1973 വരെ 'മൈസൂർ സംസ്ഥാനം' എന്നറിയപ്പെട്ടിരുന്ന കര്ണ്ണാടക ഇന്നു കാണുന്ന സംസ്ഥാനത്തിന്റെ രൂപത്തിലേക്ക് എത്തുന്നത് 1956 ല് ആണ്. ചരിത്രത്തിന്റെ ഒരു അക്ഷയഖനിയായ ഈ നാട് സഞ്ചാരികള്ക്ക് കൗതുകവും പ്രകൃതി സ്നേഹികള്ക്ക് അതിശയവും വിശ്വാസികള്ക്ക് ആരാധനയും ചരിത്രകാരന്മാരെ അമ്പരപ്പും നല്കുന്ന സ്ഥലമാണ്. ആധുനികതയുടെ ഏറ്റവും പുതുമ ഒരു വശത്ത് കാണുമ്പോള് അതിനിവിടെ ഒരു മറുവശവുമുണ്ട്. പലഭാഷ സംസാരിക്കുന്നവരും പല വിശ്വാസങ്ങളും ആചാരങ്ങളും പിന്തുടരുന്നവരും എല്ലാം ഒന്നായി നില്ക്കുന്ന കര്ണ്ണാടകയെക്കുറിച്ച് കൗതുകമുണര്ത്തുന്ന, രസകരമായ വിശേഷങ്ങള് വായിക്കാം....
റോക്കറ്റ് പീരങ്കികൾ നിര്മ്മിച്ച സംസ്ഥാനം
രാജ്യത്ത് ആദ്യമായി റോക്കറ്റ് പീരങ്കികൾ നിർമ്മിച്ച സംസ്ഥാനമാണ് കര്ണ്ണാടക.മൈസൂർ രാജ്യത്തിന്റെ ഏറ്റവും ശക്തനായ ഭരണാധികാരിയായിരുന്ന ടിപ്പു സുൽത്താനാണ് റോക്കറ്റ് പീരങ്കികൾ നിർമ്മിച്ച ഇന്ത്യയിലെ ആദ്യത്തെ ഭരണാധികാരി. ബ്രിട്ടീഷ് സൈന്യത്തെ ആക്രമിക്കാനും സ്വാതന്ത്ര്യം നഷ്ടപ്പെടാതെ തന്റെ രാജ്യം സംരക്ഷിക്കാനുമാണ് അദ്ദേഹം ഇവ നിര്മ്മിച്ചതത്രെ.
ആദ്യത്തെ സ്വകാര്യ റേഡിയോ സ്റ്റേഷൻ
ആദ്യത്തെ സ്വകാര്യ റേഡിയോ സ്റ്റേഷൻ സ്ഥാപിച്ച ആദ്യത്തെ സംസ്ഥാനം കൂടിയാണ് കർണാടക. 2001ൽ ബാംഗ്ലൂരിൽ ആദ്യമായി റേഡിയോ സിറ്റി 91.1 എഫ്എം ആരംഭിച്ചു. ഇന്ന്, ഈ ദേശീയ ചാനലിന് രാജ്യത്തുടനീളം സ്വന്തമായി 50-ലധികം റേഡിയോ സ്റ്റേഷനുകളുണ്ട്
റാണി ചെന്നമ്മ
റാണി ലക്ഷ്മിഭായിയുടെ ഉദയത്തിന് പതിറ്റാണ്ടുകൾക്ക് മുമ്പ് ബ്രിട്ടീഷ് കൊളോണിയൽ ശക്തിക്കെതിരെ പോരാടിയ ഒരു രാജ്ഞിയുടെ ധീരമായ കഥ കര്ണ്ണാടകയ്ക്ക് പറയുവാനുണ്ട്.
നാട്ടുരാജ്യമായ കിറ്റൂരിലെ രാജ്ഞി റാണി ചെന്നമ്മ ബ്രിട്ടീഷ് ഈസ്റ്റ് ഇന്ത്യാ കമ്പനിക്കെതിരെ സായുധ കലാപത്തിന് നേതൃത്വം നൽകിയ ഇന്ത്യയിലെ ആദ്യത്തെ വനിതയാണ്. കിറ്റൂർ ചെന്നമ്മ എന്നും റാണി അറിയപ്പെടുന്നു.
PC:Suma
വെള്ളച്ചാട്ടങ്ങളുടെ നാട്
ഇന്ത്യയിൽ ഏറ്റവും കൂടുതൽ വെള്ളച്ചാട്ടങ്ങൾ ഉള്ളത് കർണാടകയിലാണ്. 35-ലധികം വെള്ളച്ചാട്ടങ്ങൾ സംസ്ഥാനത്തുണ്ട്. ജോഗ് വെള്ളച്ചാട്ടം' എന്നും അറിയപ്പെടുന്ന ഗെർസോപ്പ വെള്ളച്ചാട്ടം ഇന്ത്യയിലെ രണ്ടാമത്തെ ഏറ്റവും ഉയർന്ന വെള്ളച്ചാട്ടമാണ്.
ഇന്ത്യയിലെ ഏറ്റവും വലിയ വാക്ക്-ത്രൂ ഏവിയറി
ഇന്ത്യയിലെ ഏറ്റവും വലിയ വാക്ക്-ത്രൂ ഏവിയറി സ്ഥാപിച്ചിരിക്കുന്ന മൈസൂരിലെ കരഞ്ചി തടാകം വളരെ രസകരമായ ഒരിടമാണ്. തടാകത്തിന് ചുറ്റും മനോഹരമായ പൂന്തോട്ടങ്ങളും പാർക്കും മൃഗശാലയും ഉള്ളതിനാൽ, പ്രദേശവാസികൾക്ക് ഇത് ഒരു വാരാന്ത്യ കേന്ദ്രമാണ്. 50-ലധികം പക്ഷികൾ, കൃത്രിമ വെള്ളച്ചാട്ടം, ഏതാനും കുളങ്ങൾ എന്നിവ ഈ ഏവിയറിയിലുണ്ട്.
PC:Nagesh Kamath
സംസ്കൃതം മാത്രം സംസാരിക്കുന്ന ഗ്രാമം
കര്ണ്ണാടകയില് സംസ്കൃതം മാത്രം സംസാരിക്കുന്ന ഒരു ഗ്രാമമുണ്ട്.
ലോകത്തിലെ സംസ്കൃത ഗ്രാമം എന്നറിയപ്പെടുന്ന മാട്ടൂര് ആണിത്. പൗരാണിക സംസ്കൃതം സംഭാഷണത്തിനായി ഉപയോഗിക്കുന്ന ഇവിടെ വെറും 1500 ഓളം ആളുകൾ മാത്രമാണ് താമസിക്കുന്നത്. തുംഗാ നദിയുടെ കരയിലാണ് മട്ടൂർ സ്ഥിതി ചെയ്യുന്നത്. ഇവിടുത്തെ മിക്ക ഭവനങ്ങളും ഒരു സംസ്കൃ പാഠശാല കൂടിയാണ്.