്നു നിസംശയം പറയാം. തടാകത്തിനു നടുവിലെ താജ് ലേക്ക് പാലസ് സന്ദർശകരെ എത്തിക്കുന്നത് സ്വർഗ്ഗീയമായ അനുഭവത്തിലേക്കാണ്. ഉദയ്വിലാസ്, ലീലാ വിലാസ്, സിറ്റി പാലസ്, ബാഗോർ കി ഹവേലി, ജഗ് മന്ദിർ പാലസ്, എന്നിങ്ങനെ വേറെയും നിരവധി കാഴ്ചകൾ ഇവിടെ ആസ്വദിക്കാം