കാടകളങ്ങളും വെള്ളച്ചാട്ടങ്ങളും പച്ചപ്പും തേടിയുള്ള യാത്രകൾ എന്നും സഞ്ചാരികൾക്ക് ഹരമാണ്. കേരളത്തിലങ്ങോളമിങ്ങോളം കാടിന്റെ കാഴ്ചകൾ നല്കുന്ന ഇടങ്ങൾ ഒരുപാടുണ്ടെങ്കിലും അതിൽനിന്നെല്ലാം വ്യത്യസ്തമാണ് ഗവി. കാടിന്റെ മാത്രം കാഴ്ചയല്ല, മലനിരകളും അരുവികളും വന്യമൃഗങ്ങളും എല്ലാം ചേരുന്ന ഒരു മികച്ച യാത്രാ പാക്കേജ്.. ജീവിതത്തില്‍ ഒരിക്കലും മറക്കില്ലാത്ത യാത്രാനുഭവങ്ങൾ നല്കുന്ന മലയാളികളുടെ സ്വന്തം ഗവി.
കാടിന്റെ സുഗന്ധത്തിൽ കാടിനുള്ളിലൂടെ കടന്നുപോകുന്ന 70 കിലോമീറ്റർ യാത്രയാണ് ഗവി യാത്രയുടെ ആത്മാവ്. വ്യൂ പോയിന്‍റുകളും കാഴ്ചകളം ഒന്നൊഴിയാതെ പകർത്തി, ഓർമ്മകളാക്കി മുന്നോട്ടു പോയാലോ? അതും നമ്മുടെ സ്വന്തം ആനവണ്ടിയിൽ?? ഇതാ നീണ്ട നാളത്തെ ആവശ്യങ്ങൾക്കും കാത്തിരിപ്പുകൾക്കും ശേഷം കെഎസ്ആര്‍ടിസി ബജറ്റ് ടൂറിസം ഗവിയിലേക്കുള്ള വിനോദ യാത്രകൾ തുടങ്ങുകയാണ്. ആലപ്പുഴ ജില്ലയിലെ 7 ഡിപ്പോകളില്‍ നിന്നും ഡിസംബര്‍, ജനുവരി മാസത്തില്‍ കെഎസ്ആർടിസിയിൽ ഗവിയിലേക്ക് നടത്തുന്ന യാത്രയുടെ വിശദാംശങ്ങൾ!
ഗവി വഴി പാഞ്ചാലിമേട്ടിലേക്ക്
പത്തനംതിട്ടയുടെയും ഇടുക്കിയുടെയും ഏറ്റവും മികച്ച കാഴ്ചകൾ ആസ്വദിക്കുവാൻ സാധിക്കുന്ന തരത്തിലാണ് കെഎസ്ആർടിസിയുടെ ആലപ്പുഴ യൂണിറ്റുകൾ ഗവി- പാഞ്ചാലിമേട്, കൊച്ചു പമ്പ ട്രക്കിങ് യാത്രകൾ ഒരുക്കിയിട്ടുള്ളത്. കാഴ്ചകളെല്ലാം കണ്ടും അനുഭവിച്ചും കുറഞ്ഞത് അഞ്ചര മണിക്കൂർ യാത്രയുണ്ടിത്. കാട്ടുമൃഗങ്ങളെ കണ്ട്, ഭാഗ്യമുണ്ടെങ്കിൽ കണ്‍മുന്നിൽതന്നെ ഒരു ദർശനം തരപ്പെടും! ഒറ്റക്കൊമ്പന്മാരെയും മ്ലാവുകളെയും കാട്ടുപോത്തുകളെയും ഒക്കെ കണ്ടാണ് യാത്ര. കക്കി ഡാമിന്‍റെയും അവിടുത്തെ കാഴ്ചകളുടെയും സൗന്ദര്യം എടുത്തുപറയേണ്ട ആവശ്യമില്ല.
കാഴ്ചകൾ ഇഷ്ടംപോലെ
കെഎസ്ഇബിയുടെ കീഴിലുള്ള എട്ട് ഡാമുകളാണ് ഈ വഴിയിലുള്ളത്. അതിൽ അഞ്ചെണ്ണം ഈ യാത്രയിൽ നമുക്ക് കാണാൻ കഴിയും. മൂഴിയാർ ഡാം , കക്കി ഡാം,ആനത്തോട്, കൊച്ചു പമ്പ, ഗവി എന്നിവയാണവ. പത്തനംതിട്ടയിൽ നിന്നും ആരംഭിക്കുന്ന യാത്ര മൈലപ്ര , മണ്ണാറകുളഞ്ഞി , വടശ്ശേരിക്കര , പെരുനാട് , ചിറ്റാര്‍ , സീതത്തോട് , ആങ്ങമൂഴി , മൂഴിയാര്‍ , കക്കി ഡാം വഴിയാണ് ഗവിയില്‍ എത്തിച്ചേരുന്നത് . അവിടെ നിന്നും പഞ്ചാലിമേട്ടിലേക്ക്.
ഇടുക്കി ജില്ലയിലെ ഓഫ്ബീറ്റ് കാഴ്ചകളിലൊന്നാണ് പാഞ്ചാലിമേട്. കുട്ടിക്കാനത്തിനു സമീപം സ്ഥിതി ചെയ്യുന്ന ഇവിടം സമുദ്രനിരപ്പിൽ നിന്നും 2500 അടി ഉയരത്തിലാണുള്ളത്. വനവാസകാലത്ത് പാണ്ഡവരും ഭാര്യ പാഞ്ചാലിയും ഈ കുന്നിൻ മുകളിൽ അഭയം പ്രാപിച്ചിരുന്നുവെന്നാണ് പുരാണങ്ങൾ പറയുന്നത്. അങ്ങനെയാണത്രെ ഇവിടം പാഞ്ചാലിമേട് എന്നറിയപ്പെടുന്നതും.
Click it and Unblock the Notifications
