ഗെയിം ഓഫ് ത്രോണ്സ്... ലോകത്തില് ഏറ്റവുമധികം ആരാധകരുള്ള ടെലിവിഷന് സീരിസ്.. വെസ്റ്ററോസ് എന്ന രാജ്യവും അത് നേടിയെടുക്കുവാനായുള്ള യുദ്ധതന്ത്രങ്ങളും ഏറ്റുമുട്ടലുകളും ചേരുന്ന ഫാന്റസി ഡ്രാമയിലെ കഥകള് പ്രേക്ഷകരെ ആവേശത്തിന്റെ അങ്ങേത്തലയ്ക്കലെത്തിക്കുന്നവയാണ്. പരമ്പരയില് കാണിച്ചിരിക്കുന്ന സ്വപ്നതുല്യമായ ഇടങ്ങള് പ്രക്ഷകരുടെ മനസ്സില് അന്നേ കയറിപ്പറ്റിയിട്ടുണ്ട്. സാങ്കല്പിക ലോകത്തിലെ ഈ ഇടങ്ങള് ചിത്രീകരിച്ച ഇടങ്ങള് ഒരിക്കലെങ്കിലും കാണണമെന്ന് ആഗ്രഹിക്കാത്ത ഒരു ഗെയിം ഓഫ് ത്രോണ്സ് ഫാന് പോലും കാണില്ല. ഇപ്പോഴിതാ ഈ സ്വപ്നവും യാഥാര്ത്ഥ്യമാകുവാന് പോവുകയാണ്. സെയില് ക്രോയേഷ്യയുടെ ഗെയിം ഓഫ് ത്രോണ്സ് തീമിലുള്ള ക്രൂസ് യാത്ര ഈ സീരിസ് ചിത്രീകരിച്ച പ്രധാന ഇടങ്ങളിലേക്ക് സഞ്ചാരികളെ കൊണ്ടുപോകുന്നു. ഈ യാത്രയെക്കുറിച്ചും ഇതിന്റെ പ്രത്യേകതകളെക്കുറിച്ചും വായിക്കാം
കഥയിലൂടെ
ടാര്ഗെറിയന്, സ്റ്റാര്ക്, ലാനിസ്റ്റര്, ബാറീതീയന്, ഗ്രെജോയ്, ടൈറില്, മാര്ട്ടല് എന്നീ ഏഴുകുടുംബങ്ങള് അയേണ് ത്രോണ് എന്ന സിംഹാസനത്തിനായി നടത്തുന്ന പോരാട്ടങ്ങള് നിറഞ്ഞ ഗെയിം ഓഫ് ത്രോണ്സ് ഷോ ആദ്യാവസാനം ആകാംക്ഷാജനകമാണ്.
2019 ല് ആയിരുന്നു സീരിസ് അവസാനിച്ചത്. അതിനുശേഷം ഇപ്പോഴും സീരിസിനെക്കുറിച്ചും കഥാപാത്രങ്ങളെക്കുറിച്ചുമുള്ള ചര്ച്ചകള് ഫാന്പേജുകളില് സജീവമാണ്. പരമ്പരയുടെ സ്പിന് ഓഫായ ഹൗസ് ഓഫ് ദ ഡ്രാഗണ് ഓഗസ്റ്റ് 21ന് പ്രക്ഷേപണമാരംഭിക്കും. അമേരിക്കൻ എഴുത്തുകാരൻ ജോർജ് ആർ ആർ മാർട്ടിന്റെ എ സോങ് ഓഫ് ഐസ് ആൻഡ് ഫയർ പരമ്പരയെ അടിസ്ഥാനമാക്കിയാണ് ഗെയിം ഓഫ് ത്രോണ്സ് സീരിസുള്ളത്.