നാട് എത്ര പൊള്ളിയാലും പച്ചപ്പ് വിട്ടൊരു കളിയുമില്ല കൂർഗിന്. എപ്പോൾ പോയാലും മലമുകളിൽ നിന്നിറങ്ങി വരുന്ന കോടമഞ്ഞും കാപ്പിയുടെയും ഓറഞ്ചിന്റെയും സുഗന്ധവുമൊക്കെയായി മത്തു പിടിപ്പിക്കുന്ന നാട്. ഒറ്റക്കാഴ്ചയിൽ തന്നെ അല്ലെങ്കിൽ ആദ്യ യാത്രയിൽ തന്നെ ആരും ഈ നാടിനെ അഗാധമായി തന്നെ പ്രണയിച്ചു പോകും. ഇത്രയും വശ്യമാർന്ന കാഴ്ചകൾ മറ്റൊരിടത്തും കാണാനാവില്ല എന്നതു തന്നെ കാര്യം. മടിക്കേരി മുതൽ കൊടകു നാടിന്റെ കാഴ്ചകൾ തുടങ്ങുകയാണ്. പ്രകൃതിയുടെ ഉള്ളിലേക്കിറങ്ങിയുള്ള വെള്ളച്ചാട്ടങ്ങളും അങ്ങിങ്ങായി കാണുന്ന ക്ഷേത്രങ്ങളും വ്യൂ പോയിന്റുകളും നല്ല കുടക് കാപ്പിയും പിന്നെ സുവർണ്ണ ക്ഷേത്രവും സന്യാസിമാരുമാണ് കുടക് കാഴ്ചകളിലുള്ളത്. ഇതിലെല്ലാം ഉപരിയായി ഹൈക്കിങ്ങിനു പേരുകേട്ട ഇടം കൂടിയാണ് കൂർഗ്. മിക്കപ്പോഴും തിരക്കുള്ള യാത്രകളിൽ വിട്ടു പോകുന്ന, കൂർഗിലെ ട്രക്കിങ്ങ് ട്രയലുകളെ പരിചയപ്പെടാം...
ചോമക്കുണ്ട്
ഹൈക്കേഴ്സിന്റെ ഇടയിൽ അത്രയൊന്നും അറിയപ്പെടാത്ത സ്ഥലമാണ് ചോമക്കുണ്ട്. ഹൈക്ക് ചെയ്യുവാൻ ആഗ്രഹിക്കുന്നവർക്ക് ഒരു ബുദ്ധിമുട്ടുമില്ലാതെ ഇവിടെ പോകാം. കുടകിന്റെ കാണാക്കാഴ്ചകൾ കണ്ട് പോകുവാൻ പറ്റിയ ചോമക്കുണ്ടിലേക്ക് ആറു കിലോമീറ്റർ ദൂരമുണ്ട് നടന്നു കയറുവാൻ. കണ്ണൂരിനും കുടകിനും ഇടയ്ക്കായാണ് ചോമക്കുണ്ട് സ്ഥിതി ചെയ്യുന്നത്. ഈ വഴി പോകുമ്പോൾ ചെലവറ എന്നൊരു അധികം അറിയപ്പെടാത്ത വെള്ളച്ചാട്ടം കഴിഞ്ഞു വേണം ഇവിടെ എത്തുവാൻ. വെള്ളച്ചാട്ടം കഴിഞ്ഞ് രണ്ടു കിലോമീറ്റർ ദൂരം കൂടി സഞ്ചരിച്ചാൽ ചോമക്കുണ്ടിലെത്താം. സാധാരണയായി ചെലവറയിൽ നിന്നുമാണ് ഇവിടേക്കുള്ള യാത്ര ആരംഭിക്കുന്നത്.