അങ്ങനെ നീണ്ട യാത്രയില് വയസ്സ് 66 ല് എത്തി നില്ക്കുകയാണ് കേരളം. കയറ്റങ്ങളും ഇറക്കങ്ങളും വികസനവും ചര്ച്ചകളും ഒക്കെയായി കാലങ്ങള് നീണ്ട പ്രക്രിയയിലൂടെയാണ് ഇന്നത്തെ നമ്മുടെ കേരളം രൂപപ്പെട്ടിരിക്കുന്നത്. പരശുരാമന് മഴുവെറിഞ്ഞ് സൃഷ്ടിച്ചെന്നു ഐതിഹ്യം പറയുന്ന, ഏറ്റവും മികച്ച ഭരണം നടക്കുന്ന സംസ്ഥാനമെന്ന് കണക്കുകള് പറയുന്ന നമ്മുടെ സംസ്ഥാനം എന്തുകൊണ്ടും ഒരത്ഭുതം തന്നെയാണ്. ഒരേ ഭാഷ സംസാരിക്കുന്നവരുടെ നാട് എന്ന വര്ഗ്ഗീകരണത്തില് തിരുവിതാംകൂര്, കൊച്ചി, മലബാര് എന്നീ മൂന്നു നാട്ടു രാജ്യങ്ങള് ഒന്നുചേര്ന്ന് ഐക്യകേരളമായതിന്റെ ഫലമാണ് ഇന്നത്തെ കേരളം.
ദൈവത്തിന്റെ സ്വന്തം നാടായ കേരളം ലോകമെമ്പാടുമുള്ള സഞ്ചാരികളുടെ പ്രിയപ്പെട്ട യാത്രാ സ്ഥാനം കൂടിയാണ്. യാത്രകള് കൊതിപ്പിക്കുന്നവര്ക്ക് കാഴ്ചകളുടെയും അനുഭവങ്ങളുടെയും ഒരു വലിയ പറുദീസ തന്നെയാണ് ഈ നാട്. ഇതാ കേരളത്തെക്കുറിച്ച് ഓരോ സഞ്ചാരിയും തീര്ച്ചയായും അറിഞ്ഞിരിക്കേണ്ട കുറച്ച് കാര്യങ്ങളിലേക്ക്....
ആയുര്വ്വേദത്തിന്റെ കേന്ദ്രം
ആയുസ്സിന്റെ വേദമായ ആയുര്വ്വേദത്തിന്റെ നാടായാണ് കേരളം അറിയപ്പെടുന്നത്. ആരോഗ്യ സംരക്ഷത്തിനുള്ള ഭാരതത്തിന്റെ സംഭാവനയാണ് ആയുര്വ്വേദം. അതില്തന്നെ കേരളത്തിന് ഒരു മേല്ക്കൈ കൂടുതലുമുണ്ട്. നൂറ്റാണ്ടുകളായി ആയുര്വ്വേദം കേരളത്തിന്റെ ഭാഗം തന്നെയാണ്.
ലോകത്തിലെ 10 സ്വര്ഗ്ഗങ്ങളിലൊന്ന്
ദൈവത്തിന്റെ സ്വന്തം നാടായ കേരളം എല്ലാ തരത്തിലും ഒരു സ്വര്ഗ്ഗം തന്നെയാണ്. ഈ സ്വര്ഗ്ഗം തേടി ലക്ഷക്കണക്കിന് സഞ്ചാരികളാണ് ഓരോ വര്ഷവും ലോകത്തിന്റെ വിവിധ ഭാഗങ്ങളില് നിന്നും കേരളത്തിലെത്തുന്നത്. ലോകത്തിലെ പത്ത് സ്വര്ഗ്ഗങ്ങളിലൊന്നായി നാഷഷല് ജിയോഗ്രഫിക്സ് കേരളത്തിനെ തിരഞ്ഞെടുത്തിരുന്നു.
ആഘോഷങ്ങളുടെ നാട്
ലോകത്തില് തന്നെ ഏറ്റവുമധികം ഉത്സവങ്ങളും ആഘോഷങ്ങളും നടക്കുന്ന സ്ഥലമാണ് കേരളം. വിവിധ മതവിഭാഗങ്ങളുടേതായി നടക്കുന്ന ആഘോഷങ്ങള് എന്നും ഇവിടേക്ക് സഞ്ചാരികളെ ആകര്ഷിക്കുന്നു. തൃശൂര് പൂരവും ഓണവും പുലികളിയും വള്ളം കളിയും ലോകം ശ്രദ്ധിക്കുന്ന കേരളത്തിലെ ആഘോഷങ്ങളാണ്.
സുഗന്ധവ്യജ്ഞനങ്ങളുടെ നാട്
സുഗന്ധവ്യജ്ഞനങ്ങളുടെ നാട് എന്നാണ് കേരളം അറിയപ്പെടുന്നത്. ലോക സുഗന്ധവ്യജ്ഞന തലസ്ഥാനം എന്നും ഇവിടം അറിയപ്പെടുന്നു. ബിസിഇ 3000 മുതല് തന്നെ കേരളം സുഗന്ധവ്യജ്ഞനങ്ങളുടെ പേരില് പ്രസിദ്ധമായിരുന്നു.