ഇടുക്കിയിലെ ചെറിയ മലമ്പ്രദേശങ്ങളില് സഞ്ചാരികള്ക്ക് ഏറെ പ്രിയപ്പെട്ട സ്ഥലമാണ് പീരുമേട്. വെള്ളച്ചാട്ടങ്ങളും വഴിയരുകിലെ തേയിലത്തോട്ടങ്ങളും മനോഹരമായ കാലാവസ്ഥയും ഒക്കെ ചേര്ന്ന് ആരെയും ആകര്ഷിക്കുന്ന ഈ സ്ഥലത്തിന്റെ ഭംഗി പറഞ്ഞറിയിക്കാന് സാധിക്കാത്തതാണ്. സമുദ്രനിരപ്പില് നിന്നും 915 മീറ്റര് ഉയരത്തില് സ്ഥിതി ചെയ്യുന്ന ഇവിടം പശ്ചിമഘട്ടത്തിന്റെ ഭംഗി മുഴുവന് കൂടിച്ചേരുന്ന സ്ഥലം കൂടിയാണ്.
പീരുമേടിന്റെ വിശേഷങ്ങള് അറിയാം...
കൊടുംചൂടിലും മഞ്ഞുപുതച്ചു നില്ക്കുന്ന പരുന്തുംപാറ പീരുമേടിന്റെ ഏറ്റവും വലിയ ആകര്ഷണങ്ങളില് ഒന്നാണ്. സഞ്ചാരികളുടെ വീക്കെന്ഡ് ഡ്രൈവിങ് ഡെസ്റ്റിനേഷനുകളില് ഇടം നേടിയ ഇവിടം മൊട്ടക്കുന്നുകളും മലകളും പാറക്കൂട്ടങ്ങളും താഴ് വരകളും ഒക്കെ ചേരുന്ന ഇടമാണ്. കാഴ്ചയിലെ ഈ വ്യത്യസ്തത തന്നെയാണ് സഞ്ചാരികളെ ഇവിടേക്ക് ആകര്ഷിക്കുന്നതും. അപ്രതീക്ഷിതമായി എത്തുന്ന കോടമഞ്ഞും ചാറ്റല്മഴയുമെല്ലാം ഇവിടം സഞ്ചാരികളുടെ പ്രിയ സ്ഥലമാക്കി മാറ്റുന്നു.
മുന്നറിയിപ്പില്ലാതെ പെയ്തിറങ്ങുന്ന മഞ്ഞാണ് പാഞ്ചാലിമേടിന്റെ പ്രത്യേകത. സമുദ്രനിരപ്പില് നിന്നും 2500 അടി ഉയരത്തില് സ്ഥിതി ചെയ്യുന്ന ഇവിടെ പാണ്ഡവന്മാര് പാഞ്ചാലിയുമൊന്നിച്ച് വനവാസക്കാലത്ത് താമസിച്ചിരുന്ന സ്ഥലമായാണ് അറിയപ്പെടുന്നത്.
പാണ്ഡവരെ ആക്രമിക്കാന് എത്തിയ ഭീകരരൂപിണിയെ ശപിച്ച് ശിലയാക്കിയതിന്റെയും പാണ്ഡവര് പാചകം ചെയ്യുന്നതിനായി ഒരുക്കിയ അടുപ്പുകല്ലിന്റെയും അവശിഷ്ടങ്ങള് ഇന്നും അവിടെയുണ്ട്. തന്നെ ആക്രമിക്കാന് വന്ന ആനയെ പാഞ്ചാലി ശപിച്ച് ശിലയാക്കിയ കല്ലും കാണാന് സാധിക്കും. ഇതൊക്കെ ഇവിടുത്തെ പാണ്ഡവരുടെ താമസത്തെ സൂചിപ്പിക്കുന്ന അടയാളങ്ങളായാണ് വിശ്വസിക്കപ്പെടുന്നത്.
കോട്ടയംകുമളി റോഡില് മുറിഞ്ഞപുഴയില് നിന്നും ഏഴ് കിലോമീറ്റര് അകലെയാണ് പാഞ്ചാലിമേട്. മുണ്ടക്കയത്തു നിന്നും തെക്കേമല വഴിയും ഇവിടെ എത്താന് കഴിയും.
പീരുമേടിന് സമീപം സ്ഥിതി ചെയ്യുന്ന അതിമനോഹരമായ സ്ഥലമാണ് ത്രിശങ്കു ഹില്സ്. പ്രകൃതിഭംഗിയാര്ന്ന ഇവിടം അതിമനോഹരമായ ഒരു ലാന്ഡ്സ്കേപാണ്. മെല്ലെ വീശുന്ന കാറ്റും നടക്കാന് എളുപ്പമുള്ള വഴിയും ഒക്കെ ഇവിടം ആളുകളുടെ പ്രിയപ്പെട്ട സ്ഥലമാക്കുന്നു. മാത്രമല്ല, ഇവിടെ നിന്നുള്ള സൂര്യോദയവും സൂര്യാസ്തമയവും പറഞ്ഞറിയിക്കാന് പറ്റാത്തത്ര ഭംഗിയുള്ളതാണ്. അതിനാല് തന്നെ നിരവധി സഞ്ചാരികളാണ് ഇവിടെ എത്തുന്നത്.
പീരുമേടിന്റെ ഏറ്റവും വലിയ ആകര്ഷണങ്ങളില് ഒന്നാണ് കുട്ടിക്കാനം എന്ന മനോഹരമായ സ്ഥലം. ഇടുക്കിയിലെ ട്രക്കിങ്ങിന്റെയും സാഹസികതയുടെയും പ്രധാന കേന്ദ്രം കൂടിയാണ് ഇവിടം. ചുറ്റോടുചുറ്റും നിറഞ്ഞു നില്ക്കുന്ന മലകളും തേയിലത്തോട്ടങ്ങളും പച്ചപ്പും ഒക്കെ ഇവിടുത്തെ ഗ്രാമീണഭംഗി വര്ധിപ്പിക്കുന്നതില് പ്രധാന പങ്ക് വഹിക്കുന്നുണ്ട്.
ഇടുക്കിയിലെ പ്രധാന തീര്ഥാടന കേന്ദ്രങ്ങളില് ഒന്നായ പട്ടുമലപ്പള്ളിയും പീരുമേടിന് സമീപം സ്ഥിതി ചെയ്യുന്ന സ്ഥലമാണ്. പട്ടുപോലെ തോന്നിക്കുന്ന മലകളാണ് ഇവിടുത്തെ പ്രധാന കാഴ്ച. മഞ്ഞു പുതച്ചു കിടക്കുന്ന കുന്നുകളും തേയിലത്തോട്ടങ്ങളും ഒക്ക ഇവിടെ കണ്ണിന് വിരുന്നൊരുക്കുന്ന കാഴ്ചകളാണ്. വേളാങ്കണ്ണി മാതാവിന്രെ പേരിലുള്ള ദേവാലയമാണ് ഇവിടുത്തെ പ്രധാന ആകര്ഷണം, നൂറു കണക്കിന് വിശ്വാസികളാണ് ഓരോ ദിവസവും ഇവിടെ എത്തുന്നത്.
സമുദ്രനിരപ്പില് നിന്നും 915 മീറ്റര് ഉയരത്തില് സ്ഥിതി ചെയ്യുന്ന പീരുമേട് കോട്ടയം-കുമളി റോഡിലാണ് സ്ഥിതി ചെയ്യുന്നത്. കോട്ടയത്തു നിന്നും 75 കിലോമീറ്ററും കുമളിയില് നിന്നും 26 കിലോമീറ്ററും വാഗമണ്ണില് നിന്നും 29 കിലോമീറ്ററും അകലെയാണ് സ്ഥിതി ചെയ്യുന്നത്.