സമാധാനത്തിന്റെയും ഐക്യത്തിന്റെയും ഒപ്പം സന്തോഷത്തിന്റെയും നാട്! പരസ്പര ബഹുമാനവും മര്യാദയും ഓരോ നോട്ടത്തിലും നിലനിര്ത്തുന്ന സ്നേഹ സമ്പന്നരായ ആളുകള് വസിക്കുന്നിടം... വീടുകള്ക്കു മതിലുകളില്ലാതെ, ഒരുമയോടെ ജീവിക്കുന്ന ദ്വീപ് നിവാസികള് എന്നും ആതിഥ്യ മര്യാദയുടെയും നന്മയുടെയും പേരില് പ്രസിദ്ധരാണ്. ഏറ്റവും സംതൃപ്തരായ ആളുകളുടെ നാട് എന്നറിയപ്പെടുന്ന ലക്ഷദ്വീപിനെക്കുറിച്ചും അവിടുത്തെ പ്രത്യേകതകളെക്കുറിച്ചും വായിക്കാം
തടവുകാരില്ലാത്ത ജയിലുകള്
പരസ്പര വിശ്വസ്തതയിലും സഹകരണത്തിലും വിശ്വസിച്ച് ജീവിക്കുന്നവരാണ് ദ്വീപ് നിവാസികള്. അതുകൊണ്ടു തന്നെ ഇവര്ക്കിടയില് വലിയ പ്രശ്നങ്ങള് ഒന്നും തന്നെ ഉണ്ടാവാറില്ല. ഇന്ത്യയിലെ തന്നെ ഏറ്റവും കുറഞ്ഞ കുറ്റകൃത്യ നിരക്കുള്ള ഇടമാണ് ലക്ഷദ്വീപ്. ജയിലില് കുറ്റവാളികളില്ലാത്തതിനാല് അതും ഇവിടെ പ്രവര്ത്തിക്കുന്നില്ല!
ആറു ദ്വീപുകളില് മാത്രം!
11 ദ്വീപുകളിലാണ് ഇവിടെ ജനവാസമുള്ളത്. എന്നാല് പുറത്തുനിന്നെത്തുന്ന സഞ്ചാരികള്ക്ക് ഇവിടുത്തെ എല്ലാ ദ്വീപുകളിലും സന്ദര്ശിക്കുവാന് അനുമതിയില്ല. ഇന്ത്യയില് നിന്നെത്തുന്നവര്ക്ക് അഗത്തി, ബംഗാരം, കടമത്ത്, കവരത്തി, കല്പ്പേനി, മിനിക്കോയ് എന്നീ ആറ് ദ്വീപുകളില് സന്ദര്ശനം നടത്താം. വിദേശികള്ക്ക് അഗത്തി, ബംഗാരം, കടമത്ത്, എന്നീ ദ്വീപുകള് മാത്രമേ സന്ദര്ശിക്കാന് കഴിയൂ.
PC: Lenish Namath
കടല് വിനോദങ്ങള്
കടല് വിനോദങ്ങളാണ് ലക്ഷദ്വീപില് പ്രസിദ്ധമായിരിക്കുന്ന മറ്റൊരു കാര്യം. മികച്ച ഗുണനിലവാരത്തില് കടലിനടയിലെ കാഴ്ചകള് കാണുവാന് സാധിക്കുന്ന നിരവധി മാര്ഗ്ഗങ്ങള് ഇവിടെയുണ്ട്. സ്കൂബാ ഡൈവിങ്ങ്, സ്നോർക്കലിങ്ങ്, കയാക്കിങ്, സെയിലിങ്. ഗ്ലാസ് ബോട്ടം ബോട്ട് റൈഡ്, ഫിഷിങ്ങ്, വാട്ടർ സ്കീയിങ്ങ് എന്നിങ്ങനെ നിരവധി കാര്യങ്ങള് ഇവിടെ ആസ്വദിക്കാം.
ഇവിടെ നിലനില്ക്കുന്ന നിയമങ്ങളനുസരിച്ച് പുറമേ നിന്നാര്ക്കും ലക്ഷദ്വീപില് ഭൂമി മേടിക്കുവാന് അനുമതിയില്ല. ഇവിടെ ജനിച്ചവര്ക്കു മാത്രമാണ് ലക്ഷദ്വീപില് ഭൂമി വ്യവഹാരത്തിനു അനുമതിയുള്ളത്. പുറമേ നിന്നും ഇവിടേക്ക് വിവാഹം കഴിച്ചു വന്നവര്ക്കും നിയമപരമായി ഇവിടെ ഭൂമി മേടിക്കുവാന് സാധിക്കില്ല. ദ്വീപുകളുടെ വാണിജ്യവത്ക്കരണം തടയുന്നതിനാണ് ഈ നിയമം ആവിഷ്കരിച്ചിരിക്കുന്നത്.