യാത്രകള് പ്ലാന് ചെയ്യുമ്പോള് സ്ഥിരം കയറിവരുന്ന സ്ഥലങ്ങളാണ് മണാലിയും കുളുവും..ഇങ്ങനെയുള്ള സ്ഥിരം ഇടങ്ങള്ക്കു പകരം കുറച്ചു വ്യത്യസ്തമായ യാത്രകളെക്കുറിച്ച് ആലോചിച്ചാലോ? സാധാരണ യാത്രാസ്ഥാനങ്ങളായ മസൂറിയും ഡറാഡൂണുമെല്ലാം മാറി നിങ്ങൾ ഈ വർഷം പുതിയ എന്തെങ്കിലും അന്വേഷിക്കുകയാണെങ്കിൽ ഇതാ ഡല്ഹിയിലെത്തി പോകുവാന് സാധിക്കുന്ന ചില സ്ഥലങ്ങള് പരിചയപ്പെടാം....
കോര്ബറ്റ്
ഉത്തരാഖണ്ഡിലെ നൈനിറ്റാൾ ജില്ലയിൽ സ്ഥിതി ചെയ്യുന്ന ജിം കോർബറ്റ് ദേശീയോദ്യാനം ഏഷ്യയിലെ ആദ്യത്തെ ദേശീയോദ്യാനമെന്ന നിലയിൽ പ്രസിദ്ധമാണ്. റോയൽ ബംഗാൾ കടുവകളെ പാർപ്പിക്കുന്നതിന് പ്രത്യേകിച്ചും പേരുകേട്ട, മനോഹരമായ പാർക്കിൽ കുന്നുകളും തടാകങ്ങളും പുൽമേടുകളും അരുവികളും ഉണ്ട്. ജംഗിൾ സഫാരി,റിവർ റാഫ്റ്റിംഗ്, നൈറ്റ് സ്റ്റേ എന്നിങ്ങനെ ഇവിടെ ചെയ്യുവാനും ആസ്വദിക്കുവാനും കാര്യങ്ങള് ഒരുപാടുണ്ട്. കോർബറ്റ് വെള്ളച്ചാട്ടവും ഗാർജിയ ദേവി ക്ഷേത്രവും ഇവിടെ മറക്കാതെ കാണണം. ജിം കോർബറ്റ് നാഷണൽ പാർക്കിന് ഏറ്റവും അടുത്തുള്ള റെയിൽവേ സ്റ്റേഷൻ 12 കിലോമീറ്റർ അകലെയുള്ള രാംനഗറിലാണ്. നിരവധി ട്രെയിനുകൾ ഡൽഹിയെയും രാംനഗറിനെയും ബന്ധിപ്പിക്കുന്നു.
പ്രകൃതിയുടെ മടിത്തട്ടിൽ വിശ്രമിക്കാൻ അനുയോജ്യമായ സ്ഥലമാണ് ധനോൽട്ടി എന്ന മനോഹരമായ പട്ടണം . സുർക്കന്ദ ദേവി ക്ഷേത്രം, ദിയോഗർ കോട്ട, ദശാവതാർ ക്ഷേത്രം, ഇക്കോ പാർക്കുകൾ, പൊട്ടറ്റോ ഫാം എന്നിവയുൾപ്പെടെ നിരവധി മനോഹരമായ സ്ഥലങ്ങളും ആകർഷകമായ വിനോദസഞ്ചാര കേന്ദ്രങ്ങളും ഇവിടെയുണ്ട്. ക്യാമ്പിംഗ്, സിപ്പ്-ലൈനിംഗ്, റാപ്പല്ലിംഗ്, മൗണ്ടൻ ബൈക്കിംഗ് എന്നിങ്ങനെ നിരവധി കാര്യങ്ങള് ഇവിടെ ആസ്വദിക്കാം. ഡൽഹിയിൽ നിന്ന് നേരിട്ടുള്ള ബസിലോ സ്വകാര്യ ടാക്സിയിലോ ധനോൽട്ടിയിലെത്താം.