ലോകത്തിന്റെ ഏതു കോണുകളിലാണെങ്കിലും ടിപ്പിക്കൽ മലയാളി കാത്തുസൂക്ഷിക്കുന്ന, അല്ലെങ്കിൽ കൈവിടാനാഗ്രഹിക്കാത്ത കുറച്ചു കാര്യങ്ങളുണ്ട്. മോരുകറിയും മുളക് വറുത്തതും ചമ്മന്തിയും ഒക്കെ കൂട്ടിയുള്ള ഊണും ഓണവും വിഷുവും പോലുള്ള ആഘോഷങ്ങളും കൂടാതെ യേശുദാസിന്റെ പാട്ടും മോഹൻലാലിന്റെ സിനിമയും ഒക്കെ മലയാളികൾ എവിടെ പോയാലും കൂടെ കൂട്ടുന്നതാണ്. ജീവിതത്തിന്റെ ഒരു ഘട്ടത്തിലും കൈവിടാതെ കയ്യിൽ ചേർത്തുവയ്ക്കുന്നവ. വിശ്വാസികളാണെങ്കിൽ ഗുരുവായൂരപ്പനും പറശ്ശിനിക്കടവ് മുത്തപ്പനും അയ്യപ്പനും ഒക്കെ എന്നും ചുണ്ടിൽ കാണുകയും ചെയ്യും. മലയാളികളുടെ വിശ്വാസങ്ങൾക്കൊപ്പം ലോകം മുഴുവൻ ഇങ്ങനെ സഞ്ചരിക്കുന്ന കുറേ കാര്യങ്ങളുണ്ട്. ഇന്ത്യയ്ക്ക് വെളിയിൽ പോയാൽ ഇതാണ് അവസ്ഥ എങ്കിൽ കേരളത്തിനു പുറത്തുള്ളവരുടെ കാര്യം പിന്നെ പറയേണ്ടല്ലോ.. മലയാളികൾ നിർമ്മിച്ച ക്ഷേത്രങ്ങൾ രാജ്യത്തിന്റെ വിവിധ ഭാഗങ്ങളിൽ കാണപ്പെടുവാനുള്ള കാരണം ഈ നൊസ്റ്റാൾജിയ തന്നെയാണ്. അതുകൊണ്ടാണ് ദാ തൊട്ടടുത്തുള്ള ചെന്നൈയിൽ നമുക്ക് അയ്യപ്പനെയും ഗുരുവായൂരപ്പനെയും പ്രതിഷ്ഠിച്ചിരിക്കുന്ന ക്ഷേത്രം കാണാൻ കഴിയുന്നതും...